12
Maria uta taba-lomdu, tang tambal fuunin wok kuluu-lomdu, Yesus ami yaan diim ling daansu kaata ko
Mat 26:6-13, Mak 14:3-9, Luk 10:38-42, Jon 11:1-2
Pasova iintang am o, kala ima ina fakamin am kaali, daanin disa am bukupkal ma bom-sulule, Yesus ayo din Betani abip abala una; kemin, abip kaa siin kawu tunum Lasarus ayo taanaya, Yesus ata dafose ami abip.
Abip kaptam kasel iyo Yesus ami fiyaap don-bamdip, ima folipla, Mata uta dong dokoyulu, ima uyo kulii-tal kola-kola-kelipya, abip kasel unang tunum sole, Lasarus so, Yesus aso, iyo tiin-bomdipya, in-biliple kulaali, Maria uyo tang tabin wok tambal ket kaami uluum kaali, hap kilo uyo kuluu-lomdu, Yesus ami yaan diim kawu sing-daala-lomdu, ulmi dabom kon batbat ta yak diliit saanule, tang tambal ayo taba-lom am kaptam aso bukula. Kemin, tang tambal tabin wok ami win kaali boko-lomdip: Naat o, ken-umbip kaami sisol kaali, sakbaalim dukum kaata kuluu saan-umbip. Yesus ami daang bakaalin tunum Keriot kayaak Judas ata taba-lomda Yesus dap-fatap-daalokoma ata bokola: Tang tambal-kup tabin wok Yesus ami diim tinan daalu kaami sisol ayo sakbaalim dukum kemin, okok kebi wasital maakup ke sisol kaabip tap ami sisol kaa kanolin kemin, unang kuuli kanimin o, kala kulii-din maket diim kawu kutiiluya, molip tuumon 300 ayo kuluu-lomdu kulii-din unang tunum mafek mafek dinimal imi kuuyin disa nolu no? kala ko.
Judas ayo yukut inin tunum kemin, ali nikil imi tuumon men tiin mo-bomda kulii-tal-une-bamdaya, tuumon kaali, maaklo yukut malii ma fakan-umba kemin, ami weng kaali ti, unang tunum iiwaan imi aket kaa fukunin dinim kemin, almi aket-kup fukun-bamdaya kemin, kanum bokola ko.
Kanum bokolale, Yesus ayo bokola: Unang kuuli, kuno kewan aa! Kewapya, tang tibin wok tambal kutal-fukubu kaa, tiin mo-bomduya, nami taani namaalokomip kaali, talalu-namulu yo. Unang tunum mafek mafek dinim iyo kipso suunkup laabip. Lale, nali kipso suunkup kalawu ilokomi disa yo, kala kanum bokola ko.
Kamok kamok iyo Lasarus ami aalup taanak o, kemsip kiimi sang kaata ko
Juda unang tunum yaapkan iyo weng saniwa yi, Yesus ayo abip Betani kawu bombe no, kalalip iyo kabanip ko. Iyo din Yesus ata-kup atamum o, kalaliwa daa; siin kawu Lasarus ayo taanaya, Yesus ata dafolaya, tam tiinse kemin, aso atamum o, kalalipla unip. 10-11 Juda kasel unang tunum yaapkan iyo utamipla, Yesus ayo Lasarus ami dafose no, kala-somdipya, tunum awem imi kamok kamok imi lak kaa, kela Yesus ami lak kaata-kup duulip kemin, awem tunum imi kamok kamok iyo utamiwa yi, Iyo kanubip kala, kalalipya, Lasarus aso aalup taanik o, kala weng tituun-kup bokolip.
Yesus ali king altap ke-lom Jerusalam unsa kaami sang kaata ko
Mat 21:1-11, Mak 11:1-11, Luk 19:28-40
12 Unang tunum yaapkan iyo Pasova iintang am ima inin uyo kufolum o, kala-lomdip tal Jerusalam kawu sintam weng sanipya, Yesus ayo Jerusalam talokoma no, kala-lomdip, 13 fiyaap dolin kaami kukup kaali, iyo kutal-fuku as kokonas o kebip kaami kon usaanum kon tang bapliim tap kaa fakelbi kutama Yesus ami liip fen-un-bom, naan-um-bomdip: God ami win kufolum o. Yesus ayo God Dukum ami win diim talaba kemin, God ata kukup tangbal kaata-kup kukaan-bala yo! Ayo Israel kasel numi kamokim king kela kemin, ami fiyaap don-bam win kufolum o, kemip ko.
14-15 Sawaayak God ami Sukon Tem weng kabak-ali boko-lomdu:
Abip Saiyon o, kala Jerusalam kasel kipyo, di utamin a! Kipni kamokim king ali kipni fanang talaba kemin, suunin disa yo. Ali dongki man kasaa ami daang kun diim kabaaku tiindaya talaba no,
kalsu. Kemin, Yesus ali dongki man kasaa ma kuluu-lomda, kaami daang kun diim kabaaku tiin-ilomda talaya, 16 am kaa daanaya, kukup kaa kanu-bisip kaami miit kaali, ami daang bakaalin tunum iyo bam-daa talalu ma utamin dinim ke-silip. Yale, ilom Yesus ayo asuk tam tiin-ilomda abiil tikiin unaya kawu, daang bakaalin tunum iyo asuk fuku-daa utamiwa yi, God ami Sukon Tem weng namti kanum bokosa kala, kala-somdip imi kukup kanola-silip kaami miit namti kawu utam-silip.
17 Kemin, siin kawu unang tunum iyo Yesus aso din kom tem ilomdipla atam-silip, Yesus ayo Lasarus ami naan-daala-lom ayo dafola tam tiina kala, kalbip iyo, unang tunum kayak kayak imi bakayin-bilip, 18 weng san-ilomdip utamiwa yi, Yesus ami kukup kaa akal almi kusnum kaata, kanoba kala kala-somdipya, alik iyo din kawu atamum o, kalalip unipla, 19 Falosi yakal utamipla, Alik iyo tabanip kala, kala-lomdip kulaali, boko-una-tala-ke-bam ale, bokolip: Ibi ti kaa daatamin! Numi okok kemin nolum o, kalbup uyo, kabaak banu kemin, tawaal diim kalaami unang tunum iyo alik ami daang bakaalip te! kemip ko.
Grik kasel nikil iyo tal Yesus atamum o, kalsip kiimi sang kaata ko
Mat 10:38-39, 16:24-26, Luk 9:23-26, 17:33
20 Juda unang tunum iyo Jerusalam tal God ami win kufolum o, kalalip tal bom-bilip kemin, Grik kayaak maakup maakup iso nikil maakup tal God ami win kufon-bam ale, ima im-bom ke-bilipya, 21 Grik kayaak iyo tal Provins Galili kaami abip ma Betsaida kayaak Filip ami dik-daala-lom bokolip ko: Kapyo, nikil nuli Yesus atamum o, kala tulup o, akipya, 22 kulaa Filip ayo din Andru bokolale, alep maakup yak aba din Yesus ayo bokolipya, 23 Yesus ayo bokoya-lomda: Dukum Ami Man Nami am namti kulaata mep dikiwa tulu kemin, God alalta nam-fo nam-tama tam asal kaltoop banokoma ko.
24 Nami weng faldak-tiimin weng ma kaali, fan eng tituun-kup bokoyokomi kemin, weng san bom-ilipla! Tunum ayo wiit san dikilokoma disa; tambal-kup ilokoma namti, wiit kaa ma abuulokoma disa. Kata, tunum ayo wiit san ayo dikilokoma ata, fan san ayo fal-siki-lomda taanin tap ke-lokoma. Katale, bikin-taba-lomda, lap yaapkan abuulokoma. 25 Ultap o. Tunum ali ma almi angtiil lak-kup fukun-bamdaya, nali tambal-kup tiin yakyak umbutoop tunum sawol ke-lokomi no kala namti, ali almi angtiil-kup tiin molokoma. Yale, tunum kaali, maaklo ke-lokoma. Yale, tunum kawanta tawaal diim kalawu bomda, alami angtiil kaami aket kaali, kela-lomda, nami aket kaata-kup kup-na namti, kaa tam abiil tikiin kawu suunkup suunkup ilokoma. 26 Ultap o. Tunum ayo kawanta nami okok kemin kaali, tabuulon o, kala namti, kaa nami daang bakaa-lom, dok kanolin bokon kawu ilokomi kaali, naso bomdaya, Atok ali, kaami win kaali, kufolokoma no, yaka ko.
Yesus taanokoma kaami sang bokosa kaata ko
Jon 18:32
27 Kulaa Yesus ayo boko-lomda: Nimi aket tem kaali, uluum dukum-kup kep-nu kemin, Atok ayo kanimin o, kalokomi yoko? Nami weng kuluwaa, Atok kapyo, kabi angtiil yol dukum sole, kukup mafak so, iyo mepso tilip kemin, takan-tiip-nan o, kalokomi nema? Daa! Nali utamiya, Atok alalta angtiil yol kaali, kuluulan o, kalsa kala, kala-somdiya, tawaal diim kala talsi no, kala-lom, 28 almi Aalap ami bokola-lomda: Atok kapyo, kamboyap kanop-nipla kawu, unang tunum alik iyo nitam-ilomdipla, kapni win kaali, kufup-tik o, kem-salale, abiil tikiin lo kawu weng ma boko-lomda: Sawaayak kaali, nayo kabi tam-baali daak aba-lomdap, nami okok kemin kaata, kanup-nam-balawa, unang tunum iyo nami win kaali, kufop-nambip kemin, bombii nili bokop-tiliya, kanu-mokomap ukol fanang maakup asuk nami win kaali, kufop-nokomip o kala kanum bokola. 29 Tunum unang alik Yesus ami mepso tolbip kuliiyo, weng kulaa weng san-ilomdip, malo ma iyo bokolip ko: Kaa taman fokola nema yo? kaliple, malo ma ita bokolip: Ee, ensel ami weng ema bokola no? kalalip kemip ko.
30 Yesus ayo imi weng kaa maan tiiya bokoyila ko: Weng kaa bokola weng sanip kaa, nami lak kaata disa; ipni lak kaata no, kala bokola. Kemin, 31 God ayo tawaal diim kaldaak-ami tunum unang imi kukup mafak yam-kukuba-kup, weng yim-bak-saanbi yim-bak-molokoma kemin, kulaata God ayo tawaal diim kalaami tiin molin Tunum Mafak Setaan ayo an-bak-mola yang banokoma. 32 Kemin, tawaal diim kalawu bombi. Yale, nam-fo-lom nelokomip kaami diim kulu, unang tunum alik iyo alula tildang nami miit tem talokomip o, kala ko.
33 Yesus ami aket kaali, Nimi weng kaa kanum bokoliya kawu, nitamiwa yi, Ami angtiil yol kanolin kaa kuluu-lomda, taanokoma kala nikin o, kala-lomda kanum bokola ko.
34 Unang tunum isiik ami weng kaa maan-tela bokolip ko: Numi God ami Sukon Tem kabak weng sanupla uyo boko-lomdu: God ami uldaa-dabuusa tunum o, kalbip Kraist ali suunkup ilokoma no, kalsu. Yale, kabi kanimin o, kala boko-lomdap, Dukum Ami Man ali dap-tam fo-lomdip aalip taanokoma no, kalap yoko? Dukum Ami Man kaa kawanta ni? akipla, 35 Yesus asiik bokoya-lomda: Yokon falala-kalin kaali, ipso iilfo ilanin tap ke-lokomu kemin, mepso kaa malang tinilokoma. Kemin, tunum ayo kutamiip tem unaba ayo liip kaa, talalu utam-utam unokoma disa. Kemin, falala-kalin kula iilfoba kuluwu, ibi liip kaa talalu utamdip unin o, kala-somla ko. 36 Nata-kup ipni falala-kalin ulultap kemin, nili ipso bombii kulaata, nami falala-kalin kaata, ibi iilfoyila bom-bilip. Kemin, ibi nami lak kaata duulip namti, nami man kelipya, nami falala-kalin kaata, ipni liip kaali, suunkup iilfoyila ilokoma no, kala kanum bokoyila ko.
Juda tunum yaapkan iyo Yesus ami lak ma duusip dinim kiimi sang kaata ko
Mak 4:11-12, Ap 28:26-27
Yesus ayo kanum bokoyila disa kelala, ali almi kawaala-lomda unaya, atamin dinim kelip ko.
37 Yesus ayo unang tunum imi tiin diim kawu, mafek mafek kusnum akal alik akal alik kiili, kanu-balaya, atam-silip. Yale, God ami uldaa-dabuusa tunum ali ata kala, kala-lom ami lak kaali, duusip dinim. 38 Ili kanobip kemin, sawaayak kawu, profet Aisaya ami bokola ata Sukon Tem dolsa kaali, atin ti faneng tituun-kup tiltam taba-lom, boko-lomda:
Dukum, kapyo. Kawanta numi weng kaa weng sandiwa, Awu faneng u, ma kala-silip i? Atin kaali ti dinim o. Dukum, kapni titil okok kemin akal alik akal alik kiili, kutal-fuku-bom kukuyinbap kaa, kii kawanta ma utam-silip i? Atin ti disa yo,
kalsa. 39-40 Ultap kemin, Aisaya ayo, God ata bokolala, dolsa kaali, boko-lom:
God nayo ti noyilila, iyo tiin kabiile, imi aket tem kaali, weng ayo weng san kuyak aket tem daalalup disa yo, kalsip. Kemin, ili utamin dinim kebip-kup ale, imi ban kemin kukup kaali, kulaalalip dinim. Misii fal-siki tildang God nami fanang tildang tilip, talalu-yimuli tambal kelamip dinim o,
kalsa ulultap kemin, tunum unang ili Yesus ami lak uyo duulamip dinim; kensip. 41 Sawaayak kawu, God ayo Aisaya ami kanum bokolaya, Yesus ami titil kaali, utam-ilomda ami sang kaali kanum bokosa no.
42 Unang tunum yaapkan iyo Yesus ami lak kaali, duulalip disa kelip. Kata, Juda kamok kamok yaapkan imi iipyak tem kawu kamok kamok yaapkan iyo Yesus kaa God almi uldaa-dabuusa tunum namti ata no, kala-silip. Yale, ili yawaal-daa-lomdipya kemin, imi aket fukunin kaa kala-somdipla ko: Ku-fatap-daa bakamupla, Falosi iyo lotu am kaptamu nuyo fotabam-nipya, tiltam saaklo talolup o, kala-somdipya kemin, itam-finan-daa yawaal-daalip. 43 Kaa dok ami miit kata naa kalolip: Imi aket kaali, tunum ita-kup numi win kufuyin-bamdip, fiyaap duumin kaata ti, diildiil dukum keluya, God ata taba-lomda numi win kufuyikin kaata, kabaak bansu no, kala-somdipla ko.
Yesus ami weng uta, taba-lomdu tunum imi yam-kukulokomu kaami sang kaata ko
Luk 19:10, Jon 3:17, 5:22,24, Ap 17:31
44 Yesus ayo weng dukum-kup bokoya-lomda: Tunum ayo kawanta nami lak kaa ma duula namti, kaali nami lak kaata-kup duula disa; kaa Atok nam-baala talsii ami lak so du kela no. 45 Kemin, tunum ali ma nali talalu nitama namti, ali Atok nam-baala talsii aso, atama. 46 Nali tal tawaal diim kalawaami unang tunum imi yokon dawang ultap kaata nali iilfoyinsi kemin, kawanta nami lak kaali, duulip namti, ili kutamiip tem kaa ilokomip dinim o. Nami dawang kaali, imi aket tem so, dabom tem so, kiili, iilfoyokomu no. 47 Kanolin kemin, tunum iyo ma nami weng kaali, weng sanbip. Yale, kaa weng san kutal-fuku kutama tabolup dinim o, kalokomip namti, nali kii yim-bak-saanokomi disa! Nami tawaal diim kala talsii kaa, nali unang tunum imi yam-bak-saan o, kala talsii daa; nali taldi unang tunum iyo yim-bu im-taldang daalon o, kala talsi. 48 Kemin, tunum iyo kawanta nali daang ukup-na-lomdip nami weng kaa kuyang saak tiip-nip namti, am mafiing diim daanokomu kawu, nimi weng bokoyasii kuuta, yim-bak-saanokomu te! 49 Nami weng bakayinbi kaa, nalmi aket fukunin kaata-kup bakayinbi disa; Atok nam-baala talsii alalta bokop-na-lomda: Kanum bokolan o, nakan-kaa-balaya, almi weng yaan tem kaata-kup bakan-umbi. 50 Nali utamsi, Tunum ayo kawanta Atok ami titil tabin weng kaa, weng san kutal-fuku ami lak kaali, duula namti, kaali suunkup ilin tunum ke-lokoma. Kemin, nimi weng bakabi kaa, Atok ata kanum bokolan o, ke-balaya bakabi no, kala, kanum bakayila ko.