Yesus imi aposel ko age kalaan tinum bilip imi kanumsip uta ko
Yesus iyo tam abiil tigiin unata, bii atol ulumi kup 33 umaak yak iinuta, Luk iyo suuk kon alop dola kosa kale, kamaki uyo Yesus imi kanumsa umi sang uyo dola ko-nala e minte, aaltam kota suuk kon tem weng koyo dola ko Yesus imi okumop man kanum tebesip umi sang uyo bogo no kesa ko. Kale bogo-nala e, “Unang tinum imi God imi finang unemin uyo ki, siin uyo Juda kasel imi aget fugunin uyo, God imi ulotu uyo tambaliim kup ke-bom-nulupta, bomi tem ku-tele God imi finang unum o agan-bilipta minte, Yesus iyo tal bogobe-nala e, ‘Ibo nimi ilak do-nilipta, bomi tem ku-tele meng God imi finang tilin o,’ agan kwep top ku diibe-nalata, imkaa abiil tigiin un-se ko. Kale God imi Sinik Tambal iyo tebe Yesus imi okumop man iyo titil kobelata, igil Yesus imi weng uyo kuptamo no Juda kasel Jerusalam albip isiik bogobelipta, iip maak maak iyo tolong do, aafen o age-nilipta, isiik Yesus imi weng uyo kuptamo yang Juda kasel abiip maak maak albip iyo tiine-bom baga-e-bilip e, kota iip maak maak iyo Yesus imi weng uyo kwep no tinum miit migik migik imi baga-e-bom no kemsip o,” age Luk iyo kanupmin weng boyo dola kosa ko.
1
Yesus imi weng kwep daa-nala, “God imi Sinik Tambal iyo daali ipmi finang tolon-tema o,” agesa uta ko
(Luk 1:1-4)
Tiofilus kabaa, Siin uyo Luk niyo suuk kon maak dola ko-sii uyo ki, kamaki Yesus imi kanumin kanumin kanu-bom-nala minte, kafale-bom no ke-bii kupkala God iyo tebe dep tam abiil tigiin un-se umi sang uta dola kobe-sii kale, dep tam unin-tem som-nalata, God imi Sinik Tambal tebe Yesus iyo dong dogopmata, weng uyo ilami kalaan tinum ulu-se bilip imi kobe bogobelata bole, God tebe dep tam un-se kale, kamano kota komi sang uyo suuk kon maak uyo dola kopkelan o agan-bii ko. Kale Yesus iyo angkolip kaan-nala e, asok fen tigi mo-nalata, ilami kalaan tinum imi diim uyo kemanata, atamipta e, fen tuluun tigi moba kalaa age atama atama kemsip kale, bilip imi diim kemanata, atama-bilipta, God imi unang tinum imdep mitam ilami daam tem daa tiin molan-tema umi sang uyo baga-e-balata bii, am ulumi kup 40 kota dakan ke-nala e, Yesus iyo no ilami kalaan tinum itama isino bom-nilip e, bogobe-nala e, “Ibo Jerusalam uyo kupkaa keng keng ke-nimip kale, kugol bom-bilipta, ipmi bogobe-nili, ‘Aatum ilami Sinik Tambal iyo daala tolon-tema o,’ age-sii uyo fen-bom bom-silipta o ageta ko. Kale Jon beele unang tinum iyo fen ok sam uta kup uga-e-bii-se kale, nile am iip maak maak ita kup dakan ke-nilita, God imi Sinik Tambal ita daali tal-nalata, ita tebe ipmi iibak tem uyo telela kobelata, ibo alugum tambalanan-temip o,” age-se ko.
Yesus imi God tebe dep tam abiil tigiin unsa uta ko
Mak 16:19-20, Luk 24:50-53, (Mat 28:19, Luk 19:11, 24:4,21)
Kale Yesus imi kalaan tinum iyo tala tala ke-nilip e, Yesus iyo daga-nilip e, “Kamogim kabaa. Waasi iyo tebe numi kafin koyo waafusip kale, kota kabo tal-nalap Israel kasel numi kafin uyo ulaa ku Israel kasel nulumi kobelapta, nugol numi siin kanumsup ulutap ke asok tiin molan-temup bele ki?” agan-kalip e minte, Yesus isiik bogo-nala e, “Aatum ilami aget uta kup fugun-nuuba kale, yagal utamata, dogonupmin diim kota boyo kanuman-temi kalaa agesa kale, ibo boyo dok kota kanuman-tema kalaa age utaman-temaalip kale, boyo ipmi mufekmufek ba kale, ipmi mufekmufek uyo ki, suuk nala God imi Sinik Tambal tal ilipmi diim abela ipso nan-temip uyo, titil fagalan-temip kale, kota ibo no abiip Jerusalam une-bala, alugum Provins Yuudiya une-bala, unanbu yang Provins Samaria une-bala, alugum kafin kaa kutufosu koyo une-bala une-bala ke-nilipta, ipmi nita-bilip kanumin kanumin kanum-nuubi umi sang uyo baga-em tam tam tiineman-temip o,” agan-kala ko.
Kale bomi sang uyo baga-e-bala bom atamamip e, God tebe dugola dufo dep tam una e, iip tebe dubalu e, atamin-tem kelip ko. 10 Kale imi ilep kiit e abeba uyo kiit fenin kup ke-bilipta minte, mep boyo tinum ilim namaal so alop maak tal mep miit tem ko mo 11 bogobe-nilip e, “Galili tinum ibaa. Intaben o ageta suun kup bomta, abiil tigiin uyo kiit fenin kup albip a? Yesus ko imkala God tebe dep tam abiil tigiin una beyo biiluta, kanube atamip tam una kulutap, asok malaak talata, ibo ataman-temip kale, kupka-nilip unin o,” agelip ko.
Tinum maak ulaa dulip Judas imi baan diim uyo uksusa uta ko
(Jon 17:12)
12 Kale amdu tigiin ko mobip boyo Oliv Tigiin o agan-nuubip kale, boyo Jerusalam umi mep so kal albu kale, bomi ilep uyo ki God imi ifin am daanu Juda tinum ilimi kuguup ilep duumaat unemin ulutap kale, tinum alop imi imkaa unip uyo, Yesus imi kalaan tinum iyo Oliv Tigiin uyo kupka-nilip e, 13 dagaa dep no Jerusalam abe-nilip e, tam ilimi abiin maak am dong tem kwiit kal sinan-nuubip uyo tam unip kale, tam Fita, Jon, Jems, Andru, Filip, Tomas, Batolomyu, Matyu, Alfius imi man Jems, Rom kasel itafinonin tinum Saimon, asegim Jems imi man Judas no ninggil iyo tam unip kale, 14 isino, unang bilip iso, Yesus ogen Maria so, Yesus ilami nagalal ninggil bilip iso alugum bilip imi aget fugunip uyo maagup ke-bom-nilip e, dital fagaa God iyo aman duga-emin kup kemip ko.
15 Kale am asuno umaak kelip binimanu e, kota tala tala kelip bilip iyo 120 min kalip ita kale, Fita ita iibak tem kal mo weng bogobe-nala e, 16 “Nugumal ibaa. Tinangku-silipta. Sugamiyok uyo God imi Sinik Tambal iyo tebe King Devit imi bogobe-nala e, ‘Son-temu nala tinum maak tebe bota kanubelan-tema o,’ agelata, Devit ita kwep yak suuk kon tem dola kosa kale, kamano koyo Keriot kayaak Judas iyo tebe tinum bilip iyo ilep kafalepma no Yesus iyo aafuu de do-silip kale, boyo Devit imi weng uyo fen tol mitam ti-suu ko. 17 Kale beyo Yesus yagal ulaa dep mek kum kal numi iibak tem daa-nalata, ogok koyo numi togobe-nala e minte, begal mungkup kobe no ke-se o,” age-se ko.
18 Kale Judas bemi fuut taban-bii kupka-se umi tisol kobe-silip uyo asok ku-nilipta, kafin atuk maak mo-silip kale, bemi kaan-se boyo ki, ol ban isin kumen malaak kafin diim abe-nalata, mat bigin-nalata, alugum imi ol mat tem kwek uyo bigin mitam abe-suu kale, 19 alugum Jerusalam kasel iyo bomi sang tinangku-nilip e, kafin atuk komi win uyo Akeldama ko age isak diim bagan o age ilimi weng uyo kam agan-nuubip ko.
20 Kale Fita iyo Judas imi sang uyo maak so bogo-nala e, “Minte Devit iyo aseng maak Juda kasel imi aseng umi suuk kon tem kal dola ko bogo-nala e,
‘Tinum iyo maak bemi am kutam uyo nin ba kale, uyo fegel fegel tebeluk o,’
age-nala e minte,
‘Tinum migik iyo maak bemi baan uksu-nalata, ogok kemak o,’
age Judas imi sang uyo siin sugayok bogosa ko.
21-22 “Kale Kamogim Yesus iyo nuso bom-nulup te te nuubup uyo ki, kamaki Jon tebe unang tinum imi ok sam uga-emsa uyo, tinum maak bilip iyo suun nuso nuubup nala talanbu tal kaa diibelupta, Yesus iyo tebe nuyo tagaa imkalata, asok God tebe Yesus iyo duptamo tam un-se kale, kota maak tinum maagup iyo maak ulaa dulupta, mitam-nalata, Judas imi baan uyo uksulata, nuso ogok ke-bom-nulupta, Kamogim Yesus fen tigi mo-se umi sang uyo unang tinum imi baga-emum o,” age Fita ita baga-ema ko.
23 Kale kanupmin tinum alop maak imi win uyo kufobelip kale, tam maak iyo Josep kale minte, ilami win maak alop uyo Basabas, Jastus no, ilami win asuno kale, yagal e minte, maak ita Matias no kale, 24-25 God imi aman duga-e-bom bogo-nilip e, “Bisel kabaa. Judas iyo yang iinom-nalata, kaanata, kabo tebe daalap abiip mafak un-se kale, kabo alugum tinum bilip imi aget tem uyo utamsap kale, kabo tinum iyo maak siin ulaa du-nalap e, beyo Judas imi baan diim uyo uksu-nalata, nimi kalaan tinum ke-nalata, ogok boyo keman-tema o age ulaa du-salap umdii, kota kafalepmap utamupta e, tinum alop kalip iyo maak beta kalaa age atamum o,” age-nilip e, 26 tuum kangkang uyo kulu binolip iit o malaak o ke-bomta e, Matias ita kalaa age-nilip e bole, Matias iyo dep mek Yesus imi kalaan tinum imi iibak tem daalip tuluun kal ke-silip ko.