Fol imi Efesis kasel imi suuk kon dola kobesa uta ko
Yesus iyo tam abiil tigiin unata, bii atol ulumi kup 32 kota binimanuta, Fol iyo suuk kon tem weng koyo Efesis kasel Kristen unang tinum imi dola kobe-nala e, imi duup Tikikus imi kobelata, kwep no kobesa ko. Fol iyo Yesus imi weng uyo kwep no abiip maak maak uyo baga-em tiine-balata, tinum Kristen kelin-tem kesip iyo tebe Fol iyo sok de do dep unanbu no abiip Rom umi kalabus am kutam daalip bom-nalata, suuk kon tem weng koyo dola ko Efesis kasel imi kwaapma unsu ko. Kale Fol iyo bogobe-nala e, “Yesus iyo God yagal ulaa dusa kale, beyo unang tinum imi ilim bo-emin tinum kale minte, beyo yagal alugum mufekmufek boyo tiin mola tambaliim albu ko. Kale ibo Yesus imi weng koyo tele utam-nilip e, ipsiik weng kuptamo yang abiip maak maak iyo baga-e-bilipta o,” ageta dola kobesa ko.
1
1 Nugumal nuubip aga? Niyo Yesus Krais imi kalaan tinum Fol nita kale, God ilami aget fugunin uta ulaa nimdulata, mitam Krais imi kalaan tinum kesi nita suuk kon koyo God ilami unang tinum abiip Efesis ko bom Yesus Krais imi ilak kup do-nilip yang iinemin binim ipmi dola kobelan o agan-bii kale, 2 niyo dagaga-bilita, numi Aatum God so minte Kamogim Yesus Krais so ulim iyo tebe ibo telele-bilip ipmi aget tem uyo bilili age bom-nilipta o ageta ko.
Aatum God tebe Yesus imi sagaal diim ilep alugum kanumin kanumin tambal kupka-em-nuuba uta ko
(Ef 2:11-22, Fpai 3:1-11, Kol 1:26-28, 2:6-15, 1 Jon 2:3-6, 4:13-15)
3 God iyo numi Kamogim Yesus Krais imi God e minte imi Aalap no kale, God beyo Krais imi sagaal diim ilep ilami mufekmufek tambal uyo alugum kobela numi aget fugunin uyo dong daga-em-nuubu kalaa age-nulupta, God imi win kufu-bom imi tok bagamum o ageta ko. 4 God iyo kafin koyo telela kolin-tem som-nalata, nuyo ulaa imdu-nala e, bilip iyo Krais imi ilak uyo do-nilipta, nimi tiin diim uyo atin tol kup bom-nilipta, yuum binim nin o age-nalata, nuyo ulaa imdusa ko. 5 Siin sugamiyok uyo God iyo numi aget uyo kobe-nalata, imi aget uyo, Yesus Krais iyo daali no kaanata, bilip iyo imi ilak uyo dolipta, niyo imdep mitam nimi man kepnelip imkalan o agesa kale, boyo ki God ilami san kanubelan o agesa kale, 6 God iyo ilami Man bemi aget kup ugaa kwaasa kuta, nuyo atin i-filin daa-nalata, ilami Man iyo misiim daala tal telela imo-se kale, atin ki God imi kanube-se bota, nuyo, God imi win uyo kufu-bom imi tok uyo baga-bom-nulupta o ageta ko.
7-8 God imi numi i-filin daa dong daga-emin uyo ki, kwiin kiim kobe-nalata, Yesus Krais imi kaana imi isak singkam daa-suu uta, God iyo numi fengmin uyo kupkan kebe-nalata, numi ilim uyo bobe-nala e minte, kanumin kanumin dagaa ku bam dagamin uyo kobe no ke-se kale, boyo imi i-filinin uyo atin kwiin kiimen kwaala tal numi diim abe-suu kuba. 9 Sugamiyok uyo God iyo, “Nimi Man Krais iyo dong dogopnelata, boyo kanubelan-temi o,” age-nalata, aget fuguno-nalata, waafula suuta, ilami san kale, imi aget fugunin yang waansu uyo numi diim kupkem daabela utam-sulup kale, 10 God imi aget fugunin uyo ki, “Mufekmufek alugum uyo du mo abe-bilita, nimi Man imi kobelan-temi kalaa agesi uyo mitam tulu kalaa age-nilita, kota abiil tigiin umi mufekmufek so kafin diim umi mufekmufek so unang tinum so uyo alugum nimi Man imi diim kal fagalita, yagal kamok ke tiin molan-tema o,” agesata, kupkem daa-se ko.
11 Kale kamaki sugamiyok uyo God ilami aget fugunin uta nuyo ulusata kale, kota nuyo Krais imi diim kal febalupta, bota God iyo tebe telela imolata, ilami tinum unang kebe-sulup ko. Tuluun kale, God iyo intap intap aget fuguno, bota kanubelan-temi kalaa agelan-tema uyo, mungkup uyo telela kola mitam felep unan-nuubu ko. 12 Kale kamaki Juda kasel nusiik God imi weng kwep daa-nala, “Nimi ulaa duli kamok kesa tinum Krais iyo daapmi no tolon-tema o,” agesa imi fen tebesup kale, God win tibin imi tok uyo bagamum o ageta ko.
13 Kale Efesis kasel ibo Juda kasel ba kale, ibo tinum miit maak kale, ipkil mungkup God imi tuluun weng tambal uyo tinangku-silip kale, umi ki God imi tebe ipmi ilim bobelan-tema umi sang uyo bogobelup ibo tinangku-nilipta, Krais imi ilak uyo do-nilipta, imi diim kal tebesip kale, God iyo, ilami Sinik Tambal iyo unang tinum iyo dobelan-temi o age weng kwep daasata, ilami Sinik ita ibo dobe-nalata, faal fagak kolin tap ke-se kale, 14 kapkum mufekmufek imiin kobelap son-temu nala atin alugum kobelap isiik mufekmufek yan ke kupkakeba ulutap kale, God imi Sinik numi dobe-se beyo imiin kale, Sinik iyo kafalebelata, utamupta e, God imi weng kwep ku daa-nala, “Kanubelan-temi o,” agesa uyo atin kup kulan-temup kalaa agesup kale, boyo utamupta e, nuyo waantap ita God imi unang tinum kebup umdii, God iyo numi sok talaa imdalata, iluum binim kelan-temup kalaa age atin utamsup kale, God win tibin imi tok uyo bagamum o ageta ko.
Fol imi beten weng uta ko
(Fpai 2:9-10, Kol 1:4-11,18, 2:15, Hib 1:3,13)
15-16 Niyo tinangkulita e, “Ibo Kamogim Yesus imi ilak kup atin do-nilip e, God imi unang tinum imi aget kup do no kesip o,” agelip kalaa age tinangku-nilita, God imi alugum kanum tebesa uta, niyo ibo im-kagan-nuubaali kale, ipmi aget kup ugel kala-bom-nilita, suun kup God iyo, “Misam o,” agan tebesi kale, kanube niyo ki suun kup ipmi aget uta fugun-bom-nilita, beten kem tebesi ko. 17 Kale numi Kamogim Yesus Krais imi God iyo numi Aalap abiil tigiin kayaak iyo kulba kale, niyo aman duga-e-bilita, aget fugunin tambal uyo ibo kupka-e-bom-nala e, imi weng magam uyo ipmi diim kal kupkem daga-e-bom no kelata, God iyo kulba kalaa age tele atamin o age-nilita, aman duga-em-nuubi kale, 18 nimi beten uyo God iyo ipmi aget fugunin uyo telela kobelata, atin tele utamipta e, God tebe numi olabela imi ilak dolup bogo-nala, “Kanubelan-temi bomi uyo fen-bilipta o,” agesa bomi magam uyo kulbu kalaa age-nilip e minte, ibo utamipta e, God imi weng kwep daa bogo-nala, “Nimi unang tinum ibo dong daga-e-bilita, nisino tambaliim nan-temip o,” agesa boyo atin mufekmufek tambal kalaa age-nilip e minte, 19 ibo utamipta e, imi titil kiim ku God imi ilak dosup numi dong daga-em tebesa bota dogobeta utam-numup binim kalaa agelin o age-nilita, aman duga-em-nuubi ko. Kale kanupmin titil kiim ko God imi ku-nala ilata te yak numi iibak tem ogok ke-boma boyo, 20 imi titil ku-nala siin Krais imi kaana uyo dufo dep no abiil tigiin daala God ilami sagaal ipkuk diim tonsa uyo kulbu ko. 21 Kale sinik mafak mafak sino minte sinik tambal tambal sino bilip iyo Krais tebe alugum imdaak tama tam iinsa e minte, tinum kamok kamok win so iyo imdaak tama iit katop kal alba no kale, kaa so son-temu so uyo imi win uyo suun kup iit kutop kal bon-temu ko. 22 Kale God iyo abiil so kafin so unang tinum so alugum mufekmufek so uyo kulupma yak Krais ilami diim abelu dupka-nala e, God iyo Krais yagal dep daalata, atin Kristen numi dubom ke-bom-nala tiin mo tebesa ko. 23 Kristen unang tinum nuyo Krais imi dam ulutap kale, Krais iyo abiip so sep so abiil tigiin so uyo alugum bugu ton-bom-nala e, alugum tiin mo-bom no kem-nuuba kale, ulutap kale, iyo Kristen unang tinum numi iibak tem kal bom-nala e, fomtuup dong dogobe tiin mo-bom no kem-nuuba ko.