1 Moses bóktanórr Isrrael pamkolpamdó wagó, “Lod yabü God, yabü sab nóma imarrue ene tüpdü, e nóla tótókdakla ene tüp apadóm, wa sab abün bwób pamkolpam kolanütanórre yabü obzekdógab. Ibü ngi módógako: Et, Girrgas, Amorr, Keinan, Perris, Ibae, akó Zebus pamkolpam. I abün pamkolpamako akó wirri arüngako yabükagab.Apostolab Tórrmen 13:19 2 Sab Lod yabü God yabü tangdó nóma irrbüne akó e sab memokan ut-ut ninane, e ibü wata metatómpükü ekrrónane. Da sab usakü bóktan tómbapón-gu gómdamal bangunüm, akó gyaur basen-gu. 3 E sab inkü kol gyabalómgu. E yabiób ópal olmal ibü simanal olmal alión-gu, akó ibü simanal olmal azebgu yabiób ópal olmalabkü. 4 Zitülkus módóga, yabü simanal olmala sab obzek kena nalüngnüm kürü mamoan-gum, ama sab ngibürr god ⌊ótókóm⌋. E ini tonarr nóma tónggapónane, Lodón ngürsila sab tame urzan pabzaum yabü büsai kolae bainüm. 5 A e sab ibü inzan nangónamke: e sab ibü ⌊alta⌋ kolae ninamke akó ibü gyabi tolom nómkenamke da baem napónamke. Ibü god Asyerran gyabi talkum singgalgónamke akó ibü tómbapórrón obae godón dandang uri angónamke. 6 Ini kla tómbapónamke, zitülkus e Lodón pamkolpamakla, tibi-tibi amórrón tóbankü. Lod yabü God yabü ilianórr blaman pamkolpamdógab ini tüpdü, tóba kolpamóm bainüm.

7 “Lodón ⌊moboküpdü ubi⌋ yabüka we zitülkusdü koke yarilürr akó wa yabü we zitülkusdü koke ilianórr, igó e abün koralnórró ngibürr pamkolpamdógab. Koke, e go aüdan kwarilnürrü ini dudu tüpdü! 8 A Lodón moboküpdü ubi yabüka yarilürr akó wa zürük emoanórr wa ne ⌊arüng alkamül-koke bóktan⌋ ingrinürr yabü abalbobataldó. We zitülkusdü, wa yabü we yusürr tóba arüng tange akó ⌊aurdü we amanórr⌋ ⌊leba zaget⌋ bwóbdügab, ene wa parraoan tangdógab, Izipt king. 9 We ngarkwatódó, e umulakla igó, Lod yabü God, wata darrpan God watóke. Wa ngambangól Goda. Wa tóba ⌊alkamül-koke tónggapórrón bóktan⌋ metat mamoanda akó oya morroal tonarr asine ibüka, nibiób moboküpdü ubi oyakama akó oya gida bóktan poko nidi mamoandako. 10 A oya nidi alzizi amaikdako, sab ibü obzekdó ⌊kolaean darrem⌋ sidüde. Ene kolaean darrem igósa, wa ibü kolae nirre. Wa sab wirri ngarkwat-koke ipüde darrü oloman obzek kwata darrem alkomólóm, oya nótó alzizi amaikda. 11 Da módóga, oya gida bóktan poko morroal mumyamónlamke, ka ini ngürrdü ne wirri bóktan akó gida alióndóla.”