20
10 Gida Bóktan Poko
(Duterronomi 5:1-21)
God bóktanórr blaman ini bóktan opor wagó,
“Ka ⌊Lodla⌋, yabü God, yabü nótó simarrurrü Iziptgab, e ⌊leba zaget⌋ nóla tómbapónarre.
“Ma myamem darrü god ⌊ótókgu⌋, a wata kótó.
“Ma darrü dandang tónggapón-gu mobankü, ia kla pülpüldü, tüpdü, ó aumana naedó, tüp lorodó. Singül tüp alókgu darrü dandangdó ó ótókgu ene kla, zitülkus ka Lodla, yabü God, akó ka gyagüp kolaea amkal Godla. Ka ibü olmalbobatal ⌊kolaean darrem⌋ alióndóla, kürü nibiób abala alzizi amanikdako, tai ibü olmaldógab kókó aüd ó tokom lüól olmalbobataldó, ibü abalab kolae tonarranme. A ka kólba morroal tonarr okaka amzazildóla atang-koke olmalbobataldó, nibiób ⌊moboküpdü ubi⌋ kürükama akó kürü gida bóktan poko nidi mamoandako.
“Ma kürü ngi zitül-koke pokodó ngilian-gu. Ka Lodla, marü God, ka sab darrü olom kolaean darrem ekyeno, kürü ngi zitül-koke pokodó ngiliande.
“⌊Sabad⌋ ngürr gyagüpi amaniklónke. Ma kürü gyabi ngürr ótók namülünke. Marü wata 6 ngürrako, ma ne ngürrdi zaget namulo, 10 a 7 ngim ngürr wata ngón agón ngürra, ene wa Lodón ngürre, marü God nótóke. Ene ngürrdü darrü oloma zaget koke tónggapóne, mató, marü siman olom, marü óp olom, marü leba zaget pam akó kol, marü ngabyón lar, akó darrü mogob oloma nótó ngyabenda marü bwóbdü. 11 6 Ngürr kugupidü, kótó, Lod nótókla, tómbapórró tüp, pülpül, malu, akó blaman ne elklazako ibü kugupidü. A ka Sabad ngürrdü ngón agórró. Da ene ngürr ka, Lod nótókla, we zitülkusdü bles yórrü akó tebe-tebe amanikürrü.
12 “Ma moba aipab nis morroal angón namülün; igósüm ma sab wirri kokrrap ngyabelo ini tüpdü, ka Lod, marü God nótókla, ne tüp akyanóm kaindóla.
13 “Ma darrü olom büdülümpükü amkalgu.
14 “Ma kol ó pam gómólgu.
15 “Ma gómólgu.
16 “Ma obae tiz bóktane darrü olom kulain-gu.
17 “Marü ubi darrü oloman müótüdü babul ki yarilün. Marü ubi ta babul ki yarilün oya koldó, oya leba zaget pam akó koldó, oya ⌊kau⌋ ó ⌊donkidü⌋, akó darrü klamdó oya ne klame.”