Isrrael Pamkolpam Bótang Peba
21:4-9
21
Brronze Tónggapórrón Gwar
Isrrael pamkolpama Orr podo amgütóp, we ogoblórr Óe-óe Maludübóna, Idom kantrri kórzyónüm. Da módóga, pamkolpam genggorrama yazebórr kwat-kwat. Da i wirri taem we inóp. I dakla Godka bóktan aman koralórr, dakla Moseska wagó, “Ia e kibü Iziptgabi iade syusürri ini ⌊ngüin-koke bwóbdü⌋ nurrbarinüm? Aini alo kla babul akó nae ta babul, a kibü genggorrama kuri sazebe ini kolae alo kla alode!”
Da ⌊Lod⌋ büdül tarük balóng gwar ibüka we zirrtapónóp. I Isrrael pamkolpam nólóngnóp, da abüna igósidi nurrbarinónóp. Módóga, pamkolpama Moseska we togobórr da oyaka we bóktónóp wagó, “Ki kolae tonarr tónggapórre, ne bóktan amórre Lodka akó marüka. Gyaurka, ma kya tóre eko, kubó Lod ini gwar ia zirrnapórre kibükagab.” Da Moses ene pamkolpamabkü tóre we ekorr. Lod Moseska we bóktanórr wagó, “Balóng Gwar tónggapó brronze, da kokrrapan nugup pokodó errgóta, da nibiób nólóngórre, kubó ki ngakónónóm. I sab igósidi ngyaberre.” Da Moses brronze gwar we tónggapónórr, da we emngyelórr nugup pokodó. Gwara nibiób nólóngórre, da nóma yazilóp brronze tónggapórrón gwardó, i dólóng bainóp.