1 Ol manmeri i save spak, ol i no inap long kisim planti samting. Na ol manmeri i no save wari long ol liklik samting, wok bilong ol bai i no inap kamap gut. Nogat. Em bai i go bagarap olgeta. 2 Ol meri na strongpela dring i ken paulim ol man i gat save. Na man i prenim ol pamukmeri, em bai i mekim ol kain kain longlong pasin. 3 Dispela kain pasin bai i bagarapim em olgeta. Na taim em i dai, ol liklik snek na binatang bai i lukautim em.

4 Ol manmeri i bilipim tumas tok bilong ol arapela, tingting bilong ol i kranki liklik. Sapos yu mekim sin, orait bai yu bagarapim yu yet. 5 Sapos yu amamas long pasin nogut, orait bai Bikpela i kotim yu.

6 Sapos yu no mekim tok stil, orait bai yu no ken kisim bikpela bagarap. 7 Yu harim wanpela tok, orait yu no ken autim long narapela man. Na bai yu no gat wari olgeta. 8 Tru tumas, yu no ken autim long wanpela man, maski em i pren o em i birua. Tasol sapos dispela tok i pulim yu long mekim sin, orait mobeta yu autim. 9 Sapos yu autim tok stil, orait lukaut. Nogut wanpela man i harim na i lukim yu. Bai em i wetim taim bilong bagarapim yu. 10 Sapos yu harim wanpela tok stil, orait em i mas i dai insait long yu yet. Sanap strong. Sapos yu no autim dispela tok, em i no inap long bagarapim yu. 11 Wanpela meri i laik karim pikinini, bai i pilim bikpela pen. Krankiman em i wankain, long wanem, em i wari tumas long tok em i bin harim. 12 Dispela tok i pas tru insait long em olsem spia i pas long lek bilong man.

13 Sapos ol manmeri i tok stil long pren bilong yu i bin mekim rong, orait mobeta yu yet yu askim em pastaim. Ating dispela tok i no tru. Tasol sapos pren bilong yu i bin mekim wanpela rong, bai em i save nau, em i no ken mekim gen. 14 Askim wantok bilong yu. Ating em i bin autim wanpela toktok stil, o nogat? Sapos em i bin autim, bai em i save nau, em i no ken mekim gen. 15 Askim pren bilong yu long ol toktok stil ol manmeri i bin sutim long em. Long wanem, planti taim ol i giaman tasol. Olsem na yu no ken bilipim olgeta tok yu harim. 16 Sampela taim, ol manmeri i no tingting gut pastaim na ol i stori nabaut. Husat i no save mekim olsem? 17-19 Sapos yu laik kros long wantok bilong yu, orait mobeta yu toktok wantaim em pastaim. Na larim kot bilong Bikpela Antap Tru i stretim em.*Sampela olpela buk bilong bipo tru i gat narapela hap tok tu i stap long dispela lain. Dispela tok i olsem, “Yu harim tok bilong Bikpela na bai em i lukautim yu. Na bai em i laikim yu, sapos yu gat gutpela tingting. Kisim gutpela save long ol lo bilong Bikpela. Sapos yu skul gut long ol, bai yu kisim laip tru. Ol manmeri i save bihainim laik bilong Bikpela ol i amamas long kisim gutpela kaikai. Em i kaikai bilong diwai i save givim laip bilong i stap oltaim.”

20-21 Ol manmeri i harim tok bilong Bikpela na i bihainim ol lo bilong em, ol tasol i gat gutpela tingting.†Sampela olpela buk bilong bipo tru i gat narapela hap tok tu i stap long dispela lain. Dispela tok i olsem, “Sapos wokman i no laik harim tok bilong bos bilong em, bai bos i kros long em. Na sapos wokman i senisim tingting bilong em, maski, kros bilong bos bai i stap yet.” 22 Sapos ol manmeri i gat save long mekim ol kain kain pasin nogut, dispela save i no helpim ol long kisim gutpela tingting. Bihainim tingting bilong ol manmeri bilong mekim sin, em i no gutpela samting. 23 Sapos ol manmeri i gat sampela gutpela tingting, tasol ol i mekim pasin i no stret, ol i manmeri nogut tru. Na ol manmeri i bihainim krankipasin, ol i no gat stretpela tingting. 24 Ol manmeri i no gat bikpela save, tasol ol i harim tok bilong Bikpela, ol i winim saveman i brukim lo bilong Bikpela. 25 Sampela manmeri i gat gutpela tingting, tasol pasin bilong ol i no stret. Na sampela manmeri i wok long mekim olkain tok gris bilong winim kot bilong ol.

26 Sampela manmeri nogut ol i no save sori tru. Ol i giaman tasol. Ol i tingting long trikim yu tasol. 27 Ol i tanim het, na yu bai ting ol i no bin harim yu. Na sapos yu no was gut, bai ol i paulim yu bilong winim yu. 28 Sapos nau ol i no inap long mekim sin, orait tumora bai ol i painim rot bilong mekim pasin nogut. 29 Yu skelim gut ol manmeri, na bai yu save, ol i wanem kain manmeri. Taim yu bungim wanpela man o meri, orait lukluk gut long em, bai yu ken save em i gat gutpela tingting, o nogat. 30 Yu laik save em i wanem kain man o meri, orait yu lukluk gut long em i save bilas na lap na wokabaut olsem wanem.