1 Yoni
Leta bagubagunana Yoni ilele
Walo bagubagunana
Leta bwaite kana tolele iya Yoni, Sebedi natuna. Iya Yeisu ana apositolo yabo yo iya tabe buki Yoni, Yeisu wasana namwanamwana, kana tolele. Yoni leta bwaite ilele kaiwena toyakayakatai mwakomwakotali tupwaliyao siyaele ekalesiya kalona mena. Siya siba yakato yanuwa yaulina gogona sowasowana takabi-tonan siya simiyamiya naenaena ana dedei koina, na yaluyaluwa gogona bwaimwana nige sowana takabi-tonan siya simiyamiya namwanamwana ana dedei koina. Mwa siba Yeisu iya uloina na Mesaiya iya uloina. Siba Yeisu iya tomo molosi yo iya yanuwa yaulina gogona iya imiyamiya naenaena ana dedei koina. Yo siba Mesaiya iya yaluyaluwa yo iya yaluyaluwa gogona iya imiyamiya namwanamwana ana dedei koina. Yo tabe siwalo siba Mesaiya iya ilaomaya Yaubada koina yo ilusae yo imiya tomo Yeisu koina. Yo tabe siwalo siba Yeisu iya nige Yaubada Natuna besi, besiele Yeisu iya nige Mesaiya.
Bwaite siya nuwatuliyaone kaiweli mwa Yoni leta bwaite ilele yo toekalesiyao ikabi-yakaiweli yakayakatai bagubagunana kaba yatubu koina sibebenalanwa sowasowana iya sikabikalatan (besiele 2:24). Yo iba Yeisu iya Mesaiya, Yaubada Natuna, iya ilobima yanuwa yaulina mena iyamala tomo (2:22, 4:2, 4:14-15, 5:1-6).
Toyakayakatai mwakomwakotaliyao tupwali siba Yeisu ana babitaiso koina Yaluyaluwa Mesaiya ilobima imiya tomo Yeisu koina, yo yakato Yaluyaluwa Mesaiya tomo Yeisu ilogabaen muli mena kabo iboita. Mwa Peina 5 tomna 6 Yoni ali nuwatu iwalo-yadudulai iba, “Yeisu Keliso iya tomo yawasosi ibabitaiso yo ana paisowa iginauli ilau kanasiga iboita. Iya ibomamo yona yawasosi mena iboita ala pwanoli maisana.”
Toyakayakatai mwakomwakotali siwaloyoi siba tawae taginaginauline nige kana nuwanuwatu ilalau yaluyaluwa kana lebo koina, kaiwena ginauline tagiginauline yanuwa yaulina gogona na lebo iya yaluyaluwa gogona.
Na Yoni toekalesiyao ikabiyakaiweli tabu lopwano kamwasana sigiginauli (besiele 2:1, 3:7-8), na Yaubada ana loina sisanapuwagili (2:3-4). Yaboyoi toyakayakatai mwakomwakotali siwalo yakato siya ali katai wadawadamna yabo iyaele imiyamiya yo iya kataine koina ipei-suwalagili ali tali Kelisitiyani meuloili kolili. Kabo siya sikalomagigili tomeliwo uloili kolili. Mwa nuwatu yabo lalakina Yoni ilele leta bwaite kalona mena siya tomeliwo kalikavao yo duliyao kolili siemulomulolo-wagili (besiele 3:14, 4:20-21).
1
Walone iya yawasila iyeyama bwaimwa Yeisu
1 Walone iya yawasila iyeyama iya kaiwena kaluwewasayan kolimiu. Muli mena kabo ginauli meuloili situbu na iya iyaele imiyamiya. Iyamo kai kainana kabenalan yo kagitai manimai mena yo kamankulakulai yo kakabitonan nimamai mena. 2 Tomonane iya yawasila iyeyama iyawatagilimako. Yo yawasine miyamiya yainane iyamo koina kagitai mwa koinaele kayawayawasayan yo kaguguyeyan kolimiu. Yo beyabeyana Tamana mekanakava simiyamiya kabo muli mena imayale kolimai. 3 Tomone iya kagitai yo kainana kabenalan iya mwa kaluwewasayan kolimiu, kaiwena nuwanuwamai mekamakavao komiu takawa-elieliyam kaigeda besiele kai kakawa-elieliyam-wan Tamana yo Natuna Yeisu Keliso. 4 Kabo leta bwaite kalele ilaowa kolimiu kaiwena nuwanuwamai mekamakavao komiu yaliyaya mena takalapowon.
Mayale mena talokeikeile
5 Wasa bwaitete kabenalan iya Yeisu Keliso koina yo kaluwewasayan kolimiu bwaite besiele. Yaubada iya mayale yo nige boniboniyai yabo imimiya koina. 6 Mwa koinaele tem tomo ali wasa taolegili yakato Yaubada mekalakava takawa-elieliyam na iyamo tem talokeikeile boniboniyai mena kabo ala paisowane yo mumugalane kolili kitamo tomwakota. 7 Na tem talokeikeile mayale mena besiele iya iyaele mayale mena, kabo mekalakavao takelabilabin na Natuna Yeisu kwasinena mena ala pwanoli meuloili ideuli-gabaegili. 8 Tem tawaloba, “Nige yagu pwanoli imiyamiya”, bwaimwana tabomayoi tamwakota-yagila yo nige walo yawasosi imiyamiya kolila. 9 Na iyamo tem ala pwanoli tawalo-masalan Yaubada koina kani ala pwanoli inuwatu-pwaikili yo mumugala naenaena meuloina ideuli-gabaegili yo tawaluwaluyoi. Kaiwena iya mumugana idudulaisosi yo sowana kana meli tapei. 10 Tem tawaloba, “Nige yagu pwanoli yabo”, kita Yaubada takawa-mwakomwakota-yan yo ana walo Buki Tabu mena nige takakalai katela mena tapepei.