Agai
ana lelelele
Walo bagubagunana
Tomo Isileli sipileyoimako Babilon koina yo simiyamiya Yelusalema koina. Ali nume sikabiliko na iyamo Nume Tabu nigele, nige sikakabiyoi. Mwa Yeoba Yaubada iwalo palopita Agai gamwana mena na tomo ikabi-yakaiweli tem Nume Tabune sikabiyoi.
1
Yaubada iwalo tomo Nume Tabu sikabiyoi
Kin Daliyasi ana sauga kin bolime labuina kalona mena iloiloina, waikena sikisi (6) na kaliyate bagubagunana koina Yaubada iwalo yau Agai gamwagu mena. Mwa Yaubada ana walo yawalowen Yudiya ali gavana Selubabeli, iya Siyalitieli natuna, yo topwaoli lalakina Yosuwa, iya Yeosidaki natuna, kolili. 2-5 Yawalo bwaite besiele yaba, “Yaubada Tomiyasaesosi iwaloba, ‘Bwagana tomo siwalo yakato sauga bwaite nige sauga namwanamwana yagu nume sikabi, na yau yaneli, Yakato yagu nume imiya-tata-gwaligwali na komiu kwamiyamiya nume namwanamwali kolili? Kwanuwatu namwanamwa mumugamiu kaiwena.’ 6-7 Like ilalaki wakumai na iyamo ami kelikeli ikikiu. Wakekanko na iyaelemo waguliguliyam yoi. Kwanumako na nagamo galogalomiu simagumagu. Kami kaleko ele na tulutulu kana sauga koina kwatulutulu. Ami mane kwalobaili ami paisowa koina na iyamo mwayamwayau wagabaeni. Na yawaloyoi, mumugamiu wagitaiyoili. Koinaele kwalau koya kolili na mayau wakoili siguli wakalailima na yagu nume wakabi. Kabo muli mena kani numene kaiwena yayaliyaya yo esagu sikeleisinan. Kwabatoko kelikeli koina kan lalakina kwalobai na nigele, kikiuna kwalobai. Tem witi kwalobai na wakalaiyama yayui-kalai kamwasa mena. Tawae kaiwena? Kaiwena komiu kaigeda kaigeda ami nume wakabikabili na yau yagu nume iyaelemo metata-gwaligwalina. 10 Bwaite iya kaiwena mwa nige galewa kwalolobai yo nige sowasowana kan kwalolobai. 11 Tano yo koya yayakasisi-yagili galewa koina kabo guliyam kwalobai kabo witi, wain, olibe olo yo kan meuloina yakausili tomo yo yakayakan kolili na mesabana ami paisowa iyamala ginauli bwagabwaga.”
Nume Tabu kana paisowa iyatubu
12 Kabo Selubabeli yo Yosuwa yo tomo sanasanapuli meuloili siya siyawatagilima Babilon koina Yeoba Yaubada ana walo siobigai. Tomo meuloili me ali matausi mwa yau yagu walo meuloina siobigai, kaiwena sikatai yau Yaubada ana tosagenawasa. 13 Kabo Yaubada ana walo yawalowen yoi tomo kolili yawaloba, “Yeoba Yaubada iwaloba, ‘Yau mekamikava, bwaite yau yagu waloyameli kolimiu.’ ” 14 Kabo kabiyakaiwene kaiwena tomo meuloili me ali katepatu mwa Selubabeli yo Yosuwa yo tomo Isileli siyatubu numene sikabi. 15 Kaliyate tuwenti powa (24) waikena sikisi kaliyatenane koina kabikabi paisowana siyatubu saugana Daliyasi ana sauga kin koina.