Yona
Walo bagubagunana
Buki bwaitete iwalowalo-masala tawae iyawatagili Isileli tomona yabo esana Yona koina. Palopitane bwaite itonan tem Yeoba ana walo iyabubu-gabaen na nige sowana. Yeoba iwalo yakato ilau yanuwa Ninibe tomoliyao kolili siya bwaimwana tomo Isileli kali kaleyayao mwa Yona isikote. Na saugana iye lalakina isinoli yo imiyamiya diyana kalona mena kabo ana nuwatu ibui yo italam Yeoba ana walo imuliya. Kabo ilau na tomo Ninibe iyokoi-yagili kabo meuloili sinuwabui mwa Yeoba ana katekamkamna silobai. Na iyamo Yona nige iyayaliyaya. Buki bwaite koina talobai bwagana Ninibe siya tomo Isileli kali kaleyayao na iyamo Yeoba iya tomulolo yo tokatekamkamna siya analiyao sinuwabui yo sinuwalobi.
Nuwatu lalakiliyao buki bwaite kalona mena bwaite siyaele
Edeededeli toweya talobai?
Yona Yeoba iyabubu-gabaen peina 1
Yona ana nuwabui yo ana lebo peina 2
Yona ana walo Ninibe kolili yo ali nuwabui peina 3
Yona ana munamunai yo Yeoba ana katekamkamna peina 4
1
Yona itonan tem Yeoba iyabubu-gabaen
1 Sauga yabo mena Yeoba iwalo Yona, Amitai natuna koina, 2 iwaloba, “Kulau Ninibe taon lalakina yo tomoliyao kuyokoi-yagili, kaiwena ali paisowa naenaena ilalakisosi mangu mena.” 3 Na Yona itolo yakato Yeoba iyabubu-gabaen na ilobi Sipein. Kabo ilau yanuwa Yopa, waga yabo ilobai ilalau dedeinane koina. Ana kamwasa iyamaisa, mwa imwalisae wagane koina yakato ikalau ilau Sipein na kana mwayaga iyai Yeoba koina. 4 Kabo Yeoba yaumai kaikaiwena iwalo itowa kalita pwatana mena. Wowoli ana lalaki kaiwena masa kikiunamo wagane ikoigali. 5 Waga kana topaisowao meuloili simatausi, kabo kaigeda kaigeda sikawakawanoi ali yaubadao kolili. Yo ketauli bwaine sitaulili siyasululi kalita mena, na yakato waga imalamalae.
Na Yona iyaele waga kalona mena ikenomateko. 6 Mwa kapiten ikaisulu ilobi waga kalona mena yo iwalolau koina iwaloba, “Gubesi na ukenokeno? Kutolo yo ukwawanoi am yaubada koina na tem sowasowana inuwatuila yo ileboila na tabu taboboita.” 7 Kabo waga kana topaisowao meuloili siwaloba, “Sula taginauli yo taloyai yaiya ana pwanoli kaiwena mwa nae bwaite iyawatagili kolila.” Kabo sula siginauli yo silobai yakato Yona iya nae yaina. 8 Kabo siwalo Yona koina siwaloba, “Kuwalo kolimai. Kowa am nae kaiwena nae bwaite iyawatagili kolila o nigele? Tawae am paisowa? Toisabo dedei tomona kowa? Am yanuwa toweya?” 9 Kabo Yona kainali iyamaisa iwaloba, “Yau Ibeliu tomona, Yeoba Yaubada bulibuli mena yayakasisi-yan, iya yanuwa yo kalita kali toyamayale, 10 iya mwa yayabubu-gabaen.” Kabo waga kana topaisowa simatausi lalakina siyokoiyan yo siwaloba, “Tawae kaiwena uginauli besiele?” 11 Kabo wowoline ilalaki isaesae mwa sineli koina siwaloba, “Tawae kani kaginauli koliwo na wowoline bwaite ilopei?” 12 Kabo Yona iwalolau kolili iwaloba, “Wagabae-lobiyegau kalita mena na idaumwali. Yakataiyako yau yagu pwanoli kaiwena mwa wowoli lalakina bwaite iyawatagili kolimiu.” 13 Na iyamo wagane kana topaisowa sikepate yakato waga siwoseyan silawan yanuwa mena, na nige sowali, kaiwena wowoli ilalakisosi.
14 Kabo siyogasae Yona ana Yaubada koina siwaloba. “O Yeoba, kakawanoi koliwo, tabu tomone bwaite ana boita kana polowe ilalaoma kolimai kaiwena tomo bwaite nige ana nae ipapagan. Tabu kuyayamaisa naenaena kolimai kaiwena kowa kuwalo mwa wowoline bwaite iyawatagili kolimai.” 15 Kabo silau Yona sikalai yo sigabaen kalita mena, kabo wowoli lalakinane ilopei idaumwali. 16 Daumwaline sigitai kabo topaisowane me ali matausi lalakina Yeoba koina, mwa kaba pwaoli yabo sikalai yo sipwaoli koina yo siwaloyameli yakato sauga meuloina kani sitapwalolo koina. 17 Na Yeoba iye lalakina yabo iyawasa ilau Yona isinoli ilobi diyana kalona mena kaliyate yaiyona yo boniyai yaiyona imiyamiya.