1 Isileli waila Yolidan silopanaisiko kabo Yeoba iwalo Yosuwa koina iwaloba, 2 “Tatao yoli tuwelo wagite-sipwaili Isileli ana susu kaigeda kaigeda luwali mena. 3 Yo kuwalo kolili veku tuwelo sikalailima Yolidan luwaluwalina mena toweya koina topwaoline sitotolo koina sikewaili silau sipeili yanuwa bwaite kani lolau koina wagogo.”

4 Kabo Yosuwa tatao yoli tuwelo siya igite-sipwailiko iyoga-gogonagili, 5 yo iba, “Wakaisulu waila Yolidan Yeoba ala Yaubada ana kelabilabin kamwasana kana dedewaga manna mena kabo veku kaigeda kaigeda wakalaili wakewaili leyaleyamiu mena, kali baibaiwa tuwelo besiele Isileli susu kala baibaiwa. 6 Veku bwaite ala kaba nuwatu-kalatan tawae Yeoba iginauli kolila. Bwaliga tem natumiyao sineli kolimiu siba, ‘Veku bwaite kali katai gubesi?’ 7 Kabo kwawaloba, ‘Beyabeyana waila Yolidan iguma saugana Yeoba ana kelabilabin kamwasana kana dedewaga sikewa-panaisan. Veku bwaite boda Isileli yaso yo yaso ali kaba nuwatu-kalatan.’ ” 8-9 Kabo tataone siginauli besiele Yosuwa ana walo. Silau veku tuwelo sikalailiya waila Yolidan luwaluwalina mena kali baibaiwa besiele susu Isileli kali baibaiwa besiele Yeoba ana walo Yosuwa koina. Yo veku tuwelo sikalaili waila Yolidan luwaluwalina mena dedei bwaimwana topwaoli sitotolo vekune sikewai yo silau sipeili ali kaba gogone koina kabo Yosuwa veku igwauili. Veku bwaite siyaelemo sauga bwaite.

10-18 Yo tomo mwayamwayau mena silopanaisi yo topwaoli siya dedewaga sikewakewai sitotolo Yolidan luwaluwalina mena kanasiga ginauli bwaite Yeoba iwalowen Yosuwa koina meuloina Isileli siginauli woli, besiele beyabeyana Mosese ana walo Yosuwa koina. Yeoba iwalo Yosuwa koina iwaloba, “Kuwalo topwaoli siya kelabilabin kamwasana kana dedewaga sikewakewai sigayosaema wailane koina.” Yo Yosuwa iwalolau topwaoli kolili iwaloba, “Wagayosaema.” Kabo topwaoli sigayosaema kelabilabin kamwasana kana dedewaga sikewakewai yo Yolidan silogabaen. Saugana sigayosaema waila dedeina mena kabo waila idoga yoi, yalubwasi ididi yoi. Boda sisanasana saugana topwaoline silopanaisi yo silau kanasiga tomo Isileli sibaguna-yagili yoi. Tataomo tokaleya siya susu Luben, Gada yo susu Manase tupwaliyao mekalikavao sikatububu kaleya kaiwena yo silopanaisi tomo meuloili manli mena, besiele beyabeyana Mosese ana walo kolili. Kali baibaiwa poti tausan (40,000) silopanaisi silau Yeliko kwabuna mena kaleya kaiwena. Kaliyatenane koina tomo Isileli Yeoba ana paisowa yo ana kaiwe sigitai kabo Yosuwa siyakasisi-yan besiele beyabeyana Mosese siyakasisi-yan.

19 Bolime kana waikena bagubagunana kana kaliyate sanaulu koina*Isileli ali kalenda uloina, ali waikena bagubagunana esana sipei Abib yo iyatubu Mati koina tomo Isileli Yolidan silopanaisi silau ali kaba gogowa yanuwa esana Giligali, iyaele Yeliko dedei pwatana mena. 20 Veku tuwelo sikalailiya waila Yolidan kalona mena Yosuwa igwauili yanuwane koina. 21 Kabo iwaloba, “Na sauga ilalaoma tem natumiyao sineli-yagimiu siba, ‘Veku bwaite kali katai gubesi?’ 22 Kabo kwawalo kolili kwaba, ‘Waila Yolidan iguma yo bwatano leleyanna koina kalopanaisi.’ 23 Kwawalo bwaite besiele kaiwena Yeoba ala Yaubada waila Yolidan isapiyaguma kaiwela kanasiga talopanaisi besiele bagubagunana koina Kalita Balabalagiyana isapiyaguma kanasiga tubumiyao silopanaisi. 24 Iginauli besiele kabo tomo meuloili yanuwa yaulina mena sikatai Yeoba iya Tokaiwe yo kabo komiu Yeoba ami Yaubada kwayakasisi-yan sauga meuloina.”