6
Tapayoon toŋvetaz to Krisi pa savsaveeŋ ila daba to taan matadi malep
1 Ighaze tiam eta ita ite igham sosor pani, pughu vena to ye ipayoonda ila yes daba to taan to tiwatag Maaron maau ne matadi? Ŋgar tiam tonanan, mayamim pani maau? Yam awatag: Daba tonowen, ŋgar todi deŋia ila Maaron mata maau. Tovenen yam aghur pataŋani tiam ila tamtoghon to Maaron nimadi pa tigharaata, ghoro poia. 2-3 Yam awatag maau? Sawa to Mboŋ Muri, iit tamtoghon to Maaron pale tauuli pa uraat to gabizooŋ tamtoghon to taan. Ighaze venen, pughu vena to yam irau agharaat pataŋani ŋgiira ŋgiira to aazne tivotvot ila lolomim ne maau? Ve iit pale taŋgabiiz yes aŋela paam. Ighaze venen, iit irau tagharaat pataŋani to taan. Pasa, nene mbeb tiina maau. Mt 19:28
4 Daba to taan ledi izadi ila lupuuŋ to Krisi lolo maau. Pughu vena to yam aghurghur pataŋani tiam to taan ila ndiran tovene nimadi pa tigharaat di? 5 Nambood saveeŋ tonene payam, leso mayamim pa ŋgar to aghamghami. Vena, tiam eta le ŋgar irau to igharaat toŋvetaz to Krisi saveeŋ todi maau? 6-7 Eemoghon yam ataghon ataam tovene maau. Yam apayoon toŋvetaz tiam to tighur ila to Krisi ne, ila yes daba to taan to tighur ila maau ne matadi. Ŋgar tiam tonanan ipatooŋ gham ighaze yam atap wa. Vena, ighaze toŋvetaz tiam eta itombaan gham pa igham sorokin mbeb tiam, ma igham sosor ite paam payam, irau apul sosor toni maau? Mt 5:39+; Ro 12:17+; 1Pe 3:9
8 Eemoghon yam ataghon ataam tovene maau. Pasa, toŋvetaz tiam to yamŋa aneep ila lupuuŋ to Krisi lolo, tauto aghamgham sosor padi, ve atombaan di pa ayou sorokin mbeb todi.
9 Yam awatag maau? Ighaze tamtoghon eta ighamgham ŋgar to deŋia maau, ye irau itaghon Maaron pooz toni ve ilooŋ ila ndug toni ne maau. Tovenen agham kaarom pa taumim malep. Yes to matadi samia tinimale ŋgavuun, yes to timbesmbees pa maaron kaaromŋa, yes to tighurghur maat, nditamoot to timomogheer pa nditadi nditamoot pida, 10 yes yubyubŋa, yes to matadi mbeb, yes ghunuuŋa, yes to matadi izi pa nditadi ve tipipiyaav saveeŋ samsamia padi, ve yes to titombaan tamtoghon pa tigham sorokin mbeb todi, tamtoghon tisob to tighamgham tovene, yes irau titaghon pooz to Maaron ve tilooŋ tila ndug toni ne maau. Ga 5:19+; Ep 5:5; Hib 12:14; Syg 21:8, 22:15
11 Muuŋ, yam pida ataghon ŋgar tovene paam. Eemoghon aazne, ila uraat to Yesu Krisi, Maaron Avuvu igham uraat payam. Tauto Maaron igham gham aŋgalaaŋ, ve anim tamtoghon toni patabuaŋa, ve aneep deŋiamim ila mata wa. 1Kor 1:2; Ep 2:1+; Kol 3:7+; Tit 3:3+
Anoŋaad, nene inimale rumai to Avuvu Patabuaŋ
12 Yam pida asavsaav aghaze: “You irau nagham ŋgar to naol ne. Mbeb eta le ŋgalsekiiŋ maau.” Nanan poia. Eemoghon ŋgar tisob irau tiuul ghiit maau. Ve mbeb ite paam. You lolog pa mbeb samia eta igham pooz payou ve nanim mbesooŋa pani ne maau. Yo 8:34; 1Kor 10:23
13 Ve yam pida asavsaav aghaze: “Aniiŋ, nene mbeb to apood. Ve apood ineep pa aniiŋ izila. Ve muri, Maaron pale ipasob mbeb ru tonenen.”*Saveeŋ to aniiŋ ve apood, nene iza to nditamoot ve ndiliva anoŋadi. Ival tiina to ndug Korin matadi samsamia tinimale ŋgavuun. Ve ŋgar todi iwaghamgham tighaze ndiliva anoŋadi, nene ineep pa nditamoot timogheer padi moghon. Ve sa ŋgar to ighaze tamtoghon tigham pa anoŋadi, nene mbeb sorok. Irau igham mbeb eta pa anunudi maau. Pasa, muri, anoŋadi pale imaat ve ilale, ve anunudi moghon, ghoro ineep mata iyaryaar.
Saveeŋ tiam tonanan onoon. Eemoghon anoŋaad ineep pa igham ŋgar samia inimale ŋgavuun maau. Anoŋaad ineep pa imbees pa Ŋgeu Tiina. Ve Ŋgeu Tiina igham ŋgar tiina pa anoŋaad. 1Tes 4:3+
14 Aghita. Maaron ipamundigin Tiina toit Yesu pa mateeŋ wa. Ve muri, Maaron tapiri pale ipamundigin ghiit paam pa mateeŋ ve igham leed anoŋaad paghu. Ro 8:11; 2Kor 4:14; Ep 1:19+
15 Yam awatag maau? Anoŋamim, nene inimale Krisi anoŋa pida pida. Vena, ighaze tagham Krisi anoŋa pida ve talupi toman liva to ataam, pale poia? Maau kat! 1Kor 12:27
16 Yam awatag maau? Ighaze tamoot eta ipaak anoŋa ila liva to ataam anoŋa, nene yesuru tilup di tinim ee moghon. Saveeŋa ineep pataghaaŋ wa: “Yesuru pale tilup di tinim ee moghon.” Mbnp 2:24
17 Eemoghon tamtoghon to inim Tiina toit le ne, ila uraat to Maaron Avuvu, yesuru Krisi tilup di tinim ee moghon. Vena, tamtoghon tovene irau ilup tau toman liva to ataam muul? Nene pale maau. Yo 17:21+; 1Kor 12:13; Ep 4:4
18 Tovenen ŋgar to mataad samia tanimale ŋgavuun, yam aneep saguan pani. Pasa, ŋgar tonene raraate inimale sosor pida maau. Sosor toit pida tiŋarua tauud anoŋaad maau. Eemoghon tamtoghon to ighaze igham ŋgar tonene, nene igham sosor pa tau anoŋa. Ep 5:3; 1Tes 4:3; Hib 13:4
19 Yam awatag maau? Anoŋamim, nene inimale rumai to Avuvu Patabuaŋ ineep ilooŋ ila. Pasa, Maaron igham Avuvu payam, ve aazne ye ineep ila lolomim. Tovenen yam aŋgin taumim muul maau. Ro 14:7+; 1Kor 3:16+; 2Kor 6:16
20 Maaron ighol gham anim le wa. Tovenen sa ŋgar to ighaze aghami pa anoŋamim, yam irau aghami pa apait Maaron iza. 1Kor 7:23; Pil 1:20; Hib 9:12; 1Pe 1:18+
*6:13: Saveeŋ to aniiŋ ve apood, nene iza to nditamoot ve ndiliva anoŋadi. Ival tiina to ndug Korin matadi samsamia tinimale ŋgavuun. Ve ŋgar todi iwaghamgham tighaze ndiliva anoŋadi, nene ineep pa nditamoot timogheer padi moghon. Ve sa ŋgar to ighaze tamtoghon tigham pa anoŋadi, nene mbeb sorok. Irau igham mbeb eta pa anunudi maau. Pasa, muri, anoŋadi pale imaat ve ilale, ve anunudi moghon, ghoro ineep mata iyaryaar.