33
Maaron isaav ighaze ye irau ila toman yes Israela muul maau
1 Ghoro Yoova isaav muul pa Mose ighaze: “Yamŋa yes Israela to ugham di tipul Isip ve anim, amundig apul ndug tonene, ve alaagh muul ala pa taan Kanaan. Pasa muuŋ, you nambua saveeŋ toman Abaram, Isak, ve Yakop, ve napariaaŋa le iyaryaaŋ kat naghaze you pale nagham taan tonowen pa papaghu todi. Mbnp 12:7, 26:3, 28:13
2 You pale nambaaŋ aŋela tiou imuuŋ payam, pa indiir taan tonowen tamtoghona tighau. Nene yes Kanaana, Amora, Hita, Peresa, Hivia, ve Yebusa. 3 Leso agham taan todi inim lemim, ve aneep pani. Taan tonowen ŋgoreeŋa tiina, ve mbeb naol titub pooi pani. Eemoghon you taug irau itiŋa tala maau. Pasa, yam matamim zoraaŋ saveeŋ. Ighaze itiŋa tala, ve agham ŋgar samia ite paam izi ataam luvuŋa, nene pale apas ateg, ghoro napasob gham.”
4 Ival tiina tilooŋ saveeŋ ariaŋa tonene, le lolodi ipataŋan kat ve titaŋ tiina. Titiik taudi muul maau. Tipul taudi tinimale timoŋ. 5 Pasa, Yoova isaav pa Mose ighaze: “Usaav pa yes Israela tovene: ‘Yam matamim zoraaŋ saveeŋ. Irau itiŋa tala maau. Pasa, ighaze naneep toman gham pa sawa ris, ve apas ateg muul, nene pale napasob gham. Tovenen mbeb tiam popoia naol to atiik taumim pani, aduduum di tisob tizi, ghoro matag iŋgal sa ŋgar to pale nagham payam.’ ”
6 Tovenen sawa to yes Israela tipul lolooz Sinai ve inim, yes titiik taudi pa mbeb popoia muul maau.
Mbeez to tilup di toman Yoova
7 Sawa to yes Israela tilaghlaagh izi ndug balim, ve ighaze atedi izi ataam luvuŋa, ghoro Mose ipayoon mbeez eez ineep saguan pa mbeez pida. Mbeez tonowen, tiwaata tighaze: ‘Mbeez to lupuuŋ.’ Tamtoghon tisob to tighaze tighason Yoova pa mbeb eta, tilala tonowe, ve tighurghur aliŋadi ila to Mose, leso ana isavia ila to Yoova. 8-9 Sawa to naol, ighaze Mose ilaagh ila pa mbeez tonowen, ival tiina tisob timundig, ve tiyoon irau mbeez todi todi naghodi, ve matadi itaghoni le ilooŋ ila mbeez lolo. Ghoro yaghur tae induur izi inim ve ipoon mbeez nagho, ve Mose yesuru Yoova tisavsaav. 10 Sawa to ival tiina tighita yaghur tae tonowen izi inim ipoon mbeez nagho, yes tiput aghedi, ve tisuŋ irau mbeez todi todi. 11 Ve Yoova yesuru Mose tiwaghiton di, ve tisavsaav tinimale tamtoghon ru to avodi imbesmbees. Tisavsaav le isob, ghoro Mose ivot, ve imuul ila pa Israela inadi to nepooŋ. Eemoghon Yosua to Nun natu ne, ipulpul mbeez tonenen maau. Iŋgini irau sawa isob. Yosua, ye pain paghu ve inim ulaaŋa to Mose.
Mose ighason Maaron pa ipatooŋ tau pani
12 Tinepneep le sawa eez, ghoro Mose isaav pa Yoova ighaze: “Laak, yom usaav payou ughaze naghereb ival tiina tonene ve yeiŋa nila pa taan Kanaan. Ve ughaze tinim imot inim tiou ve ugham ghou nanim itam ite kat. Eemoghon sei to ughaze umbaaŋa inim toman ghou pa iuul ghou, nene yom upaghazoŋan ghou pani sone. 13 Ighaze onoon tinim imot inim tiou, ghoro upatooŋ ghou pa ataam toman ŋgar tiom. Leso nawatag katin ghom, ve laghooŋ tiou poia ila matam. Aa Yoova, matam iŋgal ival tiina tonowen paam. Pasa, yes tamtoghon tiom. Yom taum usia di tinim lem.”
14 Yoova ipamuul aliŋa ighaze: “Ugham ŋgar naol malep. You taug pale nalat toman ghom, leso nagham ghom lolom poia ve atem izi.”
15 Mose ilooŋ saveeŋ tonene, ve isaav pani ighaze: “Nene poia pa unum toman ghei. Pasa, ighaze taum unum toman ghei maau, yei irau nipul ndug tonene maau. Pale nineep moghon to sualen. 16 Pasa, ighaze unum toman ghei maau, nene pale sa mbeb igham tamtoghon tighilaal tighaze yom lolom payei, ve poia tiom inepneep toman ghei? Maau. Eemoghon ighaze unum toman ghei, nene pale tamtoghon tiwatag tighaze yom usia ghei ninim lem, ve yom taum upas ghei nivot saguan pa ndug tisob to taan.”
17 Tovenen Yoova isaav pa Mose ighaze: “Poia. Mbeb to yom ughason ghou pani, you pale naghami. Pasa, tinig imot ilat tiom, ve nagham ghom unum itag ite kat.”
18 Mose ilooŋ saveeŋ tonene, ve ighason Maaron muul ighaze: “Aa Yoova, ighaze venen, upatooŋ taum toman tapirim ve poia tiom payou, ve naghita katin ghom!” Yo 1:14,18; Kol 1:15; Hib 1:3
19 Yoova ipamuul aliŋa ighaze: “You pale napatooŋ suvun poia tiou payom, ve navotia izag Yoova toman gabuag ila matam. Ighaze lolog poia pa tamtoghon eta ve naghaze nagham poiani, nene pale nagham poiani. Ve ighaze lolog isamin tamtoghon eta ve lolog pa nauuli, nene pale nauuli. Ro 9:15
20 Eemoghon yom irau ughita naghog maau. Pasa, ighaze tamtoghon eta ighita katin ghou, ye irau ineep maau. Pale imaat. Mbnp 32:31
21 Ughita ndug to ineep digeg ne. Unum uyoon izala yaam pogho tonene. 22 Sawa to nanim ve naghaze napatooŋ taug toman tapirig ve poia tiou payom, nene pale naghur ghom ulooŋ ula yaam saambu tonene, ve napoon ghom pa nimag, le irau nasalib payom ve nala. 23 Ghoro nimag ighau, ve ughita ndimog. Eemoghon naghog, tamtoghon eta irau ighita maau.”