17
Maaron iwaat Abram iza paghu Abaram
1-2 Abram inepneep le ndaman toni irau 99, ghoro Yoova ivot toni muul, ve isaav pani ighaze: “You Maaron Ariaŋag To Nalib Pa Ndimaronŋa Tisob. Laghooŋ tiom, yom irau matam iŋgal ghou, ve utaghon ŋgar deŋia moghon ila matag. Leso napariaaŋ saveeŋ mbuaaŋ tiou toman ghom, ve ituru talup ghiit tanim ee moghon, ve nagham papaghu tiom timasa tinim naol.”
3 Abram ilooŋ saveeŋ tonene, ve iput aghe ve ighur nagho izila taan. Ghoro Maaron isaav pani muul ighaze: 4-5 “Ulooŋ. Saveeŋ mbuaaŋ tiou toman ghom, nene vene: Yom pale unum ndug ndug tamandi. Pasa, you pale nagham papaghu tiom tivot tinim ndug ndug pughudi. Tovenen aazne ve ila, yom pale izam Abram muul maau. Izam paghu, nene Abaram. * Pisis Abram pughu, nene vene: ‘Tamaan to iza tiina.’ Ve pisis ‘Abaram’ pughu, nene vene: ‘Ŋgeu to tamtoghon ndiŋndiŋ ndiŋndiŋ tivot ila toni.’ Ro 4:17
6 You pale nagham papaghu tiom timasa tinim naol, ve tinim ndug ndug pughudi. Ve pida pale tinim kinik. 7 Saveeŋ to aazne nambua toman ghom, muri pale napariaaŋa muul toman ndinatum, nditimbum, ve iseeŋga itaghoni taghoni gha ila. Tovenen saveeŋ mbuaaŋ tonene pale ineep ariaŋa tovene le alok. Saveeŋ tovene: You pale nanim Maaron tiom, ve Maaron to papaghu tiom to muri pale tivot.
8 Ve taan isob to Kanaan to aazne uneep unum loom pani, you pale nagham pa yom ve papaghu tiom to muri pale tivot. Taan tonene pale inim lemim, leso aneep pani itaghoni taghoni gha ila. Ve you pale nanim Maaron to papaghu tiom.” Mbaŋ 7:5
Maaron ighur ŋgar to zirooŋ tamtoghon inim ghilalooŋ pa saveeŋ mbuaaŋ toni
9-10 Maaron isaav muul pa Abaram ighaze: “Yom toman papaghu tiom irau matamim iŋgal saveeŋ mbuaaŋ tiou tonene ve ataghoni irau sawa isob. Ghilalooŋ to saveeŋ mbuaaŋ tonene, nene vene: Yom toman papaghu tiom nditamoot tisob to muri pale tivot, pale azir gham. Mbaŋ 7:8; Ro 4:11
11-13 Tovenen yam irau azir nditamoot tiam. Leso inim ghilalooŋ pa saveeŋ mbuaaŋ toit. Saveeŋ tonene pale ineep tovene le alok. Tovenen aazne, ve itaghoni taghoni gha ila, ighaze ndinatumim nditamoot tizi le mboŋidi inim liim ve tol, ghoro azir di. Ve mbesooŋa tiam to nditinandi tipoop di izi ruum tiam, toman mbesooŋa tiam pida to aghol di izi ndug ite ve agham di tinim, yes paam, azir di. Tovenen ghilalooŋ to saveeŋ mbuaaŋ tiou pale ineep ilat tiam itaghoni taghoni gha ila. 14 Ighaze tamoot eta, lolo pa tiziri maau, ye irau ineep toman gham muul maau. Azuruni ila ineep saguan payam. Pasa, ye izoor saveeŋ mbuaaŋ tiou tonene.”
Maaron isaav ighaze Sarai pale ipoop
15 Ghoro Maaron isaav muul pa Abaram ighaze: “Yom irau uwaat azuwam iza Sarai muul maau. Aazne ve ila, uwaat iza Sara. † Pisis Sara pughu, nene vene: ‘Garawaat tidi.’
16 Pasa, poia tiou pale ipaloti, leso ipoop lem natum tamoot eta. Ve papaghu toni pale tivot tinim katindi, ve tinim ndug ndug pughudi. Ve kinik pida pale tivot ila todi.”
17 Abaram ilooŋ saveeŋ tonene, ghoro iput aghe ve ighur nagho izila taan, eemoghon iŋiŋ ve lolo ighur ighaze: “Wai, nene you nanim olman waat wa. Ighaze ŋgeu eta ndaman toni irau tamoot liim (100), pale irau yesuru azuwa tipoop? Ve Sara paam, ndaman toni irau tamoot paaŋ saaŋgul (90). Pale irau ipoop?” Ro 4:19
18 Tovenen Abaram isaav pa Maaron ighaze: “Poia. Eemoghon natug Ismael inepneep. You naghaze poia tiom iza toni ve uŋgini ineep pooi.”
19 Eemoghon Maaron ipamuul aliŋa ighaze: “Maau. Azuwam Sara tau pale ipoop lem natum tamoot. Natum tonowen, uwaat iza Isak. ‡ Pisis Isak pughu, tovene: ‘Iŋiŋ.’
You pale napariaaŋ saveeŋ mbuaaŋ tiou toman ye tau ve papaghu toni to muri pale tivot, ve iseeŋga itaghoni taghoni gha ila. 20 Eemoghon yom ughason ghou ughaze matag pa Ismael, tovenen you pale nagham tovene. Poia tiou pale iza toni, ve nagham papaghu toni tivot tinim naol, ve izadi tintina. Daba saaŋgul ve ru pale tivot ila toni. 21 Sawa tonene ighaze ivot muul pa ndaman muri, ghoro Sara ipoop Isak. Ve natum tonanan to pale napariaaŋ saveeŋ mbuaaŋ tiou ila toni ve papaghu toni paam.” 22 Maaron isavsaav toman Abaram le isob, ghoro ipuli ve ila.
23 Ndag ee moghon tonenen, Abaram imundig ve izir yes nditamoot toni tisob itaghon Maaron aliŋa. Izir natu Ismael, ve yes mbesooŋa toni tisob paam. Yes to nditinandi tipoop di ila ruum toni, toman yes to ye ighol di tinim ne paam. 24-27 Tovenen Abaram ndaman toni irau 99, ve natu Ismael ndaman toni irau saaŋgul ve tol (13), ghoro tizir yesuru. Ve sawa tonenen, tizir mbesooŋa toni tisob paam. Yes to nditinandi tipoop di ila Abaram ruum toni, toman yes to ye ighol di tinim ne paam.