13
Suŋuuŋ to tamtoghon to pataŋani ighami irau sawa mala
Mbouŋ to David
Oyai Yoova, pataŋani tiina tonene ikis ghou sawa mala wa.
Ŋeez o uul ghou? Pale lolom imaagh payou itaghoni taghoni gha ila?
Vena to uŋgooz matam payou? Ŋeez o matam inim payou muul? Mbo 22:1+
 
Sawa isob, you naghamgham ŋgar naol pa pataŋani tiou.
Mboŋ ve ndag, lolog isami naghaze nataŋ.
Pale koiagŋa tilib payou itaghoni taghoni gha ila?
Ŋeez o unum uul ghou?
3-4 Yoova, yom Maaron tiou. Matam inim payou, ve ughur taliŋam pa suŋuuŋ tiou tonene.
Uul ghou ve ugham tapirig ivot muul.
Pa vene, pataŋani tonene itatan ghou ve namaat, ve koiagŋa tipakur taudi tighaze tilib payou.
Ighaze you natap ve nagham samia, nene pale koiagŋa tighita ve tinidi iza.
 
Eemoghon you nanumeer ghom. Pasa, lolom ineep tuŋia ila to tamtoghon tiom ve uluul di.
You lolog poia kat. Pasa, you nawatag: Yom pale ugham mulin ghou pa pataŋani tiou tonene.
 
Tovenen you pale nambou mbouŋ ve napait Yoova iza.
Pasa, ye igham poian ghou kat.