19
Mbeb to Maaron ighur di, tipatooŋ ghiit tighaze ye iza tiina
Mbouŋ to David
Mbeb to tineep ila sambam paroŋania, tisob tipatooŋ ghiit tighaze Maaron iza tiina.
Mbeb to sala we, nene ye nima muri. Tauto tipatooŋ Maaron tapiri toman ŋgar ve poia toni pait. Mbo 89:5+, 97:6; Ro 1:19+
 
Ndag to naol, tisavsaav pait.
Ve mboŋ to naol, tipatooŋ ghiit pa ŋgar toni.
 
Yes ledi avodi to tisavsaav maau.
Irau talooŋ aliŋadi maau.
 
Eemoghon aliŋadi ila irau taan isob.
Saveeŋ todi ila irau taan dige to naol. Ro 10:18
Maaron ighur ndag le ina ila sambam paroŋania, leso ineep pani.
 
Ndag pusukia iza inimale ŋgeu to ivai paghu, ve ipul ruum toni ve ivot toman tini iza.
Ve inimale tamtoghon to landooŋ to igharaat tau leso ilaan toman lolo poia.
 
Ndag iza pa taan dige eez,
ve ila ilib pa dige ite.
Ve mbeb eta irau iyooŋ pa mata ne maau.
Saveeŋ to Maaron, nene poia kat ve ipatooŋ ghiit pa ŋgar toni
Saveeŋ isob to Yoova igham pait, nene poia kat ve deŋia moghon.
Ve ipariaaŋ ghiit ve igham tapiriid ivot muul.
Ataam to Yoova ighuri pa tamtoghon toni, ineep tuŋia tovene. Irau itoora muul maau.
Ve ipatooŋ yes to ledi ŋgar tiina maau ne, le ŋgar todi ivot. Mbo 119:104; 2Tim 3:15
 
Tutuuŋ to Yoova ighur di, nene deŋiadi moghon, ve tigham ghiit lolood poia kat.
Tutuuŋ to Yoova inim ghazooŋa pait, ve igham ghiit taghilaal. Mbo 119:105,130; 2Pe 1:19
 
Ŋgar to tamatughez pa Yoova ve tataghon ŋgar toni, nene poia.
Ŋgar tovene iŋgalaaŋ ila ye mata, ve ineep tovene itaghoni taghoni gha ila.
Ve gabizooŋ to Yoova, nene deŋia ve onoon moghon.
 
10 Tamtoghon tighita yaam gol tighaze nene mbeb tiina, ve lolodi pani.
Eemoghon Yoova saveeŋ toni ilib kat pa gol katindi to ŋgalaŋadi ne.
Ve bagil suru tovene paam, poia ve poiawaat ila avood.
Eemoghon Yoova saveeŋ toni, nene poia kat le ilib pa bagil suru. Mbo 119:72,103
11 Yoova, you mbesooŋa tiom. Saveeŋ tiom ipaghau ghou pa pataŋani naol.
Yes to titaghon saveeŋ tiom, nene pale tigham ledi atia tiina. Yo 14:21+; 1Tim 4:8
 
12 Sei irau ighilaal sosor toni le isob? Maau.
O Yoova, sosor naol to naghilaal di maau ve nagham di, lolom isamin ghou ve upul di.
 
13 You mbesooŋa tiom. Sosor to naghilaal di, upaghau ghou padi. Lolog pa ŋgar tovene igham pooz payou malep.
Leso nagham sosor tiina eta sob, ve ŋgar tiou deŋia ila matam.
14 Tovenen you naghaze le saveeŋ to ivot ila avog, ve ŋgar to ineep ila lolog, isob deŋia ila matam, ve igham ghom lolom poia.
O Yoova, yom Volaaŋa tiou ve uponpoon ghou unumale yaam tiina.