52
Maaron pale ighur atia pa ndiran samsamia
Mbouŋ to David
Mbouŋ tonene iŋarua sawa to Doeg to Edom taamdi ila ipaes pa Saul ighaze David ineep toman Ahimelek
1 Yom ŋgeu ariaŋam, pughu vena to aliŋam izaza, ve upakur ghom pa ŋgar samia to ugham pa Maaron tamtoghon toni?
Poia, ughami lak! Eemoghon ndag to naol ne, Maaron lolo ineep tuŋia ila to tamtoghon toni ve iuluul di. Ŋgar toni tonowen irau isob ne maau.
2 Yom ŋgeu to kaarom! Moghon moghon, ukalkaal ataam pa uwaghamun tamtoghon.
Ve saveeŋ isob to ivotvot ila avom, nene inimale gharghar to mata kat.
3 Ŋgar poia ve saveeŋ onoon, yom lolom pani maau.
Ve ŋgar samia ve saveeŋ kaarom, ghoro lolom pani kat.
4 Yom avom kaarom.
Ve saveeŋ samsamia naol to iwaghamun tamtoghon, lolom pani kat.
5 Tovenen Maaron pale iwaghamun ghom le usami kat. Irau umundig muul maau.
Pale ilooŋ ila ruum tiom lolo, ve isasaar ghom uvot ula pumuri, ghoro ipas ghom ila yes to matadi iyaryaar ne lolodi, ve ipiyaav ghom uzila ndug to mateeŋa.
6 Ŋgar to pale Maaron igham payom, ighaze ndiran deŋiadi tighita, nene pale timatughez.
Ghoro tiŋiŋ payom, ve tisaav tighaze:
7 “Aghita. Nene ŋgeu to lolo pa igham ulaaŋ ila to Maaron ve iyooŋ ila toni maau.
Ye mbaliiŋ tau kat. Ve inumeer mbeb toni naol tonowen
toman ŋgar toni samia ighaze pale ighami ineep pooi.”
8 Eemoghon you nanimale ai oliv to iyoon ilooŋ ila sirsiir to Rumai to Maaron. Pale nayoon tuŋia, ve naneep mala izi taan,
Pasa, you nanumeer Maaron naghaze ye pale lolo ineep tuŋia ila to tamtoghon toni, ve iuul di itaghoni taghoni gha ila.
9 Maaron, you lolog poia kat pa ŋgar to yom ughami.
Tovenen you pale napait ghom pa poia tiom itaghoni taghoni gha ila.
Ve napait izam ila yes to lolodi ineep tuŋia ilat tiom ne matadi, ve nasavia ghom padi naghaze: Yom poiam le poiam kat.