81
Mbouŋ to lupuuŋ tiina to suŋuuŋ
Mbouŋ to Asap
1 Lolomim poia pa Maaron, ve ambou pani. Pasa, iit taghamgham tapiriid ila toni.
Tinimim iza pa Maaron to Yakop, ve alool ve apaiti.
2 Ait mbouŋ ve ambou.
Ve atok kakaap, ve arab gita ve mbeb pida, leso agham mbouŋ paghuna.
3 Sawa to kaiyo iza paghu, ve sawa to kaiyo imatu, nene sawa to talup ghiit ve tasuŋ.
Tovenen avib tavuur * Sawa to yes Israela tipamundigin suŋuuŋ todi, tivib mekmek nditamoot ndoŋadi inimale iit tavib tavuur.
ve apamundigin suŋuuŋ.
4 Pasa ŋgar tovene, nene itaghon tutuuŋ to Maaron ighuri pa iit Israela alok wa.
Maaron to Yakop ighaze tataghon tutuuŋ tonene.
5 Sawa to ye igham malmal pa yes Isipa, ye isaav pa iit Israela ighaze tataghon tutuuŋ tonene, leso itiŋa talup ghiit tanim ee moghon.
You nalooŋ ŋgeu eez aliŋa inim.
To muuŋ ve inim, nalooŋ aliŋa tovene maau. Isaav ighaze:
6 “You to nazugua mburuguuŋ pataŋani izi pa avaramim,
ve nagham gham atemim izi pa badooŋ mbeb. Igham 1:11+, 6:6; Mt 11:28
7 Muuŋ, yam aneep ila pataŋani tiina lolo, ve ataŋ roran ghou pa nauul gham.
Ve you nalooŋ taŋiiz tiam, ve napas gham avot pa pataŋani tiam.
You nayooŋ ila yaghur tae asosooŋa to lalaav avolutu ivotvot pani, ve napamuul aliŋamim.
Ve natoov gham izi ya dige to ndug Meriba. Igham 17:7
8 Yam tamtoghon tiou, alooŋ saveeŋ ariaŋa to naghaze nasavia payam.
Yam Israela, aghur taliŋamim pa aliŋag tonene ve ataghoni, ghoro poia!
9 Maaron ite paam ineep ila lolomim ve ambees pani malep. You moghon, ghoro ambees payou.
Tovenen aput aghemim pa maaron kaaromŋa to ndug pida malep. Igham 20:3
10 Pasa, you Yoova to Maaron tiam. You to nagham gham apul Isip.
You nasaav payam naghaze: Akaak avomim tiina. Leso napavonini pa mbeb popoiadi.
11 Eemoghon tamtoghon tiou tilooŋ aliŋag maau. Yes Israela tiyasiil payou. Igham 32:1+
12 Ŋgar todi iyaryaaŋ kat. Lolodi pa tilooŋ saveeŋ maau.
Tauto napul di titaghon taudi ŋgar todi. Mbaŋ 7:42; Ro 1:24
13 You nakausim naghaze le tamtoghon tiou tilooŋ aliŋag, ve titaghon ataam tiou!
14 Leso rikia moghon ve koiadi tiyamaan nimag, ve natatan di.
15 Yes to tighur koi payou ne, pale tinim titap tizi ila matag toman matughezaaŋ tiina.
Ve atia to pale iza todi, nene pale inepneep tovene itaghoni taghoni gha ila.
16 Eemoghon yam Israela, pale napan gham pa aniiŋ popoia,
ve napaghun gham pa bagil to su suru, le isooŋ gham.”
*81:3: Sawa to yes Israela tipamundigin suŋuuŋ todi, tivib mekmek nditamoot ndoŋadi inimale iit tavib tavuur.