94
Maaron iyat ŋgar samia to tamtoghon
O Yoova, yom Maaron to uyatyat ŋgar samia to tamtoghon.
Upatooŋ ŋgar tiom deŋia ivot ighazooŋ, ve ughur atia pa ndiran samsamia.
 
Pasa, yom to uŋgagabiiz tamtoghon tisob to taan, ve ughurghur atia padi.
Tovenen umundig ve ughur atia iŋarua yes to tipapait taudi.
Upamuul ŋgar todi samsamia imuul ila pa taudi, ghoro deŋia. Mbnp 18:25
O Yoova, ndiran samsamia tighamgham tinidi, ve lolodi poia pa ŋgar to tighamghami we. Pale ŋeez o upasob ŋgar todi tonowen?
 
Yes to tighamgham ŋgar samia, saveeŋ pakuruuŋ naol ivotvot ila avodi.
Aliŋadi izaza, ve tipapait taudi pa ŋgar todi tighaze yes tiraua.
 
Yoova, ughita. Yes tighamgham samin tamtoghon tiom.
Yes to ugham di tinim lem, ndiran tonowen tighamgham pataŋani tiina padi.
 
Ve tirabrab ndinaara toman parooŋa timatmaat.
Ve loomba to tineep toman ghei izi ndug tiei ne, tirab di paam.
 
Ve matadi velegin ghom tighaze: “A, Yoova ighita ghiit?
Ŋgar to taghamghami ne, Maaron to Yakop irau mata ila pani maau.”
Yam ndiran samsamiamim, lemim ŋgar maau animale borouŋa!
Pale ŋeez o ŋgar tiam ivot, ve aghilaal?
 
Maaron to igharaat taliŋamim. Irau ilooŋ saveeŋ tiam maau?
Ve ye to igharaat matamim. Irau ighita gham maau?
 
10 Ye ighurghur pataŋani pa tamtoghon to ndug ndug, leso ipasaluŋgan di. Pale ighurghur gham?
Ve ye to ighamgham ŋgar pa tamtoghon. Vena, aghaze ye le ŋgar maau?
11 Ŋgar naol to tineep ila iit tamtoghon lolood, Yoova iwatag di le tisob.
Ve ye iwatag: Sawa naol, ŋgar toit anoŋa maau.
Nene isob rikia moghon inimale yaghuraad to ivotvot ila avood. 1Kor 3:20
12 Yoova, tamtoghon to ighaze yom ughur pataŋani pani pa upasaluŋgani,
ve upaghazoŋani pa tutuuŋ tiom,
nene pale poia tiom iza toni, ve lolo poia kat. 1Kor 11:32; Hib 12:5
 
13 Tamtoghon tovene, ighaze ineep ila pataŋani, yom pale uuli. Leso ate izi,
ve inamnaam le irau titai saambu pa yes ndiran samsamia, ve titap tizila.
14 Yoova irau ipul muri pa tamtoghon toni ne maau.
Yes to ye igham di tinim le, lolo imaagh padi maau. Ro 11:1+
 
15 Ve ye pale ipasaluŋgan yes pooza, leso tigharaat pataŋani to tamtoghon itaghon ŋgar deŋia.
Ve tamtoghon tisob to ŋgar deŋia ineep tuŋia ila lolodi, yes pale tipalot ŋgar tovene paam.
16 Ighaze tamtoghon tigham samin ghou, sei pale iyoon payou ve iuul ghou?
Ve sei to iponpoon ghou pa ndiran samsamia?
Ite paam maau. Yoova moghon.
 
17 Inimale Yoova iuul ghou maau, tone namaat rikia moghon, ve nala ndug to le oroora maau.
18 Yoova, sawa to naghaze pale natap pa ghurla tiou,
ŋgar tiom to lolom ineep tuŋia ila to tamtoghon tiom ve uluul di, tauto ipalot ghou ve nayoon tuŋia.
 
19 Ve sawa to lolog ipataŋan, ve nagham ŋgar naol,
yom urab ateg, ve ugham lolog poia muul.
20 Yes pooza samsamia to tighurghur tutuuŋ naol pa tiwaghamun tamtoghon,
yom irau ula toman di pa ŋgar todi tonowen maau.
 
21 Yes tilup di, ve timbua saveeŋ tighaze tiwaghamun ndiran deŋiadi.
Ve yes to ledi sosor maau, yes pooza tonowen tighur saveeŋ tighaze yes pale timaat. Mt 27:4
22 Eemoghon Yoova, ye inim didiiŋ ariaŋa payou, leso nayooŋ ila.
Maaron tiou iponpoon ghou inimale raŋ to izala kat.
 
23 Pale ipamuul ŋgar samsamia to ndiran tonowen imuul pa taudi, ve iwaghamun di.
Pale ipasob di toman ŋgar todi samsamia tonowen.
Maaron toit Yoova pale ipasob di le tisob kat.