2
Paulus isavsaav imin yes ŋgara to taan mako
1 Yam toŋvetaz, matamim iŋgal. Saawe tau nalat gha navotia Maaron aliiŋa payam, yau nasavia saveeŋ puughu ariaaŋa imin yes ŋgara to taan tau tighamgham pa tauzi ezazi na mako. Yau nasavia saveeŋ raurauai payam, leso aghazooŋ pa Maaron ŋgar tooni. Ŋgar tawe, muuŋ iyooŋ, ve aazne ivot ighazooŋ wa. *1Kor 1:17
2 Pasaa, saawe tau nalat gha naleep tomani gham, ŋgar tsiau iyaryaaŋ naghe nasavia Yesu Krisi vaaru mon, ve mateegh tooni izala ai pambarooŋ. *1Kor 1:23; Ga 6:14; Pil 3:8
3 Saawe tau naleep tomani gham, roiŋ tiina igham ghau le tinig irur, ve nayamaan naghe tapirig imbool. *Mbaŋ 18:9; 2Kor 11:30, 12:5, 9
4 Ve saawe tau navotia vaaru poia payam, yau nasavsaav imin yes ŋgara to taan to nagham lolomim ne mako. Eemon Maaron Avuvu igham uraat toman tapiri ila lolomim. Tauta itotoi ighe saveeŋ tau nasavia payam na, ene saveeŋ onoon. *1Kor 4:20; 1Tes 1:5
5 Nataghon eez tauvene, leso tamtamon ŋgar toozi imin puughu pa ghuruuŋ ila tsiam sov. Naghe Maaron tauu tapiri imin puughu pani, o poia. *1Kor 4:20; 1Tes 1:5
Maaron Avuvu ipaghazoŋai ghiit pa Maaron ŋgar tooni
6-7 Eemon yes tau ŋgar toozi imatuugh pa Maaron ve saveeŋ tooni na, yei nisavsaav pazi pa ŋgar tiina to Maaron tau muuŋ iyooŋ ve aazne ivot ighazooŋ. Muuŋ geeg, saawe tau sambam ve taan tivot soone, i igharaat eez pataghaaŋ wa, leso igham ghiit tala taleep tomania ila mbonari loolo. Ŋgar tooni tawe, ite kat pa ŋgar tau yes ŋgara to taan tisasavia pa saawe tane. Ve yes tau tighamgham pooz pa saawe tane *Yes pooza tau Paulus isavi zi na, ene yes daaba sasaghati to taan, ma Ŋeer Saghati tomania avuvu sasaghati siriv.
tikankaan pani paam. Yes pooza tawe, murei Maaron pale itatan zi timin kaut sorok. *Ro 16:25+; Ep 3:5, 9; Kol 1:26; Yems 3:17
8 Toozi eta ighazooŋ pa Maaron ŋgar tooni mako. Ve imin ta tighazooŋ pani, kanaŋ irau tirav Tiina toit Yesu tau eeza tiina pa tapiri ve poia tooni na izala ai pambarooŋ mako. *Lu 23:34; Yo 16:3; Mbaŋ 13:27; 2Kor 3:14
9 Ŋgar yoŋgaaŋa to Maaron tau nisavsavia ne, tibood saveeŋa pataghaaŋ tighe:
“Maaron igharaat gabua popoiazi naol pa yes tau lolozi igheen tooni na. Gabua tawe, ite kat. Tamtamon eta ighit zi pa maata, ma ilooŋ varuzi pa taliiŋa soone. Ve tamtamon eta irau igham ŋgar pazi paam mako.” *Is 64:4; Yer 3:16
10 Eemon iit, o Maaron ipaghazoŋai ghiit pa ŋgar tooni yoŋgaaŋa tana ila uraat to Avuvu Patabuyaaŋ wa. Maaron Avuvu ighita gabua naol isov. Ŋgar yoŋgaaŋa kat tau igheen ila Maaron loolo na paam, Avuvu ighita. *Mt 13:11; Yo 16:13; 1Yo 2:27
11 Laak, sei iwatagh katin tamtamon ite loolo? Mako. I tauu mon ta iwataghi. Maaron tauvene paam. Tauu Avuvu mon, ta iwatagh katin loolo. Ite paam mako. 12 Avuvu tau iit taghamu na, i itaghon ŋgar to taan mako. I ivot ila to Maaron tauu. Maaron igham Avuvu pait, leso tawatagh gabua popoia tau i irei zi pait itaghon tauu loolo ve poia tooni na. †Gabua popoia tau Paulus isavi zi na, ene gabua tau tagham zi ila mateegh to Krisi izala ai pambarooŋ. Ene gabua tauvene: Krisi ireu sosor toit, ve igham ghiit taduduuŋ ila Maaron maata, ve irei Avuvu Patabuyaaŋ pait.
13 Tauvene yei nisavsaav pa gabua tane. Ve ŋgar tau nisasavia ne, yei nighamu ila to yes ŋgara to taan mako. Maaron tauu Avuvu, ta ipaghazoŋai ghei pani, ve ighamgham pooz pa saveeŋ isov tau nisasavia ne. Tauvene saveeŋ onoon tau Maaron Avuvu isavia payei, tauta nipaghazoŋai puughu pa yes tau titaghon ŋgar to Maaron Avuvu. *1Kor 1:17, 2:4
14 Isaav ighe ŋeer eta itaghon ŋgar to tamtamon mon, i pale izor ŋgar tau ilam pa Maaron Avuvu na, ve ighita ŋgar tawe imin ŋgar to yes kankanooŋa. Irau ighazooŋ pani mako. Pasaa, Maaron Avuvu iuul ghiit, o tagabiiz poghania ŋgar tana, ve taghazooŋ pani. *Yo 6:44, 14:17; Ro 8:5+; 1Kor 1:18, 23
15 Tamtamon tau ighe itaghon ŋgar to Maaron Avuvu, ene irau igabiiz poghania gabua naol isov ve ighilaal: saa ta poia, ve saa ta saghati. Tamtamon tauvene, yes tau titaghon taan ŋgara na, irau tigabiiza mako. ‡Saveeŋ ziiri tane aat iŋarui tamtamon siriv to Korin tau tivelegh Paulus pa uraat tooni, ve tiyauyau avozi pani. Ughita 2Kor 10:10. *1Tes 5:21
16 Pale tigabiiza mindai? Mako. Pasaa, saveeŋ igheen pataghaaŋ ighe:
“Sei iwatagh katin ŋgar to Maaron, ve irau ipaghazoŋaini pa ŋgar siriv? Mako.” *Ro 11:34
Eemon iit, o ŋgar to Krisi igheen toit. *Ro 12:2; Ep 4:23
*2:2: 1Kor 1:23; Ga 6:14; Pil 3:8
*2:3: Mbaŋ 18:9; 2Kor 11:30, 12:5, 9
*2:6-7: Yes pooza tau Paulus isavi zi na, ene yes daaba sasaghati to taan, ma Ŋeer Saghati tomania avuvu sasaghati siriv.
*2:6-7: Ro 16:25+; Ep 3:5, 9; Kol 1:26; Yems 3:17
*2:8: Lu 23:34; Yo 16:3; Mbaŋ 13:27; 2Kor 3:14
*2:9: Is 64:4; Yer 3:16
*2:10: Mt 13:11; Yo 16:13; 1Yo 2:27
†2:12: Gabua popoia tau Paulus isavi zi na, ene gabua tau tagham zi ila mateegh to Krisi izala ai pambarooŋ. Ene gabua tauvene: Krisi ireu sosor toit, ve igham ghiit taduduuŋ ila Maaron maata, ve irei Avuvu Patabuyaaŋ pait.
*2:14: Yo 6:44, 14:17; Ro 8:5+; 1Kor 1:18, 23
‡2:15: Saveeŋ ziiri tane aat iŋarui tamtamon siriv to Korin tau tivelegh Paulus pa uraat tooni, ve tiyauyau avozi pani. Ughita 2Kor 10:10.