Maaron Igham Mulin Yes Israela Pa Pataŋani Toozi
(Kisim Bek—Eksodus)
1
Yes Israela tau tizila Isip na ezazi
1-5 Yes Israela tau yesŋa tamazi Yakop, ve azuwazŋa ma natuzŋa tizila pa Isip na ezazi tauvene: Ruben, Simeon, Levi, Yuda, Isakar, Zebulun, Benyamin, Dan, Naptali, Gat ve Aser. Yakop eeza ite ta Israel. Paaghu tooni tau yesŋa tizila Isip na, yes irau tamoot tol saŋavul (70). Ve naatu Yosep, i imuuŋ ila ileep pataghaaŋ wa. *Gnp 46:8+
6 Yosep imaat ve taazi tomania tooghŋa ve tamtamon toozi siriv tau yesŋa tizila Isip pa saawe tana na, tileep ta sewe le tisov timataar paam. 7 Eemon yes Israela tipopoop, ve paaghu toozi timasa le timin eval kat ve tipavon taan isov to yes Isipa. Tauvene tapirizi ighe iliiv zi. *Mbaŋ 7:17
Kinik paaghu to Isip ighur pataŋani pa yes Israela
8 Yes Israela tileep ta sewe irau ndaman ndaman, ra kinik paaghu ee ivot ve igham pooz izi Isip. Kinik paaghu tawe, i iwatagh Yosep uraat tooni rigta mako. *Mbaŋ 7:18
9 Tauvene isaav pa yes Isipa ighe: “O, aghit ghiit wa? Aazne, yes Israela timasa timin naol, ve paita tapirizi iliiv ghiit tane. 10 Tauvene iit aat tagham ŋgar poi, ve tail eez eta to tatatan tapirizi. Mako pale tivot timin eval kat ve tiliiv ghiit. Ve isaav ighe malmal eta iburig, ene pale tila tipaak koiaanŋa, ve tiparav tomani ghiit ve tiliiv ghiit, mako tipul taan toit ve tighau tila.” *Mbaŋ 7:19
11 Tauvene yes Isipa tigham yes Israela timin saghati pazi, ve tighur ŋginiiŋa ariaŋazi to tiŋgin zi. Yes ŋginiiŋa tawe tighur uraat pataŋani kat pazi, leso titatan zi. Tigham zi tipaburigin nugh paghpaaghu ru, leso tilup aniiŋ tomania gabua siriv to kinik ta sewe. Nugh ee, eeza Pitom, ve ite eeza Ramses. 12 Yes Isipa tigham saghatin yes Israela ve tighur uraat pataŋani naol pazi. Leso titatan zi ve tapirizi isov. Eemon tirao mako. Yes Israela tivotvot timin naol, ve tila tileep irau taan isov to yes Isipa. Tauvene yes Isipa tiroi pazi. 13 Tauta tiŋgal matazi pa uraat siriv paam tau pataŋani le pataŋani kat. Lolozi isaghatin zi rigta mako. *Gnp 15:13
14 Tigham le yes Israela lepoghazi isaghat kat. Pasaa, tighurghur uraat pataŋani kat pazi. Tigham zi tigharaat brik ve tirau ruum, ve tigham uraat ariaaŋa pa uum paam. Ve saawe isov tau yes Israela tighamgham uraat, yes Isipa lolozi isaghatin zi rigta mako.
15-16 Ra kinik to Isip ipoi Hibru tinazi ru tilam. Ee eeza Sipra, ve ite eeza Pua. Yesuru lezi uraat to tipapoop zilivaa to yes Hibrua. Kinik isaav pazi ighe: “Alooŋ. Saawe tau apapoop yes Hibru tinazi, na aghita natuzŋa. Isaav ighe zitamoot, na arav zi timaat. Ve ighe zilivaa, o apul zi tileep.” 17 Eemon zilivaa ru tawe tiroi pa Maaron. Tauvene titaghon kinik aliiŋa mako, ve tipuliir geegeu zitamoot tileep. *Mbaŋ 5:29
18 Tauvene kinik ipoi yesuru timuul tilam, ve ighason zi ighe: “Puughu mindai ta yamru azoor aliŋag, ve apulpul geegeu zitamoot to yes Hibrua tileep?”
19 Yesuru tiyol aliiŋa tighe: “Wai, yes Hibru tinazi, popaaŋ toozi imin yes Isip tinazi mako. Pasaa, yes zilivaa ariaŋazi, ve tipopoop rekia mon. Saawe tau yeiru nilaghlaagh soone, yes tipoop wa!” 20-21 Zilivaa ru tana tiroi pa Maaron ve titaghon ŋgar tooni. Tauvene i igham poghani zi le anazi tipoop lezi natuzŋa paam. Ve yes Israela tivotvot le timin eval le eval kat. Ve tapirizi paam ivot imin tiina kat.
isaav ariaaŋ pa eval tiina to Isip ighe: “Geegeu zitamoot tau Hibru tinazi tipoop zi na, asik zi tisov tizila yaa Nil. Ve ighe zilivaa, mako apul zi tileep.” *Mbaŋ 7:19
*1:22: Yes Isipa tiwatwaat saveeŋ ‘kinik’ ila tauzi aliŋazi tighe ‘Paro.’ Tauta Baibol siriv tiwaat kinik to Isip ‘Paro.’ ‘Paro’ ene kinik to Isip eeza mako. Ene isavia uraat tooni tau i kinik. Ŋgara katini matazi iŋgal tighe kinik tau igham saghatin yes Israela na, eeza ene Ramses.