24
Yes Israela timbu saveeŋ tomania Yoova
1 Yoova isaav pa Mose ighe: “Yamru togham Aron, tomania natŋa ru Nadap gha Abiu, ve daaba tamoot tol saŋavul (70) to yes Israela azalam tsiau ta loloz daaba ne. Eemon alam agharau ghau geeg sov. Aleep soghan rig, ve aput aghemim, ve asuŋ payau. 2 Le isov o, yes siriv tileep ta sewe, ve yo zigom ulam ugharau ghau. Ve yes eval tiina to Israel tauvene paam. Tizalam tigharau ghau sov. Tileep soghan.”
3 Tauvene Mose imuul izila to yes Israela, ve ipaes pazi pa saveeŋ ve tutuuŋ isov tau Yoova isavia na. Isavsaav pazi le isov, ra tilup avozi tighe: “Saveeŋ naol tau Yoova isavia na, yei pale nitaghoni.” *Igham 19:8
4 Ra Mose ibood saveeŋ isov to Yoova ila rau.
Mboŋ nughizau, ra Mose iburig, ve indou maet siriv izi loloz puughu imin artaal, ve ipayooz maet saŋavul ve ru imin ilaal pa rumei saŋavul ve ru to yes Israela. 5 Ra imbaaŋ geegeu toozi siriv tila tigham watooŋrau pa Yoova. Yes tigham gabua siriv ve tighur zi tizala yav gha ighan dodolin zi. Ve timoz makau paghpaaghu siriv ve tighan zi, leso yesŋa Yoova tivalupu zi timin eemon. 6 Mose iwato gabua tau tirav zi imin watooŋrau na siŋizi, ve iliŋ sirivu ila oon siriv lolozi, ve igham sirivu, ve itirtiri izala artaal. 7 Ra igham rau tau saveeŋ mbuaaŋ toozi tomania Yoova igheen ila na, iraraava, ve iwaato gha eval tiina tilooŋa. Tilooŋa le isov, ra tisaav tighe: “Saveeŋ isov tau Yoova isavia na, yei aat nitaghon duduŋaini.”
8 Ra Mose igham siŋ tau igheen ila oon lolozi na, ve itirtiri izala eval tiina pavozi, ve isaav pazi ighe: “Aazne, Yoova imbu saveeŋ tomani gham ve yamŋa avalupu gham amin eemon. Siŋ tane, ene to ipariaaŋ saveeŋ mbuaaŋ tsiam tomania Yoova. Lupuuŋ toit tomania Yoova, ene iyooz izala saveeŋ tau i igham pait. Isaav ighe tataghon duduŋaini, ene pale lupuuŋ toit tomania Yoova ighengheen tauvene taghon taghon gha ila.” *Mt 26:28; 1Kor 11:25; Hib 9:16+
9 Ra Mose igham Aron, Nadap, Abiu, ve daaba tamoot tol saŋavul (70) to yes Israela, ve yesŋa tizala pa loloz. 10 Tila tivot ta sewe, ra tighita Maaron to Israela. I iyooz izala gabua ee paavo. Gabua tawe babaaŋa, ve mazavaniiŋa imin sambam saamba. 11 Yes zolman to Israela tileep ila Maaron naagho ve tighan ma tighun izi ta sewe. Onoon kat, yes tighita Maaron. Eemon i ivaghamun zi mako. *Gnp 32:31
Mose izala pa loloz Sinai daaba
12 Murei pa gabua tana, Yoova isaav pa Mose ighe: “Malmalim uzalam tsiau ta loloz daaba ne, ve uleep ta sene. Pa yau narav saveeŋ ve tutuuŋ tsiau ila maet babaŋazi wa. Leso ipaghazoŋai yes Israela pa ŋgar to titaghoni. Ve naghe naghur maet tane ila nimam.”
13-14 Tauvene Mose isaav pa yes daaba tana ighe: “Yam aleep ta sene, ve asaŋan yeiru Yosua. Aron yesuru Ur ta tilepleep ne. Isaav ighe lemim pataŋani eta, yesuru irau tigharaata.” Isavsaav pazi le isov, ra igham uleeŋa tooni Yosua gha yesuru tinau tizala rig. Ra Mose ipul Yosua izi, ve i zigani malmali izala pa loloz daaba ighe ighita Maaron.
15 Saawe tana, taitai izilam ikau loloz Sinai daaba. 16-17 Ve Yoova mbonari isul izala loloz daaba. Taitai tawe ikau loloz irau mboŋ liim ve ee. Eval tiina to Israel tau tileep siiŋa na, matazi izala pa loloz, ve tighita Yoova mbonari isul imin yav tiina ighanghan izala loloz daaba. *Mt 17:5; Hib 12:18, 29
Saawe imin liim ve ru, ra Yoova ileep taitai loolo, ve isaav izila pa Mose ighe izala pani. 18 Tauvene Mose izala loloz daaba kat, le iloŋ ila taitai loolo. Ve ileep ta sewe irau mboŋ tamoot ru. *Mt 4:2