14
Abram igham mulin Lot ila kinik paaŋ nimazi
1-9 Saawe tana, Bera, i kinik to nugh Sodom. Birsa, i kinik to nugh Gomora. Sinap, i kinik to nugh Adma. Semeba, i kinik to nugh Zebo. Ve Kedorlaomer, i kinik to nugh Elam. Kedorlaomer iŋgin kinik paaŋ tawe tomania kinik to nugh Bela (eeza ite Zoar) irau ndaman saŋavul ve ru wa. Ve ndaman ite imin saŋavul ve tol, ene kinik liim tawe tiburig ve tizoor kinik Kedorlaomer aliiŋa.
Tauvene ndaman imin saŋavul ve paaŋ, kinik Kedorlaomer imbaaŋ ila pa zeetŋa tol ve tilam. Ezazi tauvene: Amrapel, i kinik to nugh Sinar, Ariok, i kinik to nugh Elasa, ve Tidal, i kinik to nugh Goi. Kinik paaŋ tawe tomania zaaba toozi tila, ve yesŋa yes zeran to Repaim tigham malmal izi nugh Asterot-Karnaim le tiliiv zi.
Ra tila pa nugh Am, ve yesŋa zeran to Zuzim tigham malmal le tiliiv zi paam. Ra tila pa taan duduuŋa to Kiriataim, ve yesŋa zeran to Enim tigham malmal le tiliiv zi. Mako tila pa taan Seir loloza, ve yesŋa zeran to Or tigham malmal le tiliiv zi, ve tinaan zi tila pa nugh El Paran, tau igheen igharau nugh ŋginaaŋa.
Isov ra, timuul tila pa nugh Kades tau eeza ite En Mispat. Ve yesŋa zeran to Amalek, ve zeran to Amor tau tileep izi nugh Azezon Tamar na, tigham malmal le tiliiv zi paam.
Kedorlaomer tomania zeetŋa tiliiv yes kinik tana le isov, ra kinik liim to Sodom, Gomora, Adma, Zebo, ve Bela tilup zi, ve tila pa taan duduuŋa tau eeza Sidim. Tileep ta sewe ve tisaŋan Kedorlaomer tomania zeetŋa leso yesŋa tigham malmal. Tipaburigin malmal ta sewe, ve Kedorlaomer tomania zeetŋa tiliiv kinik liim tawe. 10 Taan to Sidim le puura katini tau kolta igheen ila. Tauvene saawe tau kinik to Sodom ve kinik to Gomora tomania zaaba toozi tighau, tamtamon toozi siriv titaptap tizila taan puura tawe. Ve siriv tighau tizala pa loloz.
11 Malmal tana isov, ra Kedorlaomer tomania zeetŋa tila tiyau lezi aniiŋ, tomania gabua isov to nugh Sodom ve Gomora, ve tila. 12 Abram waagha Lot ilepleep izi nugh Sodom paam. Tauta tighamu tomania gabua tooni isov.
13 Eemon ŋeer ee ighau pa malmal, ve ila ivot to Abram tau Hibru tamazi na, ve ipaes pani pa ŋgar tau ivot na. Saawe tana, Abram ilepleep igharau nugh tau ai tintiina siriv tiyozyooz pani na. Ai tawe to ŋeer ee, eeza Mamre. I tamtamon to Amor, ve tazŋa ezazi Eskol ve Aner. Abram yesŋa zeran tol tawe, lupuuŋ toozi eemon.
14 Abram ilooŋ paesiiŋ tighe tigham waagha Lot gha tila, tauvene ipoi besooŋa tooni irau 318 tau zeran to malmal na, ve yesŋa tiburig gha tigham taghon kinik paaŋ tawe tila. Yes besooŋa tawe, saawe tau tinazŋa tipoop zi le timin zolman, yes tileep tomania Abram, ve i itotoi zi pa ŋgar to ghamuuŋ malmal. Tila le tizaa to kinik paaŋ tawe izi nugh Dan.
15 Tileep le mboŋ izi, ra Abram ivalagh zaaba tooni, ve tipaburigin malmal pa kinik paaŋ tawe le tiliiv zi. Tinaan zi tila tila le timalaaŋ pa nugh Damaskus, ve tila tivot nugh Oba. 16 Ra Abram igham mulin waagha Lot tomania gabua tooni, ve zilivaa ve tamtamon siriv tau kinik paaŋ tawe tiyau zi na, tomania gabua toozi tisov.
Melkizedek ighur poia to Maaron izaa to Abram
17 Abram iliiv Kedorlaomer tomania kinik siriv tana, ra imuul ilam, ve kinik to Sodom ilam izaa tooni izi taan duduuŋa tau eeza Save. (Taan tawe, eeza ite ‘Taan duduuŋa to yes kinik.’)
18 Kinik to nugh Salem paam, eeza Melkizedek, igham mberet tomania vaen ve ilam. Melkizedek, i ŋeer to watooŋrau, ve ibesbees pa Maaron Tiina Tau Iliiv Zimaronŋa Tisov na. *Mbo 110:4; Hib 5:6, 7:1-10
19-20 I ighur palotiiŋ izaa to Abram ve isaav pani ighe:
“Abram, Maaron Tiina tau ighur sambam ve taan ve iliiv zimaronŋa tisov na, i tauu pale ighur poia tooni izaa tsio.
Iit tapakuru. Pasaa, i ighur koiamŋa tila nimam gha uliiv zi wa.”
Ra Abram iburig, ve ivalagh gabua naol isov tau i iyau zi ila to koiŋa na, irau ŋgun saŋavul, ve ighur ŋgun ee ila pa Melkizedek imin paitooŋ tooni. *Hib 7:4-10
21 Ra kinik to Sodom isaav pa Abram ighe: “Gabua naol tana, ugham zi timin lem. Eemon upul tamtamon tsiau tilam, ve yeŋa nila.”
22 Eemon Abram iyol aliiŋa ighe: “Ee-e, vene mako. Yoova, i Maaron Tiina Tau Iliiv Zimaronŋa Tisov ve ighur sambam ve taan. Yau nambu saveeŋ ariaaŋa ila i eeza tauvene: 23-24 Yau irau nagham gabua tsio ŋgiira rigta imin waar iimu, ma waar to zuzuuŋa to aghem ne mako. Mako kat. Gabua tau zaaba tsiau tighani, tauta ena. Ve zetagŋa tol tau titaghon ghau ve yeŋa nilam, Aner, Eskol, ve Mamre, ene yau leg saveeŋ eta pazi mako. Yes tauzi. Isaav ighe lolozi pa ghamuuŋ lezi gabua siriv, ene poia. Tighamu.” Abram isaav tauvene pasaa, iroi pa murei pale kinik to Sodom ipakur ghi ighe: “Yau ta nagham Abram ivot gha imin kuaz tauu.”