17
Maaron iwaat Abram eeza paaghu Abaram
1-2 Abram ilepleep le ndaman tooni irau 99, ra Yoova ivot tooni muul, ve isaav pani ighe: “Yau Maaron Saksaki Tau Naliiv Zimaronŋa Tisov. Laghooŋ tsio, yo aat matam iŋgal ghau, ve utaghon ŋgar duduuŋa mon ila yau matag. Leso napariaaŋ saveeŋ mbuaaŋ tsiau tomani ghom, ve ituru talup ghiit tamin eemon, ve nagham paaghu tsio timasa timin naol.”
3 Abram ilooŋ saveeŋ tane, ve iput aaghe ve ighur naagho izila pa taan. Ra Maaron isaav pani muul ighe: 4-5 “Ulooŋ. Saveeŋ mbuaaŋ tsiau tomani ghom, ene vene: Yo pale umin nughmariŋ tamazi. Pasaa, yau pale nagham paaghu tsio tivot timin nugh nugh pughuzi. Tauvene aazne ve ila, yo aat ezam Abram muul mako. Ezam paaghu, ene Abaram. *Eez Abram puughu, ene vene: ‘Tamaan tau eeza tiina.’ Ve eez ‘Abaram’ puughu, ene vene: ‘Ŋeer tau tamtamon ndiŋndiŋ ndiŋndiŋ tivot ila tooni’. *Ro 4:17
6 Yau pale nagham paaghu tsio timasa timin naol, ve timin nugh nugh pughuzi. Ve siriv pale timin kinik. 7 Saveeŋ tau aazne nambua tomani ghom, murei pale napariaaŋa muul tomania natumŋa, timbumŋa, ve iseeŋga taghon taghon gha ila. Tauvene saveeŋ mbuaaŋ tane pale iyooz ariaaŋ tauvene le alok. Saveeŋ tauvene: Yau aat namin Maaron tsio, ve Maaron to paaghu tsio tau murei pale tivot. *Lu 1:55
8 Ve taan isov to Kanaan tau aazne uleep umin loom pani ne, yau pale nagham payo ve paaghu tsio tau murei pale tivot. Taan tane pale imin lemim to aleep pani taghon taghon gha ila. Ve yau pale namin Maaron to paaghu tsio.” *Mbaŋ 7:5
Maaron ighur ŋgar to ravuuŋ tamtamon warozi imin ilaal pa saveeŋ mbuaaŋ tooni
9-10 Maaron isaav muul pa Abaram ighe: “Yo tomania paaghu tsio aat matamim iŋgalŋgal saveeŋ mbuaaŋ tsiau tane ve ataghoni irau saawe. Ilaal to saveeŋ mbuaaŋ tane, ene vene: Yo tomania paaghu tsio zitamoot tisov tau pale tivot murei na, aat arav waromim. *Mbaŋ 7:8; Ro 4:11
11-13 Ulimim tau ipoon waromim maata na, arav motin zi. Leso imin ilaal pa saveeŋ mbuaaŋ toit. Saveeŋ tane pale igheen tauvene le alok. Tauvene aazne, ve taghon taghon gha ila, isaav ighe natumimŋa zitamoot tizi le mboŋizi imin liim ve tol, mako arav warozi. Ve besooŋa tsiam tau tinazŋa tipoop zi izi ruum tsiam, tomania besooŋa tsiam siriv tau aghol zi izi nugh ite ve agham zi tilam na, ene yes paam, arav warozi. Tauvene ilaal to saveeŋ mbuaaŋ tsiau aat igheen ilat tsiam taghon taghon gha ila.
14 “Isaav ighe tamoot eta, loolo pa tirav waaro mako, i aat irau ileep tomani gham muul mako. Aziire ila ileep soghan payam. Pasaa, i izoor saveeŋ mbuaaŋ tsiau tane.”
Maaron isaav ighe Sarai pale ipoop
15 Ra Maaron isaav muul pa Abaram ighe: “Yo irau uwaat azuwam eeza Sarai muul mako. Aazne ve ila, uwaat eeza Sara. †Eez Sara puughu, ene vene: ‘Garwaat tinazi’.
16 Pa poia tsiau pale ipaloti, leso ipoop lem natum tamoot eta. Ve paaghu tooni pale tivot timin katini, ve timin nugh nugh puughu toozi. Ve kinik siriv pale tivot ila toozi.”
17 Abaram ilooŋ saveeŋ tane, ra iput aaghe ve ighur naagho izila taan, eemon iŋiŋ ve loolo ighur ighe: “Wai, ene yau namin kooŋ wa. Isaav ighe ŋeer eta ndaman tooni irau ndiŋndiŋ ee (100), pale irau yesuru azaawa tipoop? Ve Sara paam, ndaman tooni irau tamoot paaŋ saŋavul (90). Pale irau ipoop?” *Ro 4:19
18 Tauvene Abaram isaav pa Maaron ighe: “Poia. Eemon natug Ismael ilepleep. Yau naghe poia tsio izaa tooni ve uŋgin ileep poi.”
19 Eemon Maaron iyol aliiŋa ighe: “Mako. Azuwam Sara tauu pale ipoop lem natum tamoot. Natum tawe, yo aat uwaat eeza Isak. ‡Eez Isak puughu tauvene: ‘Iŋiŋ’.
Yau pale napariaaŋ saveeŋ mbuaaŋ tsiau tomania i tauu ve paaghu tooni tau pale tivot murei na, ve iseeŋga taghon gha ila. 20 Eemon yo ughason ghau ughe matag pa Ismael paam, tauvene yau aat nagham tauvene. Poia tsiau pale izaa tooni, ve nagham paaghu tooni tivot timin naol, ve ezazi tintiina. Daaba saŋavul ve ru pale tivot ila tooni. 21 Saawe tane ighe ivot muul pa ndaman murei, mako Sara ipoop Isak. Ve natum tana, ta pale napariaaŋ saveeŋ mbuaaŋ tsiau ila tooni ve paaghu tooni paam.” 22 Maaron isavsaav tomania Abaram le isov, ra ipuli ve ila.
23 Aaz eemon tana, Abaram iburig gha irav yes zitamoot tooni tisov warozi itaghon Maaron aliiŋa. Irav naatu Ismael waaro, ve yes besooŋa tooni tisov warozi paam. Yes tau tinazŋa tipoop zi ila ruum tooni, tomania yes tau i ighol zi tilam na paam. 24-27 Tauvene Abaram ndaman tooni irau 99, ve naatu Ismael ndaman tooni irau saŋavul ve tol (13), ra tirav yesuru warozi. Ve saawe tana, tirav besooŋa tooni tisov warozi paam. Yes tau tinazŋa tipoop zi ila Abaram ruum tooni, tomania yes tau i ighol zi tilam na paam.