28
Maaron, uneneeŋ sov
Mbouŋ to David
1 Yoova, yo uponpoon ghau pa koiagŋa imin maet tiina. Tauvene taŋiiz tsiau ilat payo.
Ughur taliŋam pa suŋuuŋ tsiau tane ve uul ghau lak!
Ighe ulooŋ ghau mako, ve uneneeŋ mon,
ene pale namin yes tau timaat gha tizila puura to yes mateegha.
2 Aazne, yau nait nimag izaa iŋarui rumei tsio loolo tau patabuyaaŋ kat na, ve nataŋ rarai ghom pa uleeŋ.
Ulooŋ taŋiiz tsiau tane ve lolom isaghatin ghau. Pa yau besooŋa tsio.
3 Saawe tau yo ughur atuya pa zeran sasaghati, na ugherev ghau nala tomani zi sov.
Yes tau tinoknok ghamuuŋ sosor na, nalaleg tomani zi sov.
Zeran tawe tisasavia saveeŋ poia pa zetazŋa tighe lolozi pazi.
Eemon ŋgar tau igheen ila lolozi na, ene ite. Tighe tivaghamun zi.
4 Yes tikaria ghamuuŋ sosor wa.
Tauvene ughur atuya pazi ve uŋgal matazi. Leso uyat ŋgar toozi saghati tawe.
Ugham tauvene, o iduduuŋ. Pasaa, ŋgar tau tighamghamu na, poia mako. *Mt 16:27; Syg 20:12, 22:12
5 Uraat tintiina tau Yoova niima ighamgham zi na, yes tigham ŋgar pani mako.
Tauvene i pale ireu mbirisai zi gha tilalez kat,
imin ruum tau tireu mbirisaini, ve irau tirao muul mako.
6 Yau napait Yoova pa poia tooni.
Pasaa, yau nataŋ raraini to iuul ghau, ve i ilooŋ taŋiiz tsiau.
7 Yau naghamgham tapirig ila to Yoova, ve i imin sigheu payau.
Yau naghur ila tooni ariaaŋ ila lolog, ve i iuluul ghau.
Tauvene lolog poia le poia kat, ve napait eeza pa poia tooni ila mbouŋ.
8 Yoova tamtamon tooni tighamgham tapirizi ila tooni.
Ve kinik tau Yoova tauu ighuru pa uraat tooni na, i iuluule ve iponpoona pa koiŋa imin didiiŋ ariaaŋa. *Mbo 18:1, 27:1
9 Yoova, tamtamon tsio timin lem motot. Ugham mulin zi pa pataŋani toozi, ve ughur poia tsio izaa toozi.
Matam pa sipsip tsio, ve uŋgin zi poi. Ta aazne, ve taghon taghon gha ila. *Mbo 23:1, 95:7