30
Ŋeer ee ipait Maaron pasaa, Maaron ighamu tiini poia
Mbouŋ to David
Mbouŋ tane iŋarui saawe tau tigharaat Rumei Tiina ve tighuru imin Maaron le
1 O Yoova, yau napait ezam. Pasaa, saawe tau naleep ila pataŋani tiina loolo, yo ugham mulin ghau, ve uit ghau nazaa muul.
Imin ta yo upul ghau namaat, kanaŋ koiagŋa lolozi poia ve tipakur zi tighe tiliiv ghau.
2 O Yoova, Maaron tsiau, yau nataŋ rarai ghom to uul ghau.
Ve yo upasov moroghooŋ tsiau, ve tinig poia wa.
3 Rigmon kanaŋ namaat gha nazila mateegha niazi.
Eemon yo uul ghau, tauta naburig muul, ve aazne naleep poi. *Yona 2:6
4 Yam tamtamon to Yoova tau lolomim isaghavu ariaaŋ ve ataghon eez tooni na, apaiti ila mbouŋ tsiam.
Yoova, i patabuyaaŋ. Tapiri ve ŋgar tooni, ene ite kat.
Tauvene lolomim poia pani ve apait eeza pa poia tooni.
5 Aatyavyav tooni ighengheen malau mako. Igheen rig, ve isov.
Eemon poia tooni, ene izazaa toit irau saawe tau taleep izi taan.
Isaav ighe tataŋ pa mboŋ,
ene pale mboŋoozo, i igham ghiit loloon poia muul. *Mbo 103:8+; Yo 16:20+; 2Kor 4:17
6 Saawe tau lepoogh tsiau poia mon, yau nasaav naghe:
“Pataŋani eta irau ivot payau ve itok ghau ne mako.”
7 Pasaa, yo ughamgham poghani ghau ve upapalot ghau.
Tauta napakur taug naghe yau aat naleep tuŋia tauvene irau saawe, imin loloz tintiina.
Eemon saawe tau yo uŋgooz naghom payau, roiŋ tiina igham ghau le nasaŋeeŋ.
8 Saawe tana, napoi ghom ve nataŋ rarai ghom naghe lolom isaghatin ghau ve uul ghau.
Yau nasaav payo naghe:
9 “O Yoova, isaav ighe namaat gha nazila mateegha niazi, ene pale mateegh tsiau imin saa poia?
Ughita. Mateegha tau tizila taan loolo gha timin ŋgaupup na, toozi eta irau ipait ghom? Ma toozi eta irau ivotia ŋgar tsio tau utataghon saveeŋ mbuaaŋ tsio? Mako.
10 Tauvene Yoova, ulooŋ suŋuuŋ tsiau tane.
Lolom isaghatin ghau ve uul ghau lak! Pa yau besooŋa tsio.”
11 Aa ŋgarig gha upasov taŋiiz tsiau! Tauvene yau aat tintinig ve nator.
Yo upasov pataŋani tsiau, ve uzuzuum uuli to moŋiiŋ izi pa tinig.
Yo ugham ghau lolog poia kat, ve naleep ila poia tsio loolo.
12 Tauvene irau naneneeŋ mako.
Yau aat nambou ve napait ezam toman lolog isov.
Yoova, yo Maaron tsiau. Yau aat napait ghom pa poia tsio ta aazne, ve taghon taghon gha ila.