42
Suŋuuŋ to ŋeer ee tau ipasawal pa Maaron ve rumei tooni
Mbouŋ to yes Kora
1 Maaron, yau naghe le naleep nagharau ghom, o poia. Eemon aazne, naleep malau payo.
Tauvene napasawal payo imin ŋgai sagsag tau murunu, ve iliil yaa tau irereer leso ighun. *Mbo 63:1, 119:131, 143:6
2 Yoova, yo Maaron tau uleep matam yaryaare.
Yau lolog payo kat imin tamtamon tau murun matini, ve iliil yaa pa ghunuuŋ.
Pale ŋeez o nalat peria tsio muul, ve nayooz ila naghom ve nasuŋ payo? *Ŋeer tau itoor mbouŋ tane ighe le imuul ila Yerusalem ve isuŋ pa Maaron ila Rumei Tiina loolo.
3 Mboŋoozo ila le ravrav izi, tamtamon tinoknok veleghiiŋ ghau tighe: “Maaron tsio ileep sindei?”
Saveeŋ toozi tawe igham ghau nataŋtaŋ ve naghunghun matag suuru irau mboŋ ve mataaz.
4 Yau matag iŋgal imuul ila pa ŋgar tau muuŋ naghamghamu na, tauta navotia lolog ila to Yoova.
Saawe tana, yau namuŋmuuŋ pa eval tiina, ve yeŋa nizazala pa Maaron rumei tooni, leso nilup ghei pa suŋuuŋ.
Yei nimboumbou toman lolomai poia kat, ve niyoryoor Maaron eeza pa poia tooni. *Mbo 100:2+
5 Tauta naghason taug naghe mindai ta aazne lolog isaghat?
Lolog ipataŋan ve nagham ŋgar naol pasaa?
Yau aat naghur ila to Maaron ariaaŋ, ve naghur matag pani.
Pasaa, i Maaron tsiau ve Uleeŋa tsiau. Tauvene yau aat napaiti muul.
6 Onoon, aazne lolog ipataŋan kat, ve napasawal payo.
Pasaa, naleep nagharau ghom mako.
Yau naleep izi yaa Yordan daaba tau igheen izi loloz Ermon ziige tau ila pa loloz Mizar.
Eemon yau aat matag iŋgal imuul ila pa ŋgar tsio.
7 Pataŋani tau yo upuli ivot payau ne, ene itatan ghau kat.
Ene imin yaa tau irereer toman luutu tiina na, iyatyaat izala pavog ve imbelmbeluut ghau.
Ve imin dibom tintiina to mazavan tipolpol izala pavog.
8 Eemon mataaz ta naol ne, Yoova loolo isaghav ghau ve iuluul ghau.
Tauvene mboŋ ta naol, yau namboumbou to napakuru.
Suŋŋuuŋ tsiau iŋaŋarui Maaron. Pasaa, i ta iŋgin lepoogh tsiau.
9 Maaron, i Volaaŋa tsiau ariaaŋa. I iponpoon ghau imin maetaaz tau izala kat.
Tauvene naghasoni naghe: “Puughu mindai ta lolom iveegh payau?
Mindai ta upul koiagŋa titatan ghau, ve tigham ghau lolog isaghat?”
10 Saawe isov koiagŋa tisasavia saveeŋ veleghiiŋ payau.
Ve tinoknok ghasoniiŋ ghau tighe: “Maaron tsio ileep sindei?”
Saveeŋ toozi tawe iŋgalŋgal ghau imin iiz.
11 Tauta naghason taug naghe mindai ta lolog isaghat?
Lolog ipataŋan ve nagham ŋgar naol pasaa?
Yau aat naghur ila to Maaron ariaaŋ ve naghur matag pani.
Pasaa, i Maaron tsiau ve Uleeŋa tsiau. Tauvene yau aat napaiti muul.
*42:1: Mbo 63:1, 119:131, 143:6
*42:2: Ŋeer tau itoor mbouŋ tane ighe le imuul ila Yerusalem ve isuŋ pa Maaron ila Rumei Tiina loolo.