53
Zeran kankanooŋa tau tiwatagh Maaron mako
Mbouŋ to David
1 Yes kankanooŋa tau tiwatagh Maaron mako na, tigham ŋgar ila lolozi tighe: “Maaron eta ileep mako.”
Zeran tauvene, Maaron loolo pazi mako kat. Pasaa, ŋgar toozi isaghat wa. Tauta tighamgham ŋgar sasaghati naol.
Eta igham ŋgar poia mako. *Mbo 10:4, 14:1+
2 Maaron ileep izi sambam, ve maata izizi pa tamtamon.
I ighe ighita: Toozi eta ighilaalo, ve izuari ghi ighe le iwatagh katini, ma mako?
3 Eemon tisov tipul murizi pani, ve tisaghat wa.
Toozi eta igham ŋgar poia mako. Mako le mako kat. *Gnp 6:5; Ro 3:10+; Ep 2:3
4 Tauvene Maaron igham ŋgar naol ighe: “Zeran tau tinoknok ghamuuŋ ŋgar sasaghati na, lezi ghilalooŋ ma mako?
Saawe isov, yes tipapasov tamtamon tsiau, le gabua toozi isov kat, imin yes tau luazi itaŋ pa ghaniiŋ aniiŋ popoia, ve tighan suvinia.
Ve matazi iŋgal ghau ve tisuŋ payau mako.”
5 Zeran tauvene aat tiyamaan zi. Pasaa murei, roiŋ tiina kat pale igham zi.
Muuŋ, tiroi tauvene mako.
Eemon tipaburigin malmal payam, tauta Maaron pale irav zi timatmaat, ve tuazi igheen imin ŋgiriis.
Tauvene yam pale aliiv zi, ve mayazi. Pasaa, Maaron ighur muuri pazi kat.
6 Oyai, Maaron tau ileep izi nugh Zion na, iuul yes Israela ve igham mulin zi pa pataŋani toozi, o poi!
Isaav ighe Maaron iuul tamtamon tooni, ve tileep poia muul, ene pale tintinizi.
Onoon kat, Yakop paaghu tooni pale lolozi poia le poia kat. *Mt 1:21; Ro 11:26