73
Lepoogh poia to zeran sasaghati itoov ghuruuŋ ila to ŋeer ee
Mbouŋ to Asap
1 Onoon kat, Maaron ighamgham ŋgar poia pa yes Israela.
Yes tau ŋgar ŋgalaaŋa igheen ariaaŋ ila lolozi na, i igham poghani zi kat. *Mt 5:8
2 Eemon yau, saawe ee agheg pusukia, ve rigmon kanaŋ natap.
Onoon kat, saawe tana, rigmon kanaŋ napul ghuruuŋ ila tsiau.
3 Pasaa, naghita zeran sasaghati tau tipapait tauzi ve tivelegh Maaron na, lepoogh toozi poia kat.
Tauvene nagham ŋgar pa gabua tane, le irau lolog mako. *Mbo 37:1, 7
4 Yes titum le tinizi poia kat. Lezi pataŋani mako, ve tileep poia mon ila le irau mateegh toozi.
5 Pataŋani naol to taan tau ighamgham tamtamon siriv na, igham zi mako.
Yes lezi pataŋani eta mako.
6 Ŋgar to pakuruuŋ tauzi, ene titotoia ivot ighazooŋ ila tamtamon matazi, imin namatabub tau tamtamon tighuru ila luazi.
Ve ŋgar toozi to ghamuuŋ malmal, yes tipulpuli mako, imin nonoghiiŋa tau monmon tinonogh zi pani.
7 Lepoogh toozi, poia mon. Tauvene titum kat.
Lolozi ivon pa ŋgar sasaghati naol, ve monmon tiliil eez to tivaghamun tamtamon.
8 Monmon tivevelegh tamtamon, ve tisiksik saveeŋ sasaghati pazi.
Ve tipapait tauzi ezazi, ve tiparoi tamtamon tighe yes pale titatan zi.
9 Yes tipakur tauzi, ve tisiksik saveeŋ veleghiiŋ pa Maaron to sambam.
Ve zetazŋa tau tileep izi taan ne, zeran tawe matazi veleghin zi, ve tighe titatan zi.
10 Yes tigherev tamtamon to Maaron paam, gha titaghon zi pa ŋgar toozi tawe.
Eval tiina tighe le tiloŋlooŋ saveeŋ toozi.
11 Zeran sasaghati tawe tisavsaav tighe: “Ah, Maaron tau ileep saaŋa kat na, i le ŋgar?
Ŋgar tau nighamghamu ne, Maaron iwataghi mako.”
12 Aghita. Zeran sasaghati, lepoogh toozi tauvene.
Lezi pataŋani eta mako, ve tindoundou lezi gabua katini.
13 Muuŋ, yau nagham ŋgar tauvene pa lepoogh toozi. Tauta nasaav pa taug naghe: “Yau tane, nazuari ghau naghe le leg sosor eta sov, ve ŋgar ŋgalaaŋa mon igheen ila lolog.
Eemon ŋgar tau nataghoni ne, anooŋa eta mako. Naghamghamu sorok.
14 Pasaa saawe isov, ta mboŋoozo ila le ravrav izi, Maaron ighurghur pataŋani payau.
Mboŋoozo ta naol ne, i iloslos ghau.”
15 Maaron, ŋgar tsiau saghati tane, imin ta nasavia ivot ighazooŋ gha tamtamon tilooŋa,
kanaŋ nagham karom pa tamtamon tsio, ve nakau ŋgar toozi. Tauta igheen to taug mon.
16 Yau nagham ŋgar naol pa lepoogh poia to zeran sasaghati, ve nail puughu. Eemon narao mako.
Tauta igham lolog ipataŋan kat.
17 Murei ra, naloŋ nala rumei patabuyaaŋ to Maaron ve nasuŋ.
Saawe tana ra, naghilaal ve ŋgar tsiau ivot pa gabua tau murei pale ivot pa zeran sasaghati.
18 Onoon kat, yo pale ugham zi tilaagh ila eez tau pusukpusukia.
Leso ugham zi titap, ve saghatiiŋ tiina igham zi.
19 Pale upasov zi rekia mon,
ve ureu mbirisai zi gha tilalez.
Ve mateegh toozi, pale toman roiŋ tiina. *Mbo 37:9-10, 35-36
20 Maaron, isaav ighe yo uburig ve uvaghamun zi, ene pale upasov zi kat. Eta irau ileep muul mako.
Pale timin gabua tau taghita ila vivuuŋ, ve mboŋoozo taburig loloon iveegh pani.
21-22 Saawe tau nagham ŋgar pa zeran sasaghati, ene ireu lolog ve igham ghau ateg yavyav.
Ve ŋgar tsiau ikaukau, ve navaghamgham.
Yau namin ŋgai sagsag tau le ŋgar payo mako.
23 Eemon yo upul ghau mako.
Monmon ulepleep tomani ghau,
ve ukis nimag tapir, ve upalot ghau.
24 Yo ugham pooz payau, leso nataghon ŋgar tsio.
Ve murei, yo pale upakur ghau, ve ugham ghau nalat naleep tomani ghom ila mbonarim loolo.
25 Yau nagham ŋgar pa gabua eta to nugh sambam mako. Yo mon ta nagham ŋgar payo.
Yo ulepleep tomani ghau, tauvene nail saa gabua muul izi taan? Mako.
Pasaa, yo mon ta urao. *Mbo 16:2; Pil 3:8
26 Isaav ighe tapirig isov, ve ŋgar tsiau imbool, ene pale Maaron ipalot ghau.
Tauvene yau naghita Maaron naghe i gabua tauu.
Yau naghamgham tapirig ila tooni, ve naleep ila tooni imin taan poia ee tau tipuli payau to naleep ila.
27 Yes tau lolozi igheen soghan payo, ene pale tilalez.
Ve yes tau tighur murizi payo na, yo pale upasov zi.
28 Eemon yau, saawe tau naleep nagharau ghom, nayamaan naghe ene poia kat.
Yoova, yo Maaron tsiau. Yau nanumeer ghom ve nayooŋ ilat tsio.
Yau naghe navotia uraat tisov tau ughamgham zi na pa tamtamon.