107
Tapait Maaron pa poia tooni
1 Lolomim poia pa Yoova ve apaiti. Pasaa, i poia kat.
Loolo isaghav tamtamon tooni ariaaŋ, ve iuluul zi irau saawe.
2 Yes tau Yoova igham mulin zi ila koiazŋa nimazi na, irau tisavia saveeŋ tane.
Pasaa, i iyooz pazi ve ipas zi tivot pa pataŋani toozi, ve igham zi tileep poi.
3 Muuŋ, koiazŋa tigham zi tila tileep irau nugh nugh.
Siriv tileep ila pa nugh tau aaz izazaa pani, ve siriv tileep ila pa nugh tau aaz izila.
Siriv tileep ila pa ragh puughu, ve siriv tileep ila pa yavaar puughu.
Eemon Yoova iyau zi timuul tilam pa tauzi nugh toozi.
4 Tamtamon siriv, tivalaghlaagh izi nugh ŋginaaŋa tau le yaa mako na.
Ve tiliil eez tighe tila nugh eta, leso tileep ta sewe. Eemon tindeeŋ eez eta mako.
5 Pitool zi, ve murun zi, le tapirizi isov.
6 Tauvene tileep saghat.
Eemon saawe tau titaŋ rarai Yoova pa uleeŋ,
i iuul zi pa pataŋani toozi tawe.
7 Ve itotoi zi pa eez tau duduuŋa ve tuuku.
Tauta titaghoni ve rekia tila tivot nugh poia ve tileep ta sewe.
8 Tauvene yes irau lolozi poia pa Yoova ve tipaiti pa poia tooni.
Pasaa, i loolo isaghav iit tamtamon ve iuluul ghiit.
Ve ighamgham uraat ŋgeretazi to iuul iit tamtamon.
9 Yes tau murun zi, i ighamgham yaa pazi to tighun ve isooŋ zi.
Ve yes tau pitool zi, i irao zi pa gabua popoia le tirau kat. *Mt 5:6; Lu 1:53
10 Tamtamon siriv, yes tileep ila ndoroom tiina loolo, ve rigmon kanaŋ timaat.
Yes tileep ila ruum to yavyavuuŋ loolo, ve ravraav tomania sen ighan nimazi ma aghezi le tisaghat kat.
11 Pasaa, tizorzoor Maaron aliiŋa.
Maaron Tiina Tau Iliiv Zimaronŋa Tisov na, yes tivevelegh saveeŋ tooni imin kaut sorok.
12 Tauta i ighur uraat pataŋani kat izaa toozi, leso itatan zi.
Yes irau tilaagh duduuŋ mako, ve titaptap tizizi. Pasaa, tibadbaad gabua pataŋani. Ve lezi tamtamon eta to iuul zi mako.
13 Tauvene tileep saghat.
Eemon saawe tau titaŋ rarai Yoova pa uleeŋ, i iuul zi pa pataŋani toozi tawe.
14 I ipas zi tivot pa ndoroom tiina tawe loolo, ve igham zi tivot tila ghazooŋa.
Ve ikuup motin ravraav tomania sen pa nimazi ma aghezi. *Lu 1:79
15 Tauvene yes irau lolozi poia pa Yoova ve tipaiti pa poia tooni.
Pasaa, i loolo isaghav iit tamtamon ve iuluul ghiit.
Ve ighamgham uraat ŋgeretazi to iuul iit tamtamon.
16 Ataman ariaŋazi to ruum to yavyavuuŋ tau tigharaat zi pa mbaras na, i irav valaghin zi.
Ve ain ariaŋazi tau tipapalot ataman na, i iŋgoor polpolin zi.
17 Tamtamon siriv, yes tighamgham ŋgar to borauŋa ve tinoknok zoraaŋ saveeŋ.
Yes tighamgham sosor, tauvene timorooŋ ve yavyavuuŋ tiina igham zi.
18 Lolozi pa ghaniiŋ aniiŋ eta mako. Isaav ighe tighita aniiŋ eta, ene pale atezi inaunau ve tilulu.
Tauvene tileep ila naal aavo wa.
19 Yes tileep saghat.
Eemon saawe tau titaŋ rarai Yoova pa uleeŋ, i iuul zi pa pataŋani toozi tawe.
20 I isaav, ve tinizi popoia muul.
Muuŋ, tileep ila naal aavo. Ve i igham mulin zi pa mateegh.
21 Tauvene yes irau lolozi poia pa Yoova ve tipaiti pa poia tooni.
Pasaa, i loolo isaghav iit tamtamon ve iuluul ghiit.
Ve ighamgham uraat ŋgeretazi to iuul iit tamtamon.
22 Tauvene yes aat lolozi poia pa uraat tintiina tau i igham pazi na, ve tigham watooŋrau pani.
Ve timbou toman aliŋazi tiina to tipakuru, ve tisavia uraat tooni tawe.
23 Tamtamon siriv, yes tizaa waaŋ,
ve tiraav tila nugh malau to tiraukol.
24 Yes tighit katin Yoova tapiri,
ve uraat tintiina tau i ighamghamu ila te paavo.
25 Pasaa, i isaav ariaaŋ, ve yaghur tiina izaa,
le ipei dibom tintiina.
26 Dibom tintiina tawe iit waaŋ toozi izala kat,
ve ipuli izi le rigmon kanaŋ izal izila mazavan tiina loolo.
Tauvene roiŋ tiina igham zi le tapirizi isov.
27 Ve tivataptap imin tamtamon tau ighun gha ivaghamgham.
Yes to te tiwatagh ghamuuŋ pooz. Eemon tirau gabua eta mako.
28 Tauvene tileep saghat.
Eemon saawe tau titaŋ rarai Yoova pa uleeŋ, i iuul zi pa pataŋani toozi tawe.
29 I igham yaghur aate izi, ve dibom imaat. *Yona 1:15; Lu 8:24
30 Yes tighita taun izi, le lolozi poia.
Ve Yoova igham zi tila tilooŋ nugh tau tighe tila pani na.
31 Tauvene yes irau lolozi poia pa Yoova ve tipaiti pa poia tooni.
Pasaa, i loolo isaghav iit tamtamon ve iuluul ghiit.
Ve ighamgham uraat ŋgeretazi to iuul iit tamtamon.
32 Tauvene isaav ighe eval tiina tilup zi pa suŋuuŋ, zeran tawe aat tila tomani zi ve tiyoor Yoova eeza.
Ve saawe tau yes ŋginiiŋa tilup zi, zeran tawe aat tipait Yoova eeza ila naghozi paam.
33 Yoova irau igham yaa tintiina timaak le tigorgor kat, imin nugh tau le yaa mako na.
Ve yaa tau tivotvot ila taan loolo na paam, i irau ipoon zi le taan loolo igorgor.
34 Isaav ighe nugh eta tinoknok ghamuuŋ ŋgar saghati,
i irau ivaghamunia taan toozi tau ŋgoreeŋa tiina na, leso isaghat, ve gabua eta itum ila muul mako.
35 Ve isaav ighe nugh eta le yaa mako, i irau igham yaa ivot pani, ve ireer tiina.
Taan tau loolo gorgori na, i irau igham yaa ivot pani.
36 Yes tau pitool zi na, i igham zi tila tileep ila taan poia tawe,
ve tighamu imin lezi nugh to lepoogh.
37 Tauvene yes tivazogh aniiŋ ve vaen ila,
le tighita anooŋa katini tivot.
38 Yoova ighur poia tooni izazaa toozi, tauta timasa timin eval.
Ve maata pa makau, mekmek, ve sipsip toozi paam, le timasa timin naol.
39 Isaav ighe tamtamon to Maaron koiazŋa titatan zi le tapirizi isov,
ve tigham saghatin zi le tileep saghat toman lolozi ipataŋan,
40 ene pale Yoova iuul zi, ve itatan daaba to koiazŋa tawe.
Pale igham zi tivaghamgham, ve tivalaghlaagh izi nugh ŋginaaŋa tau eez eta igheen ila mako.
41 Eemon yes tau tileep ila pataŋani loolo ve mbolaaŋ igham zi na, i ipaghau zi pa pataŋani toozi,
ve maata pazi le timasa timin eval.
42 Ŋgar tooni tawe, zeran duduŋazi tighita, le lolozi poia kat.
Ve zeran sasaghati tisov lezi saveeŋ eta muul mako. Saveeŋ toozi isov.
43 Tamtamon tau ighe le ŋgar, i aat igham ŋgar poi pa gabua tane,
ve maata iŋgalŋgal ŋgar to Yoova tau loolo isaghav tamtamon tooni ve iuluul zi.