130
Ŋeer ee itaŋ rarai Maaron ighe ireu sosor tooni
Mbouŋ to yes tau tizala Yerusalem pa suŋuuŋ
1 O Yoova, aazne naleep ila pataŋani tiina loolo, imin nazal nazila mazavan! Tauvene nataŋ rarai ghom.
2 Tiina tsiau, ughur taliŋam pa taŋiiz tsiau.
Lolom isaghatin ghau, ve ulooŋ suŋuuŋ tsiau tane.
3 Yoova, isaav ighe matam kisin sosor tsiei,
sei irau iyooz ila naghom? Eta mako.
4 Eemon yo poia puughu, ve ureureu sosor tsiei.
Leso niroi payo, ve nitaghon ŋgar tsio.
5 Yau nanumeer Yoova ve naghurghur matag pani naghe ŋeez o iuul ghau?
Yau naghur ila saveeŋ mbuaaŋ tooni, tauta nasaŋan pa uleeŋ tau pale ivot.
6 Yau nasaŋan Yoova to iuul ghau.
Naghur matag pani imin yes tau tiŋginŋgin nugh pa mboŋ na, tighur matazi pa nughizau. Isaav ighe tighita aaz pisikia izaa, ene igham zi lolozi poia.
7 O yam Israela, anumeer Yoova ve aghur matamim pani pa uleeŋ.
Pasaa, i loolo isaghav tamtamon tooni ve iuluul zi.
Isaav ighe igham mulin ghiit pa pataŋani toit, ene pale iuul katin ghiit.
8 Onoon kat, i pale igham mulin iit Israela pa pataŋani toit,
ve ireu sosor toit isov ilale. *Mt 1:21; Lu 1:68