146
Tanumeer tamtamon sov. Tanumeer Maaron
1 Aleluia, tapait Yoova!
Yau naghe napakur Yoova toman lolog!
2 Saawe isov tau naleep izi taan, yau aat napait Yoova.
Pale namboumbou pa Maaron tsiau, ve napapakuru tauvene ila ila le irau saawe tsiau isov.
3 Anumeer yes daaba ve pooza sov. Yes tamtamon to taan mon.
Irau tigham mulin gham pa pataŋani tsiam mako.
4 Saawe tau avuvuzi isov ve timaat, yes aat timuul tizila taan.
Mako ŋgar tau muuŋ matazi iŋgali tighe tighamu na, imin kaut sorok. Irau ighur anooŋa mako.
5 Eemon tamtamon tau ighe inumeer Maaron to Yakop, ve ighamgham uleeŋ ila tooni, i aat loolo poia.
Pasaa, yes tau tinumeer Maaron toozi Yoova ve tighurghur matazi pani pa uleeŋ, ene aat poia to Maaron izazaa toozi.
6 Yoova ighur sambam, taan, ve te, tomania gabua naol isov tau tileep ve tigheen ila na. *Gnp 1:1+; Mbaŋ 14:15; Syg 4:11
Ve saveeŋ mbuaaŋ tooni isov, i pale maata iŋgali ve itaghoni irau saawe.
7 Yes tau koiazŋa titatan zi na, Yoova iyozyooz pazi ve iuluul zi pa pataŋani toozi.
Ve yes tau pitool igham zi na, i ighamgham lezi aniiŋ.
Ve yes tau tileep ila koiazŋa nimazi na, i ighamgham mulin zi. *Mbo 9:18, 37:17, 103:6, 107:9
8 Yes tau matazi kumkuuma na, i igham zi tighita nugh.
Ve yes tau pataŋani itatan zi na, i iuul zi, ve iit zi tizaa.
Yoova loolo ighengheen to zeran duduŋazi. *Mt 11:5, 11:28
9 I maata pa yes to nugh ite,
ve iŋginŋgin yes parooŋa ve zinaara pa lepoogh toozi.
Eemon iponpoon eez pa zeran sasaghati. *Igham 22:21+; Lo 10:18; Mbo 10:14, 18, 68:5
10 Yoova pale igham pooz irau saawe.
Yam tamtamon to nugh Zion, pooz to Maaron tsiam pale ighengheen tauvene iseeŋga iseeŋga gha ila.
Aleluia, tapait Yoova! *Mbo 93:1, 99:1; Syg 11:15
*146:6: Gnp 1:1+; Mbaŋ 14:15; Syg 4:11
*146:7: Mbo 9:18, 37:17, 103:6, 107:9
*146:8: Mt 11:5, 11:28
*146:9: Igham 22:21+; Lo 10:18; Mbo 10:14, 18, 68:5
*146:10: Mbo 93:1, 99:1; Syg 11:15