17
Livaa to eez tau ighegherev tamtamon pa ghamuuŋ ŋgar sasaghati
1 Ra yes aŋela liim ve ru tau tikis oon liim ve ru na, toozi ee ilam ve isaav payau ighe: “Ulam ve natotoi ghom pa atuya tau pale iŋarui livaa to eez tau mboole izala yaa tintiina naol pavozi na. *Livaa to eez ve nugh tiina Babilon, ene saveeŋ palelaaŋ ru tau izaa to nugh tiina Rom, tomania ŋgar maata maata to taan tau ighegherev tamtamon gha tighurghur murizi pa Maaron. Yaa naol tane, ene izaa to nughmariŋ to taan. Livaa tane mboole izala pavozi pasaa, i ta iŋgin zi. Nugh Babilon duduuŋ, le yaa katini tau tireer ila nugh loolo. Saveeŋ tane, puughu tauvene: Ŋgar to Babilon (o ŋgar sasaghati to taan) ighamgham pooz pa nughmariŋ.
Livaa tawe, i eeza tiina kat. *Yer 51:12+; Syg 18:1+
2 I ta ighegherev yes kinik to taan, ve yesŋa tighurghur boog. †Ghuruuŋ boog tane izaa to ŋgar tau taghur loloon pa gabua to taan, ma maaron karom eta, ve taghur muriin pa Maaron tauu.
Ve yes kinik mon mako. I ikau ŋgar to eval tiina tau tileep izi taan, ve titaghoni pa ŋgar tooni saghati le imin ta tighun vaen ariaaŋa gha ŋgar toozi ivaghamgham.” *Yer 51:7; Syg 14:8, 18:3
3 Ra Avuvu Patabuyaaŋ tapiri izaa tsiau, ve aŋela tawe igham ghau nala navot nugh ŋginaaŋa. Navot ta sewe, le naghita livaa ee ilepleep. Mboole izala gabua saghati ee paavo. Gabua tawe, tiini siŋsiŋai kat ve bodeeŋ naol irau tiini isov. Bodeeŋ tawe, ene imin eeza. Eeza naol tawe, pughuzi eemon. Pughuzi tauvene: I ivelegh Maaron ve ipait tauu eeza ighe i Maaron. Gabua tana, daaba liim ve ru, ve zooŋa saŋavul. *Syg 13:1-8
4 Livaa tawe inonogh ghi pa nonoghiiŋa poia kat tau ŋgereeta aindan ve siŋsiŋai. Ve itiik tauu pa gabua popoiazi naol imin gol, maet milmilia siriv ve ŋgool maata. I ikis rubruub ee tau tigharaata pa gol. Rubruub tawe, ivon pa ŋgar sasaghati naol, ve ŋgar to ghuruuŋ boog tau livaa tana ighamghamu. Ŋgar tauvene iŋgalaaŋ ila Maaron maata mako. Saghati kat. 5 Ve tibood livaa tana eeza ila ndaamo. Eeza tawe, saveeŋ palelaaŋ. Isaav tauvene:
“Ene nugh tiina Babilon. Zilivaa to eez, tomania tamtamon tisov tau tighamgham ŋgar sasaghati kat izi taan, i ta imin tinazi. Pasaa, i ta ipapazaagh zi pa ghamuuŋ ŋgar tauvene.” *Syg 14:8
6 Yau naghita livaa tana ighun le ŋgar tooni ivaghamgham. Pasaa, Maaron tamtamon tooni patabuyaaŋa tau tipariaaŋ Yesu saveeŋ tooni na, i ikaria ghunuuŋ siŋ toozi. I ta ipapazaagh tamtamon pa ravuuŋ zi timatmaat. Yau naghita, le nagham ŋgar naol ve ŋgar tsiau imbool. *Syg 6:9, 12:11, 16:6
7 Tauvene aŋela tana ighason ghau ighe: “Puughu mindai ta yo ugham ŋgar naol? Gabua saghati tau daaba liim ve ru ve zooŋa saŋavul, tomania livaa tau ileep izala gabua tawe paavo ne, ene ŋgara yoŋgaaŋa. Eemon yau aat napaghazoŋai ghom pani. 8 Gabua saghati tau yo ughita na, muuŋ i ileep. Ve aazne, ileep mako. Eemon malau mako pale izaa muul pa puura tau le puughu mako na. Ve ileep rig, o Maaron ivaghamunia gha ilale. Muuŋ geeg, saawe tau Maaron ighur sambam ve taan soone, tibood tamtamon tooni ezazi ila rau to lepoogh maata yaryaare wa. Tamtamon tisov tau ezazi igheen ila rau tawe mako na, yes pale tighita gabua saghati ve tirur pani. Pasaa, muuŋ, i ileep. Ve aazne ileep mako. Eemon murei pale ivot muul. *Dan 12:1; Syg 13:1+
9 “Tamtamon tau le ŋgar, i aat ighazooŋ pa gabua tane puughu. Gabua saghati tau daaba liim ve ru, ene izaa to loloz liim ve ru tau livaa tana ileep izala na. ‡Nugh tiina Rom igheen izala nugh mbua liim ve ru.
Ve izaa to kinik liim ve ru paam. 10 Toozi liim, uraat toozi isov gha tizi wa. Ve ite imin liim ve ee, tauta aazne ilepleep ve ighamgham pooz. Ve ite imin liim ve ru, i ivot soone. Eemon saawe tau ighe ivot, i aat ileep malau rig. 11 Gabua saghati tau muuŋ ileep ve aazne ileep mako na, ene kinik tau imin liim ve tol pani. Yesŋa kinik liim ve ru tawe, ŋgar toozi raraate. I aat ileep rig, o Maaron ivaghamunia gha ilale kat.
12 “Ve zooŋa saŋavul tau ughit zi na, ene izaa to kinik saŋavul. Eemon saawe toozi to ghamuuŋ pooz, ene soone. Pale tisaŋan le saawe to yesŋa gabua saghati tawe tigham tapirizi, o tilup zi, ve tiŋgin taan pa sooso rigmon. *Dan 7:24
13 Kinik saŋavul tawe, ŋgar toozi eemon. Ve yes pale tighur tapirizi tomania gabua tisov tau tiŋgin zi na ila to gabua saghati tana, leso tipaloti. 14 Ve yesŋa gabua saghati pale tilup zi ve tiparav tomania Sipsip to Maaron ve tamtamon tooni. Eemon pale tirao mako. Sipsip to Maaron pale iliiv zi. Pasaa, i tiina iliiv zimaronŋa tisov. Ve i kinik tiina tau iliiv kinik tisov. Tamtamon tooni, ene yes tau i tauu isiigh zi, ve ipoi zi timin i le, ve tikis ghuruuŋ ila toozi ariaaŋ.” *1Tim 6:15; Syg 16:14, 19:19
15 Ra aŋela tana isaav payau muul ighe:
“Yaa naol tau ughita livaa to eez mboole izala pavozi na, ene izaa to nugh mariŋ to taan tau tinizi, tomania gabuazi, ve aliŋazi ite ite. 16 Gabua saghati zooŋa saŋavul tau ughit zi na, ene izaa to kinik saŋavul. Murei pale yesŋa gabua tawe titoor ŋgar toozi, ve tighur koi pa livaa to eez tawe, ve tivaghamunia kat. Pale tiraŋgat nonoghiiŋa tooni le kambaŋmbaŋi, ve tighan miiza, mako tisiki izala yav ighani gha ilale. *Ezek 16:37+; Syg 18:8
17 Pasaa, Maaron ighur ŋgar igheen ila kinik saŋavul tawe lolozi wa ighe tilup ŋgar toozi imin eemon, ve tipuliir gabua tau tiŋginŋgin zi na ila gabua saghati niima. Leso iŋgin zi le irau Maaron saveeŋ tooni ighur anooŋa. Tauvene ŋgar tane pale ivot itaghon Maaron tauu ŋgar tooni.
18 “Livaa tau yo ughita na, ene izaa to nugh tiina tau ighamgham pooz pa kinik tisov to taan.”
*17:1: Livaa to eez ve nugh tiina Babilon, ene saveeŋ palelaaŋ ru tau izaa to nugh tiina Rom, tomania ŋgar maata maata to taan tau ighegherev tamtamon gha tighurghur murizi pa Maaron. Yaa naol tane, ene izaa to nughmariŋ to taan. Livaa tane mboole izala pavozi pasaa, i ta iŋgin zi. Nugh Babilon duduuŋ, le yaa katini tau tireer ila nugh loolo. Saveeŋ tane, puughu tauvene: Ŋgar to Babilon (o ŋgar sasaghati to taan) ighamgham pooz pa nughmariŋ.
†17:2: Ghuruuŋ boog tane izaa to ŋgar tau taghur loloon pa gabua to taan, ma maaron karom eta, ve taghur muriin pa Maaron tauu.
*17:2: Yer 51:7; Syg 14:8, 18:3
*17:6: Syg 6:9, 12:11, 16:6
‡17:9: Nugh tiina Rom igheen izala nugh mbua liim ve ru.
*17:12: Dan 7:24
*17:14: 1Tim 6:15; Syg 16:14, 19:19