21
21:1-14 Yu Lombili Andoli Yepoko Pakerando “Oma Lili Walena Oma Awisili Omba Suku Pupili Liengi.” Nirimu Kinie Likulie ‘Yu Yesusi.’ Ningu Kanoko Imbi Siringi Temanemo
1 Pe Yesusi Nomu Tapiriasi ⸤aku nomumunge imbi te Gallilli kanumu⸥ aku nomu kélona ‘Eno yu altoko kanangi.’ nimbe lombili andolime*bokumunge alsena anjokondo “10. disaipel”. moloringine orumu. Orumu kanoringi mele temanemo isipe:
2 Saimono Pita kinie, Tomasi (yunge imbi te Didimasi)†inie yakondo 20:24. yu kinie, kolea Gallilli disiriki Kena taono ye Nataniele kinie, Seperi malo talo kinie,‡Seperi malo talonga te iboku torumu ye Jono, te Jemisi. Mateyu 4:21 nimbe silimo. lombili andoli ye talo lupekinie, eno telune maku toko moloringi.
3 Saimono Pitane Yesusi lombili andoli marendo nimbendo: “Na oma li-pukuru.” nirimu kinie
pilkulie “Olio pea pamolo.” ningulie, nona andoli sipine ola puku, nomu awi-suku-singine puku oma lili walema ipulueli nona munduliku andoko kolea tangondoringi nalo oma te naa lsingi.
4 Kanu kinie ena mundi wendo ombá terimu kinie Yesusi no kélona angilierimu nalo lombili andolimene ‘Yu Yesusi.’ ningu kanoko imbi naa siringi.
5 Yesusini eno walsipelie nimbendo: “Nanga kangoma, oma mare lingiye?” nirimu.
Enone topondoko “Molo.” niringi.
6 Yuni nimbendo: “Sipi kumbikundu angilkulie oma lili walemo ki umbukundu nona manie mundengi. Mare manda linge.” nirimu. Kanu kinie yuni nirimu mele teringi kinie oma paa awisili walena omba suku purumu kulu sipine ola linge pereringi.
7 Aku terimu kulu kanopalie Yesusi yunge konopu mondorumu lombili andoli yemone§20,23-24 Ye kanumu Jono (boku Jono imunge pulu pulune gomo 449 kanokopilieni.). Pitando nimbendo: “Ne yemo Awilimu lepamo.” nirimu. Yuni “Ne yemo Awilimu lepamo.” nirimu kulu pilipelie Saimono Pita yunge wale-pakoli ola pakorumumu kongono tembando kulupe noserimumu kelepa lipe pakopa pukue topa nona manie pupe no lepa kélona ulsu purumu. 8 We lombili andolime sipine oma peke lepa perimu walemo kunduku meli Pita lombili akiliku puringi. Eno no kélona nondoko punge mele manda manjeli wane anderete mita mele lierimu kulu manda puringi. 9 No kélona ulsu pukulie kanoringi kinie tepe te nomba perimune oma mare kaloli perimu kanoko, pillawa kaloli mare lierimu kanoringi.
10 Yesusini enondo nimbendo: “Andi oma liku mengo okomelemanga mare mengo waa.” nirimu.
11 Kanu kinie Saimono Pita sipine ola pupe oma perimu walemo kundupe meli no kélona ulsu orumu. Oma walemo peke lierimu, oma walena sukundu wane anderete pipiti tere*oma 153, molo sepene paono tene kelepa tere, molotokapu talo pakera kelepa rureponga telu. oma paa awilime perimu nalo wale sungu naa nirimu. 12 Yesusini enondo nimbendo: “Langi ongo naa.” nirimu. Lombili andolimene ‘Iyemo yu sike olionga Awilimu.’ ningu pilkulie enonga ye tene “Nu naweye?” nimbe lipe su sipe walsipe naa pilierimu. 13 Yesusi omba pillawa kalolime lipe eno moke tepa sipe, pe omama aku sipe lipe eno moke tepa sirimula.
14 Yesusi kolopalie lomboropa ola molopalie, itepa molorumu, ou wale talo ‘Yu lomboropo ola we molio mele kanangi.’ nimbe lipe ora sirimu mele†inie yakondo 20:19,26. imu wale yepoko sipe terimu.
21:15-25 Yesusini Pitando “Altoko Lombili Ou.” Nirimu Temanemo‡Wale yepoko Pitane ou “Na Yesusi naa kanolio.” nirimu (inie yakondo 18:15-18,25-27). Pe kinié wale yepoko Yesusini Pita walsipe pilipelie “Na konopu mondolenoye?” nirimula. Yuni Pita siye naa kolopa, wale yepoko yundu “Nanga kongonomo tendani.” nirimu.
21:15-19 Yesusini Pitando Nimbendo: “Nanga Sipisipime Langi Sindei.” Nirimu Temanemo
15 Langi nongo pora siringi kinie Yesusini Saimono Pitando nimbendo: “Jono malo Saimono, iyemane na konopu mondolemele mele maniendopa, nuni na konopu mondoleno mele sike paa olandopaye?” nirimu.§21:15* Wale yepoko Pitane ou “Na Yesusi naa kanolio.” nirimu (inie yakondo 18:15-18,25-27). Pe kinié wale yepoko Yesusini Pita walsipe pilipelie “Na konopu mondolenoye?” nirimula. Yuni Pita siye naa kolopa, wale yepoko yundu “Nanga kongonomo tendani.” nirimu.
Pitane topondopa nimbendo: “Awilimu, sike nane nu konopu mondolio kanoleno.” nirimu.
Yesusini nimbendo: “Aku liemo nanga kongi sipisipi waloma*bokumunge alsena anjokondo “44. sipsip”. langi sindei.” nirimu.
16 Yesusini altopa wale talo sipe nimbendo: “Jono malo Saimono, sike nuni na konopu mondoleno molo moloye?” nirimu.
Pitane topondopo nimbendo: “Awilimu, sike nane nu konopu mondolio kanoleno.” nirimu.
Yesusini nimbendo: “Aku liemo nu nanga kongi sipisipime tapu tendei.” nirimu.
17 Wale yepoko sipe Yesusini Pitando nimbendo: “Jonomalo Saimono, na konopu mondolenoye?” nirimu.
Yesusini wale yepoko sipe “Na konopu mondolenoye?” nimbe walserimu mele pilipelie Pita konopu keri panjipelie nimbendo: “Awilimu, nu ulume pali kanoleno. Nane sike nu konopu mondolio nu kanoleno.” nirimu.
Yesusini yundu nimbendo: “Aku liemo nuni nanga kongi sipisipime langi sindei.” ⸤nirimu.⸥
18 “Nane nundu paa sike nimbu sikirumu: Ou nu kango kinie molkolie nu nunu wambale panjiku, nu nunu tenga punindu konopuni pilkulie purunu, nalo nu anda lekolie nunge kiselo sinio sini kinie ye tene lupe nunge wambale panjindipe, nu ‘naa pumbo.’ nini koleana memba pumbe.” nirimu. 19 Yesusini ⸤iungu iko torumu akumu⸥ Pulu Yemonga imbi lipe ola mundundumbendo Pita tonge kolomba mele nirimu.†Pita nambepa kolorumunje? Mimi sipu naa pilimolo nalo isiku pilku temane tolemele: “ ‘Pita kolopili.’ ningu ‘unjona ola uku topo panjemili.’ niringi kinie Pitane nimbendo: “Na ye kerimu molopolie nanga Awilimu kolorumu mele aku sipu naa kolambo.” nimbe “Na kimbukundu liku olando siku pengekondo liku maniendo siku unjona ola toko panjengi.” nirimu.” nilimele. Nalo sikenje, molokolonje. Aku nimbelie yuni Pitando “Na lombili ou.” nirimu.‡Mako 1:16-17.
21:20-25 Yesusini Konopu Mondorumu Lombili Andolimundu Nirimu Mele Temanemo
20 Pitane topele topa Yesusini konopu mondorumu lombili andolimu§23-24 ungu pulumu ya 21:7*. kanorumu kinie akilipe elo lombili orumu. (Pitane kanorumu yemo yu ou Yesusi pea langi nongo moloringi kinie yu Yesusi molorumune nondopa molopalie nimbendo: “Awilimu, olionga ye nawene nu opa puluema lipe simbeye?” nirimu kanu yemo.)*13:25. 21 Pitane kanu yemo kanopalie Yesusi walsipelie nimbendo: “Awilimu, ne yemo nambe-embaye?” nirimu.
22 Yesusini topondopa nimbendo: “ ‘Na kelepo yando ombóndo yu ou konde molopili.’ nindu liemo nunge kongonomoye? Nu na lombili ou.” nirimu.
23 Yesusini aku nirimu kulu pilkulie ungu te anjo anjo angenupilime ningu siringi mele isipe: “I lombili andolimu kolou naa kolomba.” niringi. Nalo Yesusini “Yu naa kolomba.” ni naa nirimu. “ ‘Na kelepo yando ombó kinie yu ou we konde molopili.’ nindu liemo nunge kongonomoye?” nirimu.
24 Kanu lombili andolimu yuni aku ulu wendo orumume pali kanorumu mele nimbe sipe bokune torumu. Kanu yemo olio pilimolo ‘Yuni kanorumu mele nimbe silimomo paa sike nilimo.’ nimbu pilimolo.
25 Yesusini ulu awisili terimume kepe. Ulu terimume pali bokune tolemelanje ima koleana si nilke boku akume manda naa nosilimelanje.
⸤Aku pea.⸥
*21:1: bokumunge alsena anjokondo “10. disaipel”.
†21:2: inie yakondo 20:24.
‡21:2: Seperi malo talonga te iboku torumu ye Jono, te Jemisi. Mateyu 4:21 nimbe silimo.
§21:7: 20,23-24 Ye kanumu Jono (boku Jono imunge pulu pulune gomo 449 kanokopilieni.).
*21:11: oma 153, molo sepene paono tene kelepa tere, molotokapu talo pakera kelepa rureponga telu.
†21:14: inie yakondo 20:19,26.
‡21:14: Wale yepoko Pitane ou “Na Yesusi naa kanolio.” nirimu (inie yakondo 18:15-18,25-27). Pe kinié wale yepoko Yesusini Pita walsipe pilipelie “Na konopu mondolenoye?” nirimula. Yuni Pita siye naa kolopa, wale yepoko yundu “Nanga kongonomo tendani.” nirimu.
§21:15: 21:15* Wale yepoko Pitane ou “Na Yesusi naa kanolio.” nirimu (inie yakondo 18:15-18,25-27). Pe kinié wale yepoko Yesusini Pita walsipe pilipelie “Na konopu mondolenoye?” nirimula. Yuni Pita siye naa kolopa, wale yepoko yundu “Nanga kongonomo tendani.” nirimu.
*21:15: bokumunge alsena anjokondo “44. sipsip”.
†21:19: Pita nambepa kolorumunje? Mimi sipu naa pilimolo nalo isiku pilku temane tolemele: “ ‘Pita kolopili.’ ningu ‘unjona ola uku topo panjemili.’ niringi kinie Pitane nimbendo: “Na ye kerimu molopolie nanga Awilimu kolorumu mele aku sipu naa kolambo.” nimbe “Na kimbukundu liku olando siku pengekondo liku maniendo siku unjona ola toko panjengi.” nirimu.” nilimele. Nalo sikenje, molokolonje.
§21:20: 23-24 ungu pulumu ya 21:7*.
*21:20: 13:25.