5
Kolomongo Awili 4-11 MULU KOLEANA SIPISIPI WALOMONE LEMO BOKUMUNGE PIPIME WENDO LSIMU KINIE MANA ULU MARE YEMBOMA-KINIE WENDO ORUMU TEMANEMA
Kolomongo Awili 4 Mulu Koleana Pulu Yemo Kapi Ningu Imbi Liku Ola Mundundoringi Temanemo
5:1-5 Jonone Boku Te Tambu Siringimu Kanorumu Temanemo
1 Pe na kanorundu kinie ye nomi kingimunge polona molorumu yemo yunge ki umbukundu boku panga teli te lierimu kanorundu, akumunge olakondo maniekondo pea imbi mare molopa, wale yepoko pakera wakaye leko tambu siringi. 2 Kanorundu kinie angello enge nili te molorumu kanumuni tondolo ru nimbelie nimbendo: “Yembo nawe molopa kondolemomone boku wakaye leko tambu siringime manda wendo limbeye?” nirimu. 3 Nalo mulu koleana kepe mana kepe mana sukundu kepe yembo tene manda wendo lipe, sukundu imbi molorumume manda kanomba yembo te molopa paa kondolemo yembo te naa molorumu. 4 Kanu kinie yembo molopa kondopalie manda bokumu wendo lipe kanomba yembo te naa molorumumunge kanopolie na kola awisili terindu. 5 Kanu kinie ye nomi wane paono po moloringimenga tene nando nimbendo: “Kola naa téa! Pilie! Juda Talapemonga Lopa-Posi LLayono,*Juda talape akumu Isirele yembomanga talape rureponga talape te. Lopa-posi llayono yu takera melemanga pali yu tondolo olandopa pelemomo. Akumunge ‘yu takera melemanga ye nomi kingi mele molemo.’ nilimele. Isirele yembomane pilkulie ningendo: “Pulu Yemone eno nokomba ye te lipe mundumbe ye nomi Kirasimu yunge imbi te Juda talapemonga Lopa-Posi LLayono” niringi. Yesusi yu akumu. Yu Judamanga talape ye tela. ye nomi kingi Depisini kalopa lsimu yemo,†Isirele yemboma ou nokorumu ye nomi kingi Depisi yu Juda ye te molorumu. ‘Pe yuni kalopa limbe ye te Isirele yembomanga kamu-kumu ye nomi kingimu molomba.’ niringi akumu Yesusindu niringi. yuni enge nimbe opa puluemo ⸤kamu⸥ topa manie mundorumu. Ye akumu molopa paa kondolemomone boku wakaye lieli yepoko pakera manda wendo lipe sukundu kanomba.” nirimu.
5:6-10 Jonone Sipisipi Walomo Kanorumu Temanemo
6 Kanu kinie na kanorundu kinie Kongi Sipisipi Walo‡bokumunge alsena anjokondo “44.3. Pikinini Sipsip Bilong God”. te ⸤angilierimu⸥ kanorundu. Yu kongi sipisipi toko kondoko nosilimele mele yu aku sipe molopa, yu ye nomi kingi polona awi-suku-singine angilierimu. Mele konde mololi kise kinie§inie yakondo 4:6-8. ye nomi wane paono po kinie yu liku sukundu munduku eno molko makaye teringi. Yunge pengena ola kongi kao ungú mele yepoko pakera wendo omba angilipe, mongo yepoko pakera angilierimu, kanu mongoma Pulu Yemo yunge mini yepoko pakera yuni ma koleamanga pali lipe mundorumu akume. 7 Kanu Kongi Sipisipi Walomo yu omba ye nomi kingi polona molorumu yemonga ki-umbukundu lierimu bokumu lsimu. 8 Lsimu kinie mele konde mololi kise kinie ye nomi wane paono po kinie yunge kumbikerena manie puku tamalu peringi. Eno yu-mele-mele gita mele mare ambolko, pellete kou-gollone teli, akune paura kaloringi kinie mune paa torumu pauramo peke liepili amboloringi.*inie anjokondo 8:3-5. Aku paurama Pulu Yemonga yembomanga pali Pulu Yemo popo toko mawa telemele ungume. 9 Enone konana konde te ningulie ningendo:
“Nu toringi kinie
yembo ungu lupe lupe lielime kinie,
kalu lupe lupe angilielime kinie,
talape lupe lupema kinie,
kolea lupe lupe molemelema kinie,†inie anjokondo 7:9, 10:11, 13:7, 14:3, 17:15.
nunge mememone
Pulu Yemo kinie tapu toko molonge aulkemo
akisinderinu‡bokumunge alsena anjokondo “3. baim bek”, “21. kisim bek” akumunge
nuni boku manda liku wakaye lielime wendo lini.
10 Nuni ‘Kanu yemboma olionga Pulu Yemonga
kongonomo tendangi!’ ningu
‘Pulu Yemonga popo tondoli yembo§bokumunge alsena anjokondo “34. pris”.
Pulu Yemo enonga ye nomi kingimu molopa
eno nokomba yembo talapemo molangi!’
ningu terinu,*inie yakondo 1:6. akumunge
eno ye nomi kingime molko
ma koleana melema nokoko molonge.”
niringi.
5:11-14 Sipisipi Walomonga Imbi Liku Ola Mundunduku Kapi Niringi Temanemo
11 Pe kelepo kanorundu kinie angello paa awisili ungu niringi ungume pilierindu. Angelloma kambu tolemelanje tausini kelepo olandopa tausini nimbu, milliono kelepo olandopa milliono nilimela. Akume ye nomi kingi polomo kinie mele konde mololi kise kinie ye nomi wane paono po†tokapu telu (24) kanumu; inie yakondo 4:4. kinie liku makaye teko sukundu munduku moloringi.
12 Aku angellomane tondolo mundukulie ningendo:
“Sipisipi Walo ou toko kondoringimundu
yembomane pali ningendo:
“Yu yemboma nokomba tondolomo kinie
yu kamako molomba mele kande kandema kinie
pilipe konginjelimu kinie engemo kinie
yu-kinie pepa kapola tepa,
yunge imbimu paa ola molopa,
tondolo pa telimu yu-kinie pelemo.” ningu
yu ange ningu kapi ninge kinie‡inie yakondo 4:11, anjokondo 5:13, 7:12. papu.”
niringi.
13 Kanu kinie mulu koleana molemele melema kepe, mana molemele melema kepe, mana sukundu molemele melema kepe, nomu-kusana molemele melema kepe, koleamanga pali molemele melemane niringi mele pilierindu. Enone ningendo:
“Ye nomi kingi polona molemo yemo kinie
Sipisipi Walomo kinie elondo:
“ ‘Molko kondangili!’ nimbu alieli kapi nimbu
imbimu paa olandopa molopa,
tondolo pa telimu kinie
yemboma nokomba tondolomo kinie
kamu-kumu elo-kinie pepa mindi pulimo pumbe.”
nimbu molamili!”
niringi. 14 Aku niringi kinie mele konde mololi kisene ningendo: “Paa aku sipe wendo opili!” niringi. Ye nomi wane paono pone manie molko tamalu peko kapi ningu elonga imbi liku ola mundundoringi.
*5:5: Juda talape akumu Isirele yembomanga talape rureponga talape te. Lopa-posi llayono yu takera melemanga pali yu tondolo olandopa pelemomo. Akumunge ‘yu takera melemanga ye nomi kingi mele molemo.’ nilimele. Isirele yembomane pilkulie ningendo: “Pulu Yemone eno nokomba ye te lipe mundumbe ye nomi Kirasimu yunge imbi te Juda talapemonga Lopa-Posi LLayono” niringi. Yesusi yu akumu. Yu Judamanga talape ye tela.
†5:5: Isirele yemboma ou nokorumu ye nomi kingi Depisi yu Juda ye te molorumu. ‘Pe yuni kalopa limbe ye te Isirele yembomanga kamu-kumu ye nomi kingimu molomba.’ niringi akumu Yesusindu niringi.
‡5:6: bokumunge alsena anjokondo “44.3. Pikinini Sipsip Bilong God”.
§5:6: inie yakondo 4:6-8.
*5:8: inie anjokondo 8:3-5.
†5:9: inie anjokondo 7:9, 10:11, 13:7, 14:3, 17:15.
‡5:9: bokumunge alsena anjokondo “3. baim bek”, “21. kisim bek”
§5:10: bokumunge alsena anjokondo “34. pris”.
*5:10: inie yakondo 1:6.
†5:11: tokapu telu (24) kanumu; inie yakondo 4:4.
‡5:12: inie yakondo 4:11, anjokondo 5:13, 7:12.