12
1 ⸤Kanu kinie⸥ mulu koleana suku ulu paa awili tondolo te ungu pulu perimu ulu te wendo orumu. Akumu isipe: Ambo te molopa, enamo mulu mele pakopa, olimu yunge kimbumuni kambilipe, pengena ambo nomi kuwininge wanie-kiraono te kombukandipi rurepo akune angiliepili pakopa molorumu. 2 Yu olona ambolango mondopalie, membando mindili paa awili tepa nomba perepa kalle nimbe molorumu.
3 Kanu kinie mulu koleana sukundu ulu paa awili tondolo ungu pulu perimu ulu te kelepa wendo orumula: Wambiye derekono paa awili kondoli te*Imu nambolka mele? Olio naa pilimolo. Wambiye pukupuku melenje nalo pukupuku kanga, yu awilinje. Yu Setene; inie 12:9**. molopa, yunge penge yepoko pakera angilipe, kongi kao ungú mele rureponga talo wendo omba, yunge pengemanga ye nomi kingimunge wanie-kiraono yepoko pakera pakopa molorumu. 4 Kombukandipime owe yepoko tepa topa, kanu wambiye derekonomo yunge álimuni kombukandipi owe te mulune ola topa mana manie mundorumu. Ambolango membá terimu ambomonga kumbikerena angilipe kanu ambolangomo ambomone kanopa limbe kinie nombando nokopa angilierimu.
5 Ambomone kango te kanopa lsimu. Kanu kangomo ma kolea yembo talapema pali paa tondolo mundupe nokopa molomba. Merimu kinie eno popenge teko liku kangulku Pulu Yemo kolea pali nokopa molorumu polona mengo puringi. 6 Ambomo kolea ku lielimunge sukundu lkisipe kowa pupe, kolea te Pulu Yemone ou tepa mimi tenderimu kolea akune purumu. Akune Pulu Yemone “Yu wale wane tausini tu anderete kelepa sikiti†Wale akume ponie yepoko kelepa oli sikisi mele. Inie anjokondo 13:5 aku ungu te molemola. molopili nokondangi.” nirimu.
Kolomongo Awili 12-20 KURUMENGA NOMI SETENE KINIE YUNGE TALAPE KURUME KINIE PALI PULU YEMONE KAMU TOPA MANIE MUNDORUMU TEMANEMO
12:7-9 Setene Kinie Angello Nomi Awili Maikele Kinie Opa Teringili Temanemo
7 Kanu kinie mulu koleana sukundu opa awili te wendo orumu. Mulu koleana angello awili Maikele kinie yunge mulu koleana we angelloma kinie wambiye derekonomo molorumune opa oringi. Derekonomo kinie yunge angelloma kinie kanokolie opa teringi nalo 8 Maikelenga talapemone eno toko mundoringi akumunge pe derekonomo kinie yunge angelloma kinie mulu koleana suku molonge kolea te naa lierimu. 9 Derekono tondolomo yu koronga-ou molorumu wambiyemo;‡Ou Pulu Pulu kolomongo awili 3. yu “⸤kurumenga nomi⸥ depelemo”§12 bokumunge alsena anjokondo “9. devil”, “42. Seten”. ningu; yu “Setene” nilimele yemo;*inie anjokondo 20:2. yu mana yemboma pali kondi topa “Lou leko aulke tenga lupe pangi.” nilimo yemo. Kanumu toko mana manie mundoringi, yu kinie yu lombili andoringi angelloma kinie toko mana manie mundoringi.
10 Kanu kinie mulu koleana sukundu ungu tondolo te wendo orumu pilierindu. Aku ungumu ru nimbelie nimbendo:
“Olionga angenupilime alieli
ipulueli kepe tangoli kepe
Pulu Yemonga kumbikerena kote tendelemo yemo
kinié mana manie toko mundongimunge
Pulu Yemo yunge tondolo pelemomone
‘Setenene olio naa ambolopa tepa kenjipe
mindili nolemela koleana naa memba pupili.’
nimbe, olio lipe tapondopa,†bokumunge alsena anjokondo “21. kisim bek”.
yu paa sike ye nomi kingimu molopa
yu melema pali nokopa molopa,‡bokumunge alsena anjokondo “20. kingdom”.
yu Pulu Yemone “Eno nokopa kondomba ye te
lipu mundumbo.” nimbe mako torumu
ye nomi Kirasimunge,§bokumunge alsena anjokondo “23. Krais”.
mele nokomba namba pelemomone
Kirasimu yuni melema pali
nokopa kondomba walemo kinié kamu wendo omu.
11 Kongi Sipisipi Walomone*bokumunge alsena anjokondo “44.3. Pikinini Sipsip Bilong God”.
meme ondo lenderimumu kinie
Pulu Yemonga ungumu ningu siku teringimu kinie
aku uluselone olionga angenupilime
enge ningu opa puluemo toko mundoringi.
Eno ‘mana molopo kondamili.’ ningu naa pilku,
‘opa puluemane toko kondongi liemo mandala.’
ningu pilieringimunge aku sipe
engemo perimu kinie aku teringi.
12 Akumunge nu mulu koleamo kinie
akune molemele yemboma kinie konopu siengi.
Nalo nu mamo kinie nu nomu kusamo kinie
depelemo akune manie purumumunge
eno-kinie umbune awili te wendo omu.
‘Pulu Yemone yu kamu topa mundumbe enamo
nondopa wendo ombá.’ nimbe pilipe
yu paa mumindili kolopa molemo.”
nirimu.
13 Wambiye derekonomo yu toko mana manie mundoringi kinie kanopalie pe kango merimu ambomo andopa pulu sirimu.†Ambomo tena molorumunje? Naa pilimolo. Mana molorumu kanopalie pulu sirimu molo wambiyemone kangamo tomba terimu kinie mulu koleana lteko yu toko mana manie mundoringi kinie kanopalie ‘Kangamo manda naa tombomonga ambomo tambo.’ nimbe yu molorumune pupe pulu sirimunje? 14 Nalo ‘Yu wambiyemone naa topili.’ nimbe kolea ku lieli sulu tenga lierimune yu ponie yepoko oli talo pakera molopili nokonge kolea te Pulu Yemone tepa mimi terimumu ‘yu akune mangopa yu kowa pupili.’ nimbe‡inie 12:6. ambo kanumu kera iliaka pou awili talo sirimu. 15 Yu kowa purumu kinie kanopalie wambiyemone ‘Yu none topa memba pupili.’ nimbe yunge kerena meku torumu kinie ambomo purumu aulkena no awili tepa topa pulu sirimu. 16 Nalo mamone ambomo lipe tapondopa ma awili tepa kengeya lepa wambiye derekonomone meku torumu nomo pali akune omba manie purumu. 17 Kanu kinie wambiyemone aku terimu kanopalie ambomo-kinie paa mumindili kolopalie ambomonga ambolango wema kinie opa temba purumu. Ambomonga ambolango kanume Pulu Yemone “Teaa.” nilimo ungu manema pilku liku tenge panjiku teko, Yesusinge ungume ningu siku molemele yemboma. 18 Wambiye derekonomo nomu-kusa kélona angilierimu.
*12:3: Imu nambolka mele? Olio naa pilimolo. Wambiye pukupuku melenje nalo pukupuku kanga, yu awilinje. Yu Setene; inie 12:9**.
†12:6: Wale akume ponie yepoko kelepa oli sikisi mele. Inie anjokondo 13:5 aku ungu te molemola.
‡12:9: Ou Pulu Pulu kolomongo awili 3.
§12:9: 12 bokumunge alsena anjokondo “9. devil”, “42. Seten”.
*12:9: inie anjokondo 20:2.
†12:10: bokumunge alsena anjokondo “21. kisim bek”.
‡12:10: bokumunge alsena anjokondo “20. kingdom”.
§12:10: bokumunge alsena anjokondo “23. Krais”.
*12:11: bokumunge alsena anjokondo “44.3. Pikinini Sipsip Bilong God”.
†12:13: Ambomo tena molorumunje? Naa pilimolo. Mana molorumu kanopalie pulu sirimu molo wambiyemone kangamo tomba terimu kinie mulu koleana lteko yu toko mana manie mundoringi kinie kanopalie ‘Kangamo manda naa tombomonga ambomo tambo.’ nimbe yu molorumune pupe pulu sirimunje?
‡12:14: inie 12:6.