6
1 Na* Pulu Yemo kinie kongono tapu topo tepo molopolie ya nindu ungu kanumunge ungu te pea ene tondolo mundupu nimbú tekero: “Ene Pulu Yemone we kondo kolopalie ⸤ene lipe taponjipe tepa konjirimu ulu kanumu⸥ ‘We naa terimu. Terimu ulumu we manie naa pupili.’ niengi. ⸤Ou ene we kondo kolopalie lipe taponjirimu kinie moloringi mele kinié aku sikula molangi. Konopu alowa teko ulu pulu peangama naa teko molonge kinie kapola naa temba.⸥” nikiru. 2 Aku nikirumunge ungu te Pulu Yemone nimbendo:
“Nane ene we kondo kolombo terindu walemo
wendo orumu kinie
enenga ⸤ungu niringime⸥ pilirindu.
Ene mindili nolemelka aulkena wendo lipu
na kinie pea molko konjingí aulkena
lipu monjimbu walemo wendo orumu kinie
ene lipu taponjirindu.”*
nirimu. Nane ene paa nimbu sikiru: Pilieme! ⸤Pulu Yemone nirimu wale akumu paa kinié.⸥ Kinié Pulu Yemone yamboma we kondo kolomba walemo. Kinié Pulu Yemone yamboma lipe taponjipe, mindili nolemelka aulkena wendo lipe yu kinie pea molko konjingí aulkena lipe monjimbe walemo.**
3 ‘Nanga kongonomo manie naa pupili, ungu taka naa tonjengi.’ nimbu yambomane na kanoko keri kanoko ungumu naa pilku lingí ulu te naa telio. 4 Akumu molo. ‘Yambomane na kanokolie ‘Pulu Yemonga kendemande yemo molio.’ ningu piliengi!’ nimbu aku telio. Na kinie ulu mare wendo olemo kinie telio mele kanokolie ‘Yu sike Pulu Yemonga kendemandemo.’ ningu pilingí uluma i sipe:
⸤Umbunime⸥ na ⸤kinie wendo olemo kinie
‘Siye tekemo.’ naa nimbu⸥ tondolo mundupu molio;
ulu umbuni lupe lupema na kinie wendo omba,
na teko kenjilimele uluma wendo omba,
na mindili sipu molio uluma wendo olemo.
5 ⸤Wale marenga⸥ enene na kopene toko,
⸤wale marenga⸥ ka siku,
⸤wale marenga⸥ yambomane pali na kinie mumindili kolko
ru ningu lkisiku sukundu sukundu ongo maku toko
na teko mundu mongo tenjilimelela.*
Na kongono mindili sipu tepo,
⸤wale marenga⸥ uru naa pepo,
⸤wale marenga⸥ engelene kolopo moliola;
6 ⸤yambomane na kanokolie ‘Pulu Yemonga kendemande yemo molemo.’ ningu pilingí mele i sipela:⸥
Na ulu kake telime tepo,
pilipe konginjili peangamo ambolopo,
ólo áme topili molopo,
yamboma kondo kolopo tepo konjilio;
na Mini Kake Telimu kinie tapu topo molopo,
yamboma konopu monjilio ulu akumu
kolo naa topo paa sike konopu monjilio;*
7 sike unguma nimbu,
Pulu Yemonga engemone kongono telio;
yamboma opa tengendo ele tolo melema
ki ekendo ekendo ingi siku ambolemele mele
na aku sipu ulu sumbi nilime ambolio;*
8 yambo marene nanga imbimu ambolko ola linjiku,
marene nanga imbimu toko manie munduku;
marene nanga ungu bulkundu ninjiku,
marene na kapi nilimele.
Kongono sikema sumbi sipu telio nakolo nando
“Kongonomo nu kolo toko tekeno.” nilimele;
9 yambomane na kanoko imbi silimele nakolo
“Pea molamili.” naa ningu, bulu silimele.
Wale mare ‘Paa kolkoro.’ konopu lelio nakolo
konde pupu we molio.
⸤Na telio mele kanoko keri kanokolie
‘Munduku kelko konopu alowa teani.’ ningu⸥
pulsene tolemele nakolo na toko naa konjilimele.
10 Na taki taki konopu keri aisili pelemo nakolo
‘Akumu yu tepili.’ nimbu konopu sipu molio;
koropamo molio nakolo yambo lupema
‘Kamakoma molangi.’ nimbu aulke te akisinjilio;
mele teluri kepe naa nosilio nakolo
mele aisili pali nosilio.
⸤‘Yambomane na kanokolie ‘Yu sike Pulu Yemonga kendemandemo molemo.’ ningu piliengi!’ nimbu aku sipu tepo molio.⸥
11 Korini yamboma, nane ungu te lopi naa tepo, pali enendo nimbu para sikiru. Nane ene paa lakopo konopu monjilio. 12 Nane ene ‘Kondo naa kolopo siye kolambo.’ paa manda naa nilio nakolo enene na ‘Kondo naa kolopo siye kolamili.’ nilimele⸤monga konopu teluna naa pupili molemolo⸥. 13 Lapalini enenga ambolangomando nilimele mele kinié nane ‘Ene nanga ambolangoma.’ nimbulie enendo i sipu nikiru: ‘Nane ene konopu aili tepo monjilio mele enene na aku siku konopu aili teko monjengi.’ nimbu nikiru.
14 Kirasinge yamboma ‘Kirasi sike’ ningu naa pilimele yamboma kinie teluna tapu toko naa andoko, tapu toko kongono naa teko, bisinete tapu toko naa teangi.* Ulu pulu kerime kinie ulu sumbi nilime kinie liku tere lelko manda kongono tengeleye? Pa telimu kinie sumbulu tolimu kinie elte** nambe teko tapu toko molongeleye? ⸤Akumu paa kapola molo⸥ kene ⸤teluna tapu toko naa molangi.⸥ 15 Kirasi kinie kurumanga nomi tepa kenjili ⸤Setene⸥* kinie konopu teluna pupili molembeleye?** Kirasinge ungumu pilimele yamboma kinie Kirasinge ungumu naa pilimele yamboma kinie konopu telu sipe pelemoye? 16 Pulu Yemo molemo ulke tembelemonga ulke suluminia kake teline kuru koyonge melema manda mengo puku popo tongeye?* Olio, konde molopa mindi puli Pulu Yemonga suluminia kake telimu molemolo,** yu olio kinie molemo kanumu. ⸤Yu kinie aku sipu molemolo⸥monga ungu te Pulu Yemone ou nirimu kanumu. Yuni nimbendo:
“Na nanga yamboma kinie teluna tapu topo molopo,
enenga suku singine molopo ene pea andomolo.
Na enenga Pulu Yemo molombo;
ene nanga yamboma molonge.”***
nirimu. 17 ⸤Ya nikiru⸥ akumunge
‘Ailimuni nimbendo:
“⸤Ulsukundu yamboma kinie, we melema anjiku
kapi ningu popo tolemele yamboma kinie,⸥
ene kinie teluna naa molko, munduku kelko
puku kolea tenga lupe molopangi.”*
“Kalaro mololi melema ⸤ulsukundu yambomane
anjiku popo tolemele melema⸥ kinie
ulu pulu keri pelemo melema kinie kanuma
naa ambolko,
aku melema kinie ulu te naa teai.”**
“Naa ambolonge kinie nane
“Molamili wai.” nimbu ene yando limbu.”***
18 “Na enenga Lapamo molombo,
ene nanga ambolangoma molonge.*
Na Pulu Yemo, melemanga pali engemo
pelemo yemone** aku sipu nikiru.”*** nirimu.’
kanumu.