7
Stiven wari kaunsil arantagim ganang midi togu'
Ka Stiven wari Juda ning kaunsil arantagim ning dimisi' ganang u adeinga pris girii tim iyak wari Stiven u ning anigagu', ma' midi ki ka u tonga yaring udi beng guk wa ma mokngang. Ka Stiven wari ning togu', o kuyane babangne indining papane ning bumara' kabi' toutik u mera nakni'. Wa ning, timinggi' sini' Juda aming indining papani' Ebraham adi Haran yongga' ko mo' anga yoring ki ka kama tubo Mesopotemia unggung ko yagu' ganang ka Anutu kigineng guk kunim ganangni wari Ebraham ganang kadofingamgu'. Kadofinga ning anigu', gu yong ki a arantagimga i ibinga marara kama nua'ni ka naga gangtintingnotik waraga' maya'. Ning aniinga Ebraham adi ninaksa' tanga marara kama tubo Kaldia u kabinga beni tangandang u nagiknanga Haran yong ubu anga yagu'. Ka inga' beni wari kumoinga Anutu wari nua'bu anigareinga Haran yong u kabinga marara kama ka inga' indi i mirira ikem yaraga' ubu abugu'. Ka wara'ganang wa Anutu adi Ebraham u na kama dibing ka gata' sini' bemna waraga' kabigamirik kong ning wa urap mo' anigu', mokngang. Ka Anutu adi Ebraham wari saba nii guk mokngang sigesa' ko yagu' ganang ka midi ning anigu', kama ka i marerotang yaraga' wa beng sini' ning ganotik, inga' na kama ka ya gu a guning papage arantagim guk sidita' wadigi' kabisamok, midi ka ningsa' wa giri anigu'. Ka kama i kabiam wara'ning kadapmang waraga' wa Anutu adi ning togu', ka guning arantagim adi aming arantagim nua'ni ning kamaganang miririp ning anga ikni'ga'. Ikinga aming arantagim nua'ni wari anasining kane ganang manggara kukyapma ning tanga kama paramu' sini' ka gurak fo handret ning u mamareng guksa' ira ani'ga'. Ka aming arantagim ka mamareng u kabiamni' wa na kagaya kura'bu kabiamok. Ning tinga guning arantagim adi kama ka u kabinga tubobu abanga kama ka yara'ganang mera nagata' siring ibang nua'bu tonama ikni'. Ning tanga Anutu wari adi yotangkayap waraga' midi totangka tugu' u tiptangka waraga' wa Ebraham ga' kadapmang tang nua'ni ka fugu giknim dudop wara'ning u anatintingnegu'. Wara' inga' Ebraham adi saba kabasi' Aisak u ibenga kama eit ning ibinga saba kabasi' wara'ning fugu giknim u dopmaminga wap Anutuning arantagim ning ubu kadofigu'. Ka Aisak wari giranga inga' Jekop ibenga undu' fugu giknim dopmamgu'. Ning tinga inga' Jekop adibu Juda indining papane arantagim 12 u ifakadofinga undu' fuksi' giknim ningsa' dopiamgu'.
Ka papane 12 adi kuyasi' nua'ni ka Josep wa babangsi' wari adita'sa' nakarugu' u kanga kagurida tanga bema aming arantagim nua'ni ga' ima uningkim mambong bemging. Ning tinga adi bema tonga kama tubo Isip do kamiinga adisining kane aming sige slev ning ubu kadofinga tanga yagu'. Ka Anutu wari Josep ganang ira 10 yotangkangam tanga nasi' mamareng kuni' kuni' wari adiganang kadofingamgu' wa udangam tinga karengsa' itarugu'. Ning tanga Anutu wari Josep ga' sasuk kareng amiinga Isip ning girii Fero wari Josep wa aming didimeng kareng ning ubu kanga kama Isip a ananing mambong girisi fam u yaptatora wara'ning girii ubu kamiinga tanga yagu'. 11 Ning tanga ira anganga inga' tugumung girii wari kama tubo Isip a Kenan indu' dabiksa' kadofiinga aming wari mamareng girii bema yaging. Ka wara'ganang ka indining papane adindu' seksi' naknga nana ga' wena tiging, ka mokngang. 12 Ka inga' babangsi' Jekop wari midi ne ka Isip wa nana kabi'guk giri ning toging u naknga nana anga to waraga' wa mindine arantagim ka indining papane u yangkareinga marara Isip ga' aging. 13 U anga abanga iya' nua'bu aging ganang wa Josep wari kuyane arantagim u kapmo' ira fentarugu' u yangtuagu'. Ning tinga girii Fero adindu' Josep ning arantagim u wara'ganang yapkedagu'. 14 Ning tanga inga' Josep wari beni tangandang Jekop guk ka arantagimni usap sini' ka 75 ning dabik wari Isip ga' wadigi' mugo waraga' midi kamigu'. 15 Ning tinga Jekop kurene dabiksa' adi marara anga Isip do ubu yaging. Ira ning tanga Jekop anagok ka papane arantagim wara'guk dabiksa' wa kama tubo Isip do ira kumara kumara anganga bisasu'neging. 16 Ka inga' tubobu mabiging ganang wa adisining arantagim wari fuksi' kungkumosi u tubobu manggara fabanga kama ginang nua'ni ka Sekem yongganang u ipmiging. Kama ginang ka wa kama dibing ka timinggi' papasi' Ebraham wari Hemo ning arantagim ganang uningkim mambong wari to tanga kabigu' wara'ganang u dasiapking.
17 Ning tanga ira anganga Isrel indining papane arantagim ka Isip u anga yaging wari siamo' mirira arantagim wari girii sini' ubu kadofigu'. Ning tinga midi ka tim Anutu wari Ebraham ning arantagim wari girii kagadofi ga' anigu' wari beng guk kadofonga tugu'. 18 Ka inga' Isip ning girii king nua'ni wari ubu kadofigu'. Ka king adi Josep wari adining kama Isip u yotangka wara'ning kane kareng tanga yagu' u kigeda guk mo' tugu'. 19 Ning tanga adi Josep ning arantagim Isrel aming u kafakafa guk mo' ubu tiapku'. Mokngang adi mandaga' iramira mamareng girii kabiamgu'. Ning tinga Isrel aming adi mamareng waraga' mutu tanga saba ibenga kapmo' sisep ga' sura fugang igukinga kumakiam sa' fatiaging. 20 Ka u tanga wa Moses undu' ibeging. Ka Moses wa Anutuning sasuk ganang wa kane guk wara' adi saba kabasi' sige ning mo' kagu'. Ka mengni wari Moses u ibenga wa mayap famineng wa anasining yak ganang unggung katatoranga yagumu'. 21 Ka inga' mamareng waraga' tanga ugumak ma tini' ning tonga mutu tanga saba kabasi' u bema tonga fugang kapmo' ubu sepkumu'. Ning tinga inga' king Fero ananing ibingini wari' katuagu'. Katuanga anata' wadigi' ubu bemnanga tonga tipgiragagu'. 22 Ning tanga Isip anasining midi a sasuk karesi fam u aninggeksasu'neinga Moses adi aming kane kareng kuni' kuni' titi a midi kigineng tutugu wara'ning tangkunang guk ning kadofinga yagu'.
23 Ning tanga iya' Moses adi aming sini' gurakni foti ning kuma' ira adining amine Isrel ka Isip ning kalabus kane kagaya fatiaging u iyap ga' kaba marara anga yap tonga agu'. 24 Anga kadofinga yapku' ka Isipni aming nua'ni wari Isrel aming nua'ni u uku'. U kanga Moses adi Isrel amingni u yotangkangama marara Isipni aming u wadigi' ugumogu'. 25 Ka Moses adi ning suku', a girisa' naning arantagim Isrel adi napa' i tirik i kanga o aming ka wa Anutu wari indi kane kagaya tanga ikem i yotangkanip ga' ba anigaranimara' ning tonga nagata' ba nakanting ning suku'. Ka mokngang Isrel aming adi kuma' kanga adita' guk mo' naking. 26 Ning tanga abanga deia' kamindapking tubobu marara agu'. Anga yapku' ka ananing amine fama' Isrel anasa' ami' tugumu'. U yapma kusefaim tonga ning yanggu', ai kuyane fama' sidi sidasa' guk wa nasi'ga' amiamu', ning mo' tantamu'. 27 Ka aming ka amingni uku' wari Moses u tarakayonga ning kafang anigu', ai gu wa nisi'. Nisi' wari gipmanga' girii wa, wara' gu indining kadapmang u kanga tagagarenibonga tarang. 28 Gu kap Isipni aming ugumogung ning wa nagabu ba nuronga tarang ning anigu'. 29 Ning tinga Moses adi midi ka u naknga o napa' kapmo' tuguk u kuma' ba naptuanga toing ning tonga mutu tanga bima tugu'. Bimanga Isip yong u kabinga kama kamani ka Midian tara' waraga' mugogu'. Anga anapmo' naro'sa' ira anganga taming ubu sananga saba ami fama' ifakadofinga ning tanga unggung itarugu'.
30 Ira anganga kama paramu' sini' ka gurak foti ning ibinga ka fiking nua'ni ganang ka Moses wari kama bining sigesa' kama bubo Sainai wara'ning du' ganang u fengaronga mugogu'. Anga kagu' ka kudip wari firi nua'ni ning sasa' ka' furo'ning u aradagu' ka Anutuning kunung aming ensel nua'ni wari kudip wara'ning bining ganang u kadofingamgu'. 31 Ka Moses adi kudip u kanga base tanga kafakafa sini' kadidimonga du' unggung ubu anga naku' wa girii wari kudip wara'ning bining ganang ira midi ning anigu', 32 ai Moses na Anutu ka guning papage Ebraham a Aisak a Jekop u yaptatoretik wari ira ganarik ning anigu'. Ka Moses adi midi ka u naknga paparap senga firi u kaga ga' mutu tanga mungkupna sa' tanga adegu'. 33 Ning tinga girii wari ning anigu', kama ka ya naga kadofinga maretik wara' kuni' nua'ni sini' ning kuma' igita', ka gu kaga giknim wa kifanga yuguk te'. 34 Ka i ganotik i nake', na naganing arantagim wari Isip do mamareng girii bema iking wa kuma'sa' yabarik. Adi mamareng u bema nagata' mak kaking u kuma' naknga yotangkayap titi waraga' sura afarik. Ka na yotangkayap titi waraga' wa gu gangkarotik wara' gu mamarak tanga Isip ga' tubobu aya' ning anigu'.
35 Ka Moses ka wa tim Isrel amine wari kadagang ning tonga a gu indining girii iikga' wa ni' wari gipmigu' ning aninga bibi' kuma' nakngamging unggungsa' ka Anutu wari adiganang kadofinga ensel ka firi kudip dagu' wara'ning mini sanom ganang ning anigu', gu Isrel aming ning girii a yotangkayap aming ning gipmirik. 36 Ning tinga Moses adi tubobu anga Isip do kane tangkunang kuni' kuni' kabi'mo' u tanga Isrel arantagim u inagira abiging. Abanga ning tanga gwang ka wap Gwang Giming a kama bining sigesa' wara'ganang kama paramu' gurak foti ning yaptatoranga ira abiging wara'ganang undu' kane tangkunasi milaikel kabi'mo' tiamgu'. 37 Abanga Moses ka warisa' Isrel aming u midi nua'ni ka ning yanggu', inga' Anutu wari sidining kuyasi' nua'ni u bema profet nua'ni kamiinga naga saptatoranga itik ning ira saptatoranga awa'. 38 Ka indining papane wari kama bining sige ganang bak tinga Anutu wari midi tangkunang ka ka' iyak titi wara'ning u imonga wa Anutuning kunung aming ensel wari kama bubo Sainai ganang Moses ka waraga'sa' amigu'. Ning tinga adibu papane ga' iminga papane adibu indita' nimging.
39 Ka Moses adi gi' iik waraga' kadapmang kareng ning kuma' tiama abugu' de ka papane adi adining midi ga' bibi' nakngama manda ukngama Isip ga' tubobu mugo ga'sa' fatoyaging. 40 Ning tanga Moses ning kuyang kabasi' Eron u ning aniging, o indi Moses ka indagik tanga abugu' wa irosi sini' ba tem wara' gu napa' tangkunasi fam ka indi katangka waraga' tinime' ning aniging. 41 Ka wara'ganang Eron wari bulmakau nano uuring nua'ni tanga wari adisining Anutu mandaga' ning ikyaminga adi napa' ka anasining kafasi' wari tiging u kigineng sini' ning kanga waraga' mandaksi' upma napa' karesi fam tangama ning tanga mesisiringa fatangamiaging. 42 Adi kadapmang ka ning u tiging waraga' tanga Anutu wari manda ukiamgu'. Ning tinga adi napa' ka ka' iikning guk mokngang ka furo'ning kuta ikiting mayam a mayap a bam ningwara'' ga' mandaksi' upma mesisiringa tiamging. Ka kadapmang ka u tiamging waraga' wa midi nua'ni ka umpang ka tim profet wari kuma' yoking wari tuguta' wa ning,
“o Isrel aming sidi tim kama bining sige ganang kama paramu' sini' gurak foti ning ira sidining napa' kareng nua'ni ga' sura tangsana tanga keng dipminga seging wa nagata' mo' sura tanamging. Mokngang sidi murak mandaga'ga' tiamging. 43 Ning tanga murak mandaga' ka Molok ning sel yak manga a Refan ning bam uuring u tanga manggara fengakiaging wa sidi mesisiringa tiam waraga' tanga tiging. Ka sidi kadapmang ka ning u ting wara' na sidining kamaganang i sangkagarenga kama kamani ka kama tubo Babilon tara' do waraga' sangkararik ning yoking.”
44 Ka tim indining papane wari kama bining sigesa' ganang yaging wa sel yak nua'ni ka Anutu wari wara'ganang ita' ning tonga mesisiringa tangam waraga' undu' kuma' manga yaging. Yak ka wa didimeng ka Anutu wari tim Moses kuma' anatintingnegu' wara'ganangsa' nakedanga maging. 45 Ka adi siring yak sel wara'guk ningsa' ira anganga kumara kumara bisasu'neinga inga' Josua wari adisining iri ka indining papane arantagim ubu yaptatoregu'. Ning tanga kama ka aming arantagim nua'ni ning u bemnanga iik waraga' siring yak sel ka wara'guk bema inagira abuinga Anutu wari kama tuang u yangkagareinga adi kama u wara'ganang kadofinga bema yaging. Ning tanga adi siring yak sel wara'guk ko ningsa' ira anganga inga' Devit wari ubu kadofigu'. 46 Kadofinga ira kadapmang karengsa' tanga yagu'. Ning tinga Anutu wari Devit ga' siamo' naku'. Ka Devit adindu' Anutu ga' napa' kareng ni tangamonga wa Anutu u ning anigu', o gu papane Jekop ning Anutu girii wara' na guta' mesisiringa tagam wara'ning yak didimeng undu' naro'sa' magamotik. 47 Ka mokngang, Anutu adi urap mo' aigangamgu' wara' Devit ana mo' magu'. Inga' Devit ning mindingni Solomon warisa' wa giri mangamgu'.
48 Ka beng sini' Solomon adi siring yak tempel udi giri magu'. Ka Anutu girii sini' adi yak ka aming wari mating wara'ganang iikning guk mokngang. Ka midi ka Anutu wari aming ning yak ganang iikning guk mokngang waraga' tim profet wari tokadofiinga yoking wa ning,
49 “girii wari ning tora', kunim wa naga marekitik wara'ning tare. A kama wa naganing kana wari tipminga marekitik wara'ning bintip ning adeta'. Ka sidi nagata' yak manamting wa indining da'ning amanga marerotik. 50 Mokngang, napa' girisi girisi ka kunim a kama u torik wa naning kafana warisa' tuguk wara' na yak kabasi' ganang marek ning guk mokngang ning yoking.”
51 Ning tanga Stiven wari Juda ning kaunsil arantagim u ning ifangyanggu', sidi aming midi karangkang titisi beng sini'. Sidining kabaksi' a sasuksi' wa aming ka kangkam ganang sini' ikiting ningda'ning iking. Sidi kadapmang ka Anutuning mini unggo tarakayo ning u fiting wa kadapmang ka tim sidining papase wari tanga abiging u torik ning sini' tanga iking. 52 Ka sidining papase adi Anutuning profet timini ka ni kagabi sa' guk mo' tiging. Mokngang adi kadagang sa' iramiksasu'neging. Profet adi midi kareng ka aming girii didimeng kareng wari abubu wara'ning u ituayaging de ka papase adi dipmisasu'na sa' tiging. Ka sara inga' sini' yara'ganang wa aming didimeng ka wari kadofiinga undu' sidasa' tipkadofinga ugumoging. 53 Beng sini' sidi Anutuning kadapmang tang wa aming warisa' mo' sangging. Mokngang wa Anutu ananing kunung aming ensel wari sini' tabanga samging, ka sidi ninak tanga yara guk mo' fiting ning yanggu' Stiven wari.
Juda aming wari Stiven uningkim kwak wari ugumoging
54 Ka Juda ning kaunsil arantagim adi Stiven ning midi wari kabaksi' u iidefi sini' tugu' u naknga banaksi' giptanga midi kagaya toging. 55 Ka Anutuning mini unggo wari Stiven ganang u tona sini' tinga Stiven wari kunim ganang kuta taranga kagu' wa Anutuning diok kigineng wari sarengsa' adeinga Jisas wari Anutuning kafong kareng ganang girii ning kigineng guk adegu'. 56 U kanga ning togu', o u kani' kunim wari tubo kidagang tinga Amingning Tim Iyak wari Anutuning kafong kareng ganang tara' adera' kuta kani'.
57 Ka Juda aming adi midi ka wa Anutu anikige ning midi mumungguk kadagang sini' ning naknga bibi' sini' naking. Ning tanga maasi' isefinga ku bang katinga marara abanga sasaro' tiging. 58 Suronga yong girii wara'ning sinim fugang nagira tamanga aming ka tim midi sige animbeging wari Stiven uronga adisining kwi' paramusi u kifanga manggara saba uyamang nua'ni wapni Sol adining kayong ganang kukngaminga yaptatoraima adegu'. Ning tanga adi uningkim kwak manggara Stiven u uking. 59 Ka adi Stiven u arauking ganang ka Stiven adi ibang ning togu', o girii Jisas gu naganing urana i beme'. 60 Ning tonga mangfanga mungkupnanga mera ku bang ning katigu', o girii gu i nuking yaraga' mamareng kura' tubobu mo' tiamotang. Ning tonga kungkumak wadigi' tugu'.