Folo yana leta anavelu TESALONAIKA tovetumagana agaidiya
Hida Tesalonaika tovetumagana yadi leta anavelu Folo aimo Kolinita againe gimiyami tu giꞋetoladina. Vaikohi tufona hihegedi tu valeyadi ginogalina, higa Yesu Keliso yana yewaꞋela faꞋina miTesalonaika tufoidi nuwadi gifani. Hivaitana tovai-nadi ahe gidalakayemu ada hivebutu himiya-kawokawowo.
Hida leta againe Folo gikivetuvetunudi higa nagona Setani yana kaliva koyo-moꞋena ginafaiwala be kaliva moyaꞋaidi ginanuwaꞋabiyedi-yo dewa koyona ginatubuga-moꞋa, tu muliya Kaiwabu Yesu Keliso ginayewaꞋela be koyodiyao adi agolaufofola hinanuhagana. Kadu Folo gigahevagadonedi be miya-kawowo hinasena tu igibagiba againe hinahawahegedi.
Lusiule. 1:1-2
Vesiule yadi atuvefaꞋila faꞋina kadu adi tokivekoyo adi agolaufofola faꞋina. 1:3-12
Kivetuvetunu Setani yana kaliva koyo-moꞋena yana yemu kadu Yesu yana yewaꞋela faꞋina. 2:1-17
LauꞋage igibagiba ana itaveꞋavina faꞋina. 3:1-15
Lukafoi. 3:16-18
1
Yo siule tobohiyameyao Yaubada yana yoꞋogaga Tesalonaika againe kalivai-mina. Ime Folo Sailosi Timoti yami leta aꞋetoladina be wanaꞋitana. Omi higa Yaubada Tamada kadu Kaiwabu Yesu Keliso yadi kaliva yadi vevine. Yaubada Tamada kadu Kaiwabu Yesu Keliso hinanuwadogemi kadu aseꞋasemi hinakiveniwalovina.
MiTesalonaika yadi atuvefaꞋila faꞋina toꞋetoladi hivesiule.
Keke gavana faꞋina tu gilubodana be tova moyaꞋaina Yaubada againe omi faꞋimiya anavesivesiule. E, giluboda-moꞋena be omi tobohiyameyao Yaubada yana yoꞋogaga agaidiya ma faꞋimiya anavesivesiule, faꞋina yami vetumagana gitubutubuga gitubutubuga kadu moyaꞋaimi saꞋeyana saꞋeyana veꞋahawahawahega againe watutuveguvegulami. Medede amine wahuluhuluva faꞋina, Yaubada yana yoꞋogaga melala tulina tulina agaidiya omi faꞋimiya agagakahikahi agayo, “Badi tovetumagana Tesalonaika againe aulolo tagiya moyaꞋaina kaliva nimadiya hinuhagana tu au aiꞋadi yadi wavetumagana hiꞋatuꞋatuvefaꞋiledi.” Hidedemi agahe. 1Te 1:2-3 1Te 2:19-20
Yaubada yana laufata faꞋina.
Tova adamoya aulolo tagiya kaliva nimadiya wanunuhagana. WaꞋita, Yaubada yana laufata au tunutunugina ma yami atuvefaꞋila mena vita tulina tulina agaidiya giseyemaunena. FaꞋina aimo tova mulina Yaubada ginagahemi ginagayo, “Omi yaku yoꞋogaga kalivai-mina faꞋina aulolo kaliva nimadiya wanuhagana. WaꞋatuvefaꞋiledi faꞋina amifata gilubodami be yaku itaveꞋavina againe wanamiyamiya-vagata.” Yaubada kaliva tunutunugina faꞋina, badi aulolo tagiya hivelemi-ma agaidiya ginalaufata. Badi kadu aulolo tagiya hinanuhagana. Ada yami aulolo yami tagiya ginavaihegeni-yo ginahavaina tu omiꞋiyao kadu imeꞋeyao buye kanavemwamwala. Aimo yada Kaiwabu Yesu ana ivemogatala ana toveya Yaubada medede amine ginalaufata. Medema tovai-nadi yada Kaiwabu Yesu lobama amine ginahobuꞋela yana tovenuwaꞋata fifiwaladiyao buyeꞋi. AiꞋalaꞋalata toyogina ginalufifidi tu hinahobuꞋela, ada badi Yaubada hivekwaulaugena kadu VenuwaꞋata Yamumuna Kaiwabu Yesu faꞋine keke hidavenogaleni-ma ginavematahiwadiyedi. Adi matahiwadi hidede amine. Agolaufofola ana abageya hinamiyamiya-vagata, higa yadi abaluku Yaubada againe falifali-vagahina be keke-moꞋa Kaiwabu matane hinayemu, keke-moꞋa Kaiwabu yana faiwala kikaiwabuna hinaꞋitani. 10 Kaiwabu ginayewaꞋela ana toveya adi matahiwadi au hidede amine hinanuhagana. Medema tovai-nadi Kaiwabu ginayewaꞋela be higa yana kikaiwabu kadu ana itaꞋita yauyaulowogina yana yoꞋo mahamahalidiyao agaidiya kabuꞋavane ginayemu. E, badi gaveyao moyaꞋaidi Bana againe hivetumagana-ma agaidiya kabuꞋavane ginayemu be moyaꞋaidi matadiya ginakaiwabu-moꞋa. Kadu omi yoꞋoi-mina buyeꞋi, faꞋina venuwaꞋata Keliso faꞋine avelemi-ma wavetumaganena. Fl 1:29 Lo 12:19 Md 25:31 Md 25:41, Lo 2:8 Md 25:41,46, 2Fi 3:7 Kl 3:4
ToꞋetoladi yadi veꞋoꞋola miTesalonaika faꞋidiya.
11 Mena gaitomai-dina Kaiwabu yana yewaꞋela ana toveya hinalakayemu faꞋina, tova moyaꞋaina omi faꞋimiya aveꞋoveꞋoꞋola. Yaubada gikovami be dewa hagihagina againe wanamiyami. AveꞋoveꞋoꞋola be yana veluga againe mena dewa hagihagina gilubodami amine wanahuluhuluva. Ada ginafaiwalavelemi be yami nuwanuwa yamumuna tulina tulina mena havivila yamumuna tulina tulina agaidiya wanaseseyemaunena ada gava dewa gava dewa yami vetumagana againe giveꞋinuba, medema yana faiwala againe wanaluyabuna. 12 Au hidede amine aveꞋoꞋola be higa yami dewa againe yada Kaiwabu Yesu Keliso ana egana wanakilakahina. Yada Yaubada kadu Kaiwabu Yesu Keliso ginuwadogemi faꞋina, yami dewa againe Kaiwabu Yesu Keliso ana egana wanakilakahina ada BanaꞋe ami egana ginakilakahina. Kl 1:10 1Ko 10:31

1:4: 1Te 1:2-3 1Te 2:19-20

1:10: Fl 1:29 Lo 12:19 Md 25:31 Md 25:41, Lo 2:8

1:10: Md 25:41,46, 2Fi 3:7 Kl 3:4

1:12: Kl 1:10 1Ko 10:31