Folo yana leta LOMA tovetumagana agaidiya
Hida Loma tovetumagana yadi leta Folo Kolinita againe gimiyami tu giꞋetoladina, ada kwamayoku ana egana Fibi givelena be Loma againe ginauwena. Loma Itali ana fafaliya gidadauda, ada melalai-nadi Loma Kabemani yadi melala kikaiwabuna. Bana Loma Tokaiwabu lakahina Sisa yana abamiya Loma againe.
Folo nuwanuwana ginana Loma be yana vehawala againe Loma ekelesiya ginavelugadi. Badi toꞋekelesiya tufoidi miYuda tu tufoidi yoꞋo tulidiyao kalivai-dina hivewagadi miGilika. Folo yana ela badi agaidiya ma ana eda hida leta againe gikidewedewena, be nuwanuwana aimo mulina yadi waveluga Sifeni againe hinaꞋatuhegena.
Tu hida leta againe Folo Yesu Keliso ana VenuwaꞋata Yamumuna dobona dobona matatabuna givagakokona. Dobona ana seyemauna hidede amine.
Lusiule kadu leta ana nuwanuwa nafona. 1:1-17
Kaliva moyaꞋaida tokoyona ada Yaubada yana ilaꞋa againe agolaufofola kananuhagana. 1:18-3:20
Keke vehimeya ana idibumuhiga au Keliso ana vetumagana againe kibababala kananuhagana. 3:21-4:25
Keliso buye kaveꞋatutamoꞋaida-yo ide wayawaida ivaguna ma ana miyami faꞋina. 5:1-8:39
MiIsileli tokilowa nonogana aimo Yaubada yana yoꞋogaga agaidiya ginaseyewedi. 9:1-11:36
Gava dewa tulina tulina ide tovetumagana ada lauboda faꞋina. 12:1-15:13
Folo yana vevai yana lukafoi yana lauꞋage. 15:14-16:27
1
Folo ana vehimeya lakahina faꞋina gilukahihi.
1 Yo siule tobohiyakweyao moyaꞋaimi Yaubada yana yoꞋogaga ma Loma againe. Iya Folo Yesu Keliso ana agetoga yami leta gaꞋetoladina be wanaꞋitana. BanaꞋe givegideku be yana kabu ganavaina higa afositolo adi maka giveleku, ada gisevehaileku be Yaubada yana VenuwaꞋata Yamumuna ganalulumamalena faꞋina. 2 Boi tuwai-moꞋena Yaubada bonana ana toꞋawatalatalaina awadiya mena VenuwaꞋata Yamumuna faꞋina giwonadabadaba-vagata, ada badi yana gahe Veyao Tuwaina ana bukiya hiꞋetoladina. 3-4 Natuna faꞋine buki-nadi againe gigaheye-vagahina, BanaꞋe yada Kaiwabu Yesu Keliso. Yana vekaliva ma babiya gihobuꞋela be bwaneneda kikaiwabuna Devida ana yoꞋo agaidiya gitubuyemu. GiꞋalika tu Yaubada toꞋalika agaidiya gisivemididina, ada yana mididi-havagi againe yana kaiwabu giseyemaunena higa BanaꞋe Yaubada Natuna yana wafaiwala kadu waꞋAluꞋaluwa Mahalina. 5 Yaubada gigahe-yo Yesu Keliso aku vehimeya giveleku be gaveꞋafositolo, higa vaita yaku laumamala againe badi keke miYuda tu yoꞋo tulidiyao kalivai-dina fafali moyaꞋaina agaidiya Bana againe hinavetumagana-yo bonana hinaꞋabina be higa Keliso ana egana ginalakata. 6 Kadu omi tovetumagana Loma againe meda badi tovetumagana fafali moyaꞋaina agaidiya buye Yaubada gikovami be Yesu Keliso yana kaliva yana vevine wanamiyami.
7 E, omi miLoma gaveyao moyaꞋaimi Yaubada agaimiya ginuwanuwa ada givegidemi be yana kaliva mahamahalimiyao wanamiyami omi kalivai-mina yami leta gaꞋetoladina be wanaꞋitana. Yaubada Tamada kadu yada Kaiwabu Yesu Keliso hinanuwadogemi kadu aseꞋasemi hinakiveniwalovina. Ga 1:15 2Ti 2:8 Ga 2:7
Folo nuwanuwana lakahina ginana Loma tovetumagana
ginaꞋitadi.
8 Keke gavana faꞋina tu yami vetumagana valeyana fafali moyaꞋaina agaidiya ginanauna faꞋina, yaku veꞋoꞋola againe Yesu Keliso ana egana gayakayakahina tu yaku Yaubada againe omi miLoma yami vetumagana faꞋina gavesivesiule. 9 Yaubada faꞋine yaku waꞋasehawahega gafififaisewa be VenuwaꞋata Yamumuna Natuna faꞋine galulumamalena. Yaubada gihalamaneku tu gagahegahe tova moyaꞋaina yaku veꞋoꞋola againe ami egana gayakayakahina. 10 E, gaveꞋoveꞋoꞋola higa boi keke akufaiweya gadaꞋela gadaꞋitami faꞋina, kaꞋi tova adamoya Yaubada ginahawahegeku be tamo eda ginayauni-yo akufaiweya agaimiya ganaꞋela.
11 Nuwanuwaku lakahina ganaꞋela ganaꞋitami be higa yaku ela omi agaimiya guwana AluꞋaluwa Mahalina yana abavetala tamo wananuhagani-yo Yesu Keliso ana halamana againe wanafaiwala. 12 Yaku nuwanuwa hidede amine higa buye kanaveꞋaveluveluga. Yami vetumagana againe omi iya aseꞋaseku wanakivevatuna, ada yaku vetumagana againe iya omi aseꞋasemi ganakivevatuna.
13 Tobohiyakweyao nuwanuwaku wanahalamanena tova a gavaiyehi gavevevai yaku elavaguvagu agaimiya gadaꞋela tu gaga-wayoga. YoꞋo tulidiyao kalivai-dina mali fafali agaidiya galumamaledi be yaku laumamala guwana ganuhagana amine, meda nuwanuwaku omi agaimiya ganaꞋela ganalulumamala-yo yaku faisewa guwana tamo ganaꞋitana. 14 Yaubada aku vehimeya giveleku faꞋina gilubodaku be Yesu Keliso faꞋine kaliva moyaꞋaidi agaidiya ganalulumamala. E, kaliva wamelaleya kadu kaliva wawalaꞋaiya kaliva nuwanuwahuyadiyao kadu kaliva fanifanidiyao au kaliva moyaꞋaidiyao agaidiya ganalulumamala. 15 Gilubodaku be kaliva moyaꞋaidiyao ganalulumamaledi faꞋina nuwanuwaku lakahina omi kaliva Loma againe wamimiyami-ma agaimiya VenuwaꞋata Yamumuna ganalulumamalena. 1Te 1:8 Ef 1:16 Lo 15:23-24
VenuwaꞋata Yamumuna gaitoma fifiwalana.
16 Mena VenuwaꞋata Yamumuna keke gadaꞋiwowomumuyeni. VenuwaꞋata Yamumuna keke gaitoma kowakowana. Au Yaubada yana VenuwaꞋata Yamumuna againe yana faiwala-moꞋa giseyemaunena, higa gaveyao moyaꞋaidi Bana againe hivetumagana, medema yadi koyona agaidiya gikibababaledi. Nagona ide miYuda VenuwaꞋata Yamumuna kamidinogalina tu muliya omi keke miYuda tu yoꞋo tulimiyao kalivai-mina wanogalina. 17 VenuwaꞋata Yamumuna gihawavemogatala gavaiyaꞋamine Yaubada ginaseda yegayegadeyao Bana matane. Yada yegayega hidede amine. Yesu Keliso againe kavetumagana faꞋina, ide tokoyona nonogana Yaubada ide faꞋideya gigahe gigayo, “Badi kaliva yegayegadiyao.” Ada kaꞋi vetumagana againe kanamiyami inubane be gina ana abalauyabu, au ide yegayegadeyao Yaubada matane kanamiyami. Meda tuwaina Yaubada Veyao Tuwaina ana bukiya yada yegayega inubana faꞋina gigahe gigayo,
Hai kaliva vetumagana againe gimimiyami faꞋina
bana yegayegana Yaubada matane, medema
wayawaina velemoꞋena ginamiyami. 1Ko 1:18,24 Lo 3:22, Hab 2:4
Tomiyababi moyaꞋaida ada wavita Yaubada matane.
18 Tu Yaubada lobameya gimimiyami-ma yana ilaꞋa tomiyababi koyodiyao agaidiya ahe giꞋivemogatalina. Yana ivemogatala hidede amine. Tomiyababi Yaubada hivekwaulaugena be koyona moyaꞋaina hififaisewana faꞋina, yana ilaꞋa guwana higa adi matahiwadi hinanuhagana. Yadi dewa koyona againe Yaubada yana nuwanuwa velemoꞋena hiveꞋalatagona.Kl 3:5-6 19-20 WaꞋita, gavadi Yaubada faꞋine adifaiweya hinahalamanena medema keke gidasevauyeni, au giꞋivemogatalina. GavaiyaꞋamine giꞋivemogatalini? Me yana aibubuna againe. Boi tuwai-lokalokana Yaubada babi gibubuna ana toveya be ginunauwena tova hidevama Bana inubana kadu yana faiwala miyamiya-vagahina kabuꞋavane gidadauda be kaliva hiꞋitahalamanena. Keke matadiya Yaubada hidaꞋitani tu yana aibubuna againe BanaꞋe velemoꞋena gimiyamiya-vagata Yaubada kadu yana faiwala au miyamiya-vagahina ma hiꞋitahalamanena. Yaubada ana itaꞋita yana aibubuna againe hiꞋitahalamanena faꞋina, keke adifaiweya hinagahe hinagayo, “Ime fanifanimeyao faꞋina, akoyo.” Taumadi Yaubada ana halamana au adifaiweya, tu Bana inubana keke hidanuwenuweni faꞋina givematahiwadiyedi.Sam 19:1
21 Yadi koyona hidede amine. Badi kaliva koyodiyao Yaubada hihalamanena nonogana, keke Bana againe hidavesivesiule kadu ana egana keke hidakikilakahini hidagagayo, “O velemona Yaubada.” Au yadi nuwanuwa giveꞋiyohoyoho kadu nuwadi gifani, e giꞋuyuyu-moꞋa.Ef 4:17-18 22 Higahegahe higa vaita badi nuwanuwahuyadiyao tu tagadi gikulu. 23 Yaubada Tomiya-vagata ana hawadavadava hidibutoyogena kadu yana kaiwabu hagihagi-moꞋena hikilowena. Tu ikilukiluma hihawadavadavadi, ikilukilumai-dina adi ita vaita tomiyababi yawaidi keke miyamiya-vagahina amine, kadu vaita manuga amine kadu vaita kevakeva nunudadanidiyao amine kadu kevakeva gayagayagidiyao amine.Sam 106:20
Kaliva yadi dewa tulina tulina koyo-moꞋena.
24 Tu badi mena dewa kwavakwavana againe hihawahegedi faꞋina, Yaubada yadi nuwanuwa ayaꞋayafanina agaidiya gihegedi-yo hihuluhuluva koyona. Dewa wowowomumuna hififaisewana higa wowodi buye hiveꞋakikivekoyo. 25 Yaubada velemoꞋena ma hikilowena tu gaitoma iꞋibubunidi agaidiya hihawahegedi be hihawadavadavadi. Bana adi ToꞋaibubuna keke hidanuwenuweni, Bana ana egana ma gilubodada be kanakikilakahina tova inaga inaga keke ana abalauyabu. Ehe hidedemi.
26 Tu mena gaitoma-kawowodi agaidiya hihawahawahegedi faꞋina, Yaubada yadi nuwanuwa ayaꞋayafanina wowowomumuna agaidiya gihegedi. Higa yadi vevine keke kaliva agaidiya hidaꞋayafana Yaubada adi ayauna giveledi amine. Au vevine mali vevine hiꞋayaꞋayafanedi be hivemavemai. 27 Meda anafaiweya kaliva keke nuwanuwadi vevine buye hinadauda Yaubada adi ayauna giveledi amine. Au mali kaliva agaidiya matadi giludigadigaga-moꞋa be dewa wowowomumuna buye hififaisewana. Medede amine hivetuvetubo faꞋina, adi matahiwadi mena dewa koyo-moꞋena gilubodana-ma amine wowodiya hinunuhagana.
28 KaduꞋe hinuwanuwa vaita Yaubada ana halamana gaitoma-kawowo yo hivekwaulaugena faꞋina, Yaubada nuwadi uyuꞋuyuyuna againe gihegedi-yo dewa keke gidalubodadi-ma hihuluhuluvina. 29 Nuwanuwa koyo-moꞋena tulina tulina agaidiya himaga. Tova moyaꞋaina dewa koyona hififaisewana, hiꞋitaꞋitaluvadiga, hinuwanuwa vaita mali kaliva hinakikivekoyodi. Kadu gaꞋumaꞋuma luveꞋalika vekwageya veꞋalololo itaveloi veꞋawayahayaha nuwadi giꞋabi-moꞋena. 30 Kadu hiveyaveyaina, mali kaliva adi egana hikikivekoyona, Yaubada hivenivenibainena, hiꞋiꞋihawadamana, taudiyao adi egana hikikilakahina kadu hiseselakalaka. Koyona ivaguna ana huluva hiꞋiveyemaunina. Hinadiyao tamadiyao bonadi hidibudibutoyogena. 31 Badi kalivai-dina uꞋudi keke, yadi wonadabadaba vaita gahe-kawowo, nuwakabubu kadu hinekalikali keke maꞋita hidahalamaneni. Au hidede amine yadi koyona ana loi. 32 Yaubada vehimeya gisena vaita badi mena dewa koyona hififaisewana-ma kalivai-dina gilubodadi be alika hinanuhagana. Mena vehimeyai-nadi hihalamanena nonogana mena koyonai-dina agaidiya hihawahawahegedi tu keke hidaꞋilova. Ada keke taudiyaogaga koyonai-dina hidafifaisewadi, au mali kaliva meda hififaisewana-ma hihawaveyamumuyedi. 1Veh 18:22 2Ko 12:20