1 Manasseh ana madeḡa 12 ma i vigulau au Jerusalem, ma i vibada madeḡa 55. Tauna alona Hephsibah. 2 Wariaḡa Bada eteni ravai i virubai ai kaua vinuamedamedai aubaina maranai mai Israel i ruirui au Canaan. Manasseh wei ravai ai kaua i votaḡotaḡoi da i kaukauei ma ana ḡoa apoapoe i rata Bada au matana, 3 Manasseh ola muomuoi au tepai god morumorui awari voepaepa gabui amana i viairikarikai, i voa-melei. Ma nanare pulo aniapuna i voanaiei Baal awarina, ma Asherah tuatuana i tonanaiei me Israel ana gulau Ahab. Manasseh wate nanare ubona i viviborumei. 4 ✡2Sa 7:13Tauna god morumorui ai pulo aniapuna i voanaiei Bada ana tempol au orana, wei gabuna aubaina Bada i riwa i pa, “Wavau au tempol ina mae.” 5 Tempol au metaetana, gabu garigarina au orana Pulo aniapui ruaḡa i voai ubona god aubaii. 6 Manasseh natuna orotona ai au araratana i apui ana pulo,*I apui mai Canaan ai god Molek awarina. ma parauma ma baravu ma gweri da ginauri ravai i rautaniḡanei. Kaua maḡamaḡaui apoapoe kaukauai i kauei ma Bada amlona i ḡaiḡai kaua.

10 Ma lamna aubaina Bada ana peroveta awariei i babani i pa, 11 “Gulau Manasseh kaua maḡamaḡaui vinuamedamedai i kaukauei, ma tauna i apoapoe kaua eḡa me mai Amori, taui wei dobuna i maeni muriai da mai Israel. Ai kokoitau miramirai awariei mai Judah i raveni da i ḡoʼapoapoe. 12 Lamna aubaina Bada Israel ana God wenanare e ririwa, ‘Kovoḡa ḡaeḡaeotana ana neiai Judah ma Jerusalem awarii da maranai rava anatapui riwana taniḡaiei ina nonori ma orai ina auepai. 13 Ruvana tagoginei Samaria a kovoḡi ma ruvana tagoginei Jerusalem ma Israel ai gulau Ahab ana epaepaia maiteni a kovoḡi. Jerusalem ravai ana amaḡa-tawanei, me aboma ita amamaḡi, ma i vitaragabubui. 14-15 Au rava i ḡoʼapoapoe awariu, maranai noinoii Egypt i opu-tawanei da marina. Wei e viviamloḡaiḡainiu. Ma rava mamae‑terenai ana inana-tawanei, ma ana veredamanei ḡavia awarii ma taui ina vovaiubai ma ai purapura ina kwalei.”

16 Manasseh mai Judah i raveni da god morumorui i viborumei ma Bada i vijiboḡi; wate eḡa lamna ava ma rava aiaii i viraḡena labalababai da tara i kororo da Jerusalem etanaina i vioai au giana da au giana:

18 Manasseh iʼraḡe ma ana numa au ririvana dobu wavana Uzza ana au wapu i doboi, Ma natuna Amon ana gabu i vaia da i vigulau.

19 Amon ana madeḡa 22 ma i vigulau. Ma i vibada madeḡa ruaḡa au Jerusalem. Tauna alona Meshulemeth, oroto Jotbahei wavana Harus natuna 20 Tauna ana ḡoʼapoapoe, i rata kaua Bada awarina me amana nanare. 21 Amana i ḡovaivaitei ma god morumorui i viborumei. 22 Tauna noinoii ai God, Bada i rawaḡaiḡaiei ma ana tarawatu eḡa ita votaḡotaḡoi.

23 Ana gabemani babadai Gulau Amon i viogei da ana au gulau numana i viraḡeni. 24 Wate mai Judah, rava gulau Amon viraḡenana i viogatarei anatapui i viviraḡena-naiei ma natuna Josiah i terei da i vigulau.