5 Ma Bada i ʼnanai da rava anatapui au dobu ai ḡoʼapoapoe i rata kaua ma aiwai i viogatarei ma i vinua-notenotei anatapui apoapoei. 6 Bada i ʼnanai ma orana i viara kaua ma i vinuabola da aiwai aubaina rava i kauei. 7 Ma Bada i riwa, “Tau rava a kaukaueia ana vipupui dobu au anatapuna ma nanare ḡamoḡamo ḡaeḡaei ma ḡamoḡamo au doa tetetei ma kiu au aidamo. Nuanuau i bola-kauei da taui a kauei.” 8 Wate Bada Noah i ʼnanai ma i vinuaiaiei.

9-10 Noah ma ana epaepaeia ai virarautua wenanare.

Noah natunatuna nelarai tonuḡa: Shem, Ham ma Japheth. Noah ana ḡoʼapoapoe eḡa, tauna ainelana rava aiaina eḡa me aiai ḡelauna nai au marana. Ma God maiteni i bababani nonoa ma ana au viaiaina i mamae.

11 Rava ai ḡoʼapoapoelei dobu i viapoapoeni God au matana ma vigaigaiawa dobu i oai. 12 Ma God i ʼnanai da rava ai ḡoʼapoapoe i rata kaua ma lawana apoapoena i maemaelei. 13 Ma God Noah i riwei, “Rava pupunana a vivinua-notenotei. Aubaina rava ai ḡoʼapoapoe dobu i oai, lamna aubaina rava ma dobu anatapuna ana vipupui. 14 Lamna aubaina a ḡoei da wei ma kauei. Waga ḡaeḡaena ai bagibaginei ma voai tam aubaim. Ma babalaraḡi ma koltei au orana ma au doa ma pasi. 15 Wenanare ma voai. Waga ana manawa 140 mita ma ana dabora 22 mita ma ana ḡae 14 mita*Hebrew pona ana manawa 300 cubits ma ana dabora, 50 cubits ma ana ḡae 30 cubits. 16 Ma poewi ma gavogavo aburuna ma voterei poewa ma biribiri au poui, ive ma madeḡa aubaina. Ma au ririvana, metaeta ma terei. Ma vatara, au gabaurina, au pouna ma au tepana ma voai.

17 —Ona rautaniḡana! Tau marina ututuva ana paritawaneiai au dobu ma aiwai anatapui lawalawaii ina amoa. 18 Wate marina tau parivainuaḡana bagibagina ana kauei tam maiteni. Tam, awam, ma natunatum awawai maiteni au waga ona rui. 19-20 Ma ḡamoḡamo anatapui, wavinena ma orotona ma vigerui, kiu, ma ḡamoḡamo au doa tetetei ruaruaḡei ava ina rui da ina lawana. 21 Ma lam taputapunei ava ma vaia da taumi ma ḡamoḡamo aubaii.”

22 Ma God aiwai anatapuna i ririweia; Noah i kauei.