Peroveta
Isaiah
ana buka
Pariverena
Wei bukana lamna peroveta ḡaeḡaena au Jerusalem i mae tana riwa 750 BC. nanarena, wavana Isaiah. Bukana iavana tonuḡa:
Kapita 1-39 e ririweta da mai Assyria ai gulau ma ai sorodia vivirewapanai dam ḡelaui Israel ma Judah au ririvai i vipupuni. Gulagulau Israel ma Judah i vibadei.
Kapita 40-55 lamna mai Babylon ai gulau mai Judah i vipupui ma i pupuna-naiei da au Babylon. Perovetana i vinuaubai ma i riwei da God ina naiana-melei ma lawana vouna ina verei.
Kapita 56-66 lamna mai Judah i nememei au Jerusalem. Ma perovetana God ana ogatara Jerusalem ravai aubaii e bababaniei.
2
Bada ana ola
God ana pariverena, Judah ma Jerusalem aubaii wenanare, Isaiah - Amoz natuna i verei.
 
Mara au murina,
ola mepa tempol marina e maimairi, ina mae-nonoa.
Ina ḡetelara kaua eḡa, me ola ḡelaui.
Dam nununai patarai ina taini kampa da ina voepaepa.
Dam patarai ina nei ma ina riwa,
“Ona nei, tana ḡae Bada ana au ola,
Jacob ana God ana au numa.
Weka ana kaua ina viararamanita
da au ivina tana babara.
Aubaina Bada Riwana au Zion da ina opu,
Bada ana tarawatu Jerusalemei ina opu.
Tauna dam ḡaeḡae ai viḡaiḡaiawa ina rauetarei,
ma ina kovoḡa.
Ai sod ina guda-virai da ipa uata,
ma ai pawasi ina guda-virai da naipi ai raḡaraḡai kosii aubaii.
Dam damai eḡa ina viḡaiḡaiawa vivira me,
bo ina vokaukaua, ḡavia aubaina.
Ona nei Israel natunatui, Bada ana au ravilala au ivina tana babara.”