10
Iesu, tavine vilamonana i babaniei
1 Ma Iesu, dobuna i netawanei ma i nae Judea ana paratana. Ma Waira Jordan i damani da au baba ḡelauna. Patara ḡaeḡaena i riana-melei. Ma Iesu i viararamana, me mara patapatana i kaukauei nanare.
2 Ma Pharisi ḡelaui i ḡoei da tauna ita waroi. Ma lamna aubaina i vitara-virevirei, “Tarawatu e mamae bo eḡa da rava, awana maiteni ita vilamonei?”
3 Ma Iesu i paribelei, “Moses ana Tarawatu aiwai e ririwei?”
4 Ma taui i riwa, “Moses ana Tarawatu e ririwa da oroto vilamona pepana ina girumi ma awana ina verei. Ma taui ina vilamonei.”
5 Iesu i paribelei, “Taumi orami i bada. Au baina Moses wei Tarawatuna i terei. 6 ✡Gen 1:27Wate ona notai da au karena, maranai God rava i kauei ma tauna oroto ma wavine i kauei. 7 ✡Gen 2:24Ma lamna aubaina oroto amana ma alona ina netawanei 8 ma awana maiteni ina vitagogi da taui eḡa ruaḡa me au naona ma tupua tagogi. 9 God aiwai i vitagogiei, eḡa aiai ina vilamonei.”
10 Maranai taui i naeme au numa, ma tauvotaḡotaḡo, Iesu i vitara-virevirei wei kauai aubaii. 11 Iesu i paribelei, “Mepa da oroto, awana i voterei. Ma wavine ḡelauna i ravaḡi. Lamna tauna, awana awarina i rauiviapoapoe. 12 Ma nanarena mepa da wavine, awana i voterei ma oroto ḡelauna i ravaḡi. Lamna awana, awarina i rauiviapoapoe.”
Iesu, roaroa i viaiaini
13 Rava ḡelaui, roaroa i neiai Iesu awarina da urana au tepai ita terei. Ma ana tauvotaḡotaḡo, ravai i viḡaei. 14 Maranai Iesu wei kauai i ʼnanai. Ma ana tauvotaḡotaḡo i eni ma i riwa, “Roaroa ona voterei da awariu ina nei. Ma eḡa ona viḡaei. Au baina God ana vigulau, lamna rava wenanare aubai me wei roaroai. 15 A ririwana-kauemi. Aiai, God ana vigulau eḡa ina vaia me tevera aburuna nanare. Tauna, eḡa God ana au vigulau ina rui.” 16 Ma roaroa i taravaini ma i rapai, urana au tepai i terei, i raupari ma i viaiaini.
Purapura ravana
(Matthew 19:16-30; Luke 18:18-30)
17 Ma maranai Iesu i vomairi da i nenae. Oroto i ruba ḡeta ma au naona i raudune ma i riwa i pa, “Taugiu vinualaulaunam. Aiwai ana kauei da lawana maemae-nonoana ana vibuderiei?”
18 Ma Iesu i paribelei i pa, “Aiwai aubaina, tau u vikaua vinualaulauneu? God, tauna ava vinualaulaunana. 19 ✡Exo 20:13; Exo 20:14; Exo 20:15; Exo 20:16; Exo 20:12Tam, God ana Tarawatu u aramanei, Eḡa ma viraḡena! Eḡa ma awadanene! Eḡa ma danene! Eḡa ma viwavu-moru! Eḡa ma amkwalakwala! Amam ma Alom ma vivirei!”
20 Ma tauna i riwei, “Taugiu! Maranai tau aburueu da amadodo, wei tarawatui anatapui a voteletelei.”
21 Iesu, tauna i ʼnanai ma i vinuavainei ma i riwei, “Kaua tagogi e mamae eḡa uta kaukauei. Ma nae ma am purapura anatapuna ma gimarei. Ma manena, rava molamolakai ma verei. Ma au mara God, tam ina vimaiem. Ma ma nei ma ma votaḡotaḡoiu!”
22 Ma maranai oroto wei riwana i nonori. Naona i peu ma ana nuabolana i nae; aubaina tauna, purapura ravana.
23 Iesu i ʼnana viravira ma ana tauvotaḡotaḡo awari i riwa, “I piripiri kaua da purapura ravana, God ana au vigulau ina rui.”
24 Tauvotaḡotaḡo riwana i baiei maranai Iesu wenanare i babani. Ma Iesu i riwa me, “Natunatu! I piripiri kaua da purapura ravana,*Wei riwana buka ḡelaui awarii e mamae ma ḡelaui eḡa purapura ravana. God ana au vigulau ina rui. 25 I telatela kaua da ḡamoḡamo ḡaeḡaena wavana kamel, iḡoma au gavogavona ina rui. Ma i piripiri guratana da purapura ravana, ana lawana God ina verei. Ma God, tauna ina vibadei.”
26 Taui i vinuanaina ma ai nota i kwa. Ma taui ava i babani vivira i pa, “Mepa da nanare; amapo aiai lawana mamae-nonoana ina vaia?”†Mai Jew i notai da rava vipurapurai lamna Bada ana verena ana nuavaina matairana, taui e notai da Bada, rava vipurapurai eḡa ina gagaloei, tauna ravai ḡelaui maiteni eḡa ina gagaloei.
27 Iesu awarii i ʼnana ma i riwei, “Rava awarii wei kauai i piripiri. Wate eḡa God awarina. God awarina aiwai anatapuna i telatela kaua.”
28 Ma Peter i riwei, “Ma tauai menanare? Tauai ai purapura a voterei ma tam a votaḡoim.”‡Peter i ḡoei da ita aramanei da tauvotaḡotaḡo ai au iraḡe maiana aiwai, ina vaia.
29 Iesu i paribelana, “A ririwana-kauemi. Aiai da ana numa bo varevareina bo novunovuna bo alona bo amana bo natunatuna bo ana wapu ina voterei ma tau ina votaḡotaḡoiu; tau ma Riwana Aiaina aubaina. 30 Tauna ana maia ina rata kaua wei au dobuna. Tauna ana maia ina viaitepatepani da ana numa, varevareina, novunovuna, alona, natunatuna ma ana wapu, anatapui ina maḡa. Rava ina rau-iviapoapoelem; aubaina tam, tau au Tauvotaḡotaḡo da mara au murina tauna lawana mamae-nonoana ina vaia. 31 Wate maḡamaḡaui marina e vivinao; taui ina vimuri. Ma maḡamaḡaui da e vivimuri; ina vinao.”
Iesu ana iraḡe babanina i vitonui
(Matthew 20:17-19; Luke 18:31-33)
32 Iesu, ana tauvotaḡotaḡo maiteni i ḡeḡae au Jerusalem. Iesu, taui au naoi i nenae. Tauvotaḡotaḡo i baiei. Ma rava ḡelaui au muri i nenei i rovo kaua.§Iesu i ḡeḡae au Jerusalem ma rava maḡamaḡaui i viḡaviei ma lamna aubaina ana tauvotaḡotaḡo i baiei da tauna tepana i tora da weka i nenae. Rava ḡelaui i votaḡotaḡo, taui i rovo kaua da aiwai awarina ina tupua maranai i ḡeta au Jerusalem. Ma taui 12 i rauḡorei au ririva ma i raukarei da kaua amapo da awarina ina tupua; taui i vieḡei 33 I pa, “Ona inana, tauta ta ḡeḡae au Jerusalem. Ma Rava Natuna ina verenei pirisi babadai; ma tarawatu babadai awarii. Ma taui ana iraḡe ina vianinei. Ma Mai Jentail ina verei. 34 Ma tauna ina vijiboḡi ma ina ovai ma ina kwapui ma ina viraḡeni. Au pom vitonuina ina vomairi me.”
James ma John ai vibaḡa
(Matthew 20:20-28)
35 - Zebedi natunatuna James ma John i nei Iesu awarina ma i vibaḡai i pa, “Tauviararamana! Tauai ai ḡoana a vivibaḡei uta kauei.”
36 Iesu i riwa i pa, “Aiwai o ḡoeḡoei ana kauei aubaimi?”
37 Taui i paribelana, “Ma verelai da ana kiala, tagogi au oiem ma ḡelauna au kelakelaum am au vigulau.”
38 Iesu i paribelei, “Taumi eḡa ota aramanei aiwai o vivibaḡei! Iniviara kelakana ana umai. Taumi tagotagogina da ona umai bo? Tagotagogina ona babataito me tau ina babataitoiu?*...babataito me tau ina babataitoiu taui iniviara ma iraḡe e bababaniei, maranai Iesu au Gethsemani i raraupari muriai da ana iraḡe tauna ana nuabolana kelaka i babaniei (Mrk 14:36). Iesu, James ma John i riwei da nuabola ina nelaḡai.”
39 I paribelei, “Tauai tagotagogina!”
Iesu i riwei, “Iniviara kelakana anina ona umai ma ona iraḡe me tau ana iraḡe. 40 Wate tau au rewapana eḡa ita mamae da ana veremi da mepa ona kiala au oieu bo au kelakelau. God, rava i vinevinei; taui ai gabu i vokaukauei.”
41 Maranai Tauvotaḡotaḡo 10 ḡelaui, wei riwana i nonori. Taui James ma John awarii i ḡaiawa. 42 Ma Iesu, taui anatapui i ḡorei da awarina ma i riwei, “O aramanei da jentail ai babada, dobu ḡela ravai jentail awarii e mamae-ḡaeḡae ma e rarau-iviapoapoelei. Wate taui ai babada ḡaeḡaei, ai rewapana i ḡetelera da ai rava e vibadebadei da ai ḡoana e kaukauei. 43 ✡Mrk 9:35Wate au tauvotaḡotaḡo eḡa nanare. Eḡa da aiai i ḡoei da ina ḡetelara taumi au poumi; tauna anina da ina vitaunola. 44 Aiai i ḡoei da ita vinao. Tauna ina vitaunola rava anatapui aubai. 45 Ma nanare Rava Natuna eḡa ita nei da tauna, tana nolei. Wate ita vitaunola rava aubaii. Ma ana lawana ita verenei da rava maḡamaḡaui ai lawana ita gimara-melei.”†Iesu i vinuapoapoe ma iraḡe aubaita me Isaiah i girugirumia nanare au Isa 52:13-53:12.
Iesu, rava mata-potapotana Batimeus i vilawani
(Luke 18:35-43)
46 Ma taui i ḡeta au Jeriko. Iesu, ana tauvotaḡotaḡo, patara ḡaeḡaena maiteni dobuna i opuopu-tawanei. Ma oroto mata-potapotana, wavana Batimeias, Timaeus natuna au etanai i kiakiala ma i viamgigimana. 47 Maranai i nonori da tauna, Iesu Nasaretei; garara i raukarei i pa, “Iesu, tam David natuna! Ma raunuʼapoapoeleu!”‡Maranai oroto mata-potapotana Iesu i kwatuei David natuna ma mai Jew i aramanei Keriso - Bada ana vinevine i babaniei. Mai Jew i aramanei da Keriso ai wavalatona me David wariaḡa nanare. Ma i nei da rava doridoriai ita vilawani me. (Sal 89:3-37 Isa 29:18-19 & 35:5-6 Jer 23:5-6 Ezk 34:23-24)
48 Rava maḡamaḡaui, tauna i rai ma i riwei da ita genuana. Wate tauna, garara i voguratei, “David Natuna! Ma raunuʼapoapoeleu!”
49 Iesu i tumairi ma i pa, “Ona ḡoreiai!”
Anina taui, mata-potapotana i ḡoreiai i pa, “Tepam ina tora ma ma vomairi! E ḡoreḡorem!”
50 Tauna, ana puru i tawanei ma i vomairi laḡilaḡina ma i nei Iesu awarina.
51 Iesu i paridadana i pa, “Aiwai u ḡoei ana kauei aubaim?”
Mata-potapotana i paribelei, “Tauviararamana! A ḡoei da ana inana me.”
52 Iesu i riwa, “Ma nae! Am tumaḡana i vilawanim.” Maratagogi tauna i ʼnana me ma Iesu au eta i votaḡotaḡoi.
✡10:19: Exo 20:13; Exo 20:14; Exo 20:15; Exo 20:16; Exo 20:12
*10:24: Wei riwana buka ḡelaui awarii e mamae ma ḡelaui eḡa purapura ravana.
†10:26: Mai Jew i notai da rava vipurapurai lamna Bada ana verena ana nuavaina matairana, taui e notai da Bada, rava vipurapurai eḡa ina gagaloei, tauna ravai ḡelaui maiteni eḡa ina gagaloei.
‡10:28: Peter i ḡoei da ita aramanei da tauvotaḡotaḡo ai au iraḡe maiana aiwai, ina vaia.
§10:32: Iesu i ḡeḡae au Jerusalem ma rava maḡamaḡaui i viḡaviei ma lamna aubaina ana tauvotaḡotaḡo i baiei da tauna tepana i tora da weka i nenae. Rava ḡelaui i votaḡotaḡo, taui i rovo kaua da aiwai awarina ina tupua maranai i ḡeta au Jerusalem.
*10:38: ...babataito me tau ina babataitoiu taui iniviara ma iraḡe e bababaniei, maranai Iesu au Gethsemani i raraupari muriai da ana iraḡe tauna ana nuabolana kelaka i babaniei (Mrk 14:36). Iesu, James ma John i riwei da nuabola ina nelaḡai.
†10:45: Iesu i vinuapoapoe ma iraḡe aubaita me Isaiah i girugirumia nanare au Isa 52:13-53:12.
‡10:47: Maranai oroto mata-potapotana Iesu i kwatuei David natuna ma mai Jew i aramanei Keriso - Bada ana vinevine i babaniei. Mai Jew i aramanei da Keriso ai wavalatona me David wariaḡa nanare. Ma i nei da rava doridoriai ita vilawani me. (Sal 89:3-37 Isa 29:18-19 & 35:5-6 Jer 23:5-6 Ezk 34:23-24)