1 Iesu, Tempol i nene-tawanei ma ana tauvotaḡotaḡo tagogi i riwa, “Tauviararamana! Numa i viḡulau ḡaḡa ma numa ḡaimai i rata ḡaḡa.”

2 Iesu i paribelei, “Wei numai ḡaeḡaei u inanai, eḡa ḡaimai tagogi, turana au tepana ina mae. Ḡaima anatapui ina rikai.”

3 Iesu i kiakiala au ola Olives, Tempol au navanavaḡela ma Peter, James, John ma Andrew i nei ma i vitaraviravirana govaḡei 4 i pa, “Ma riwelai mara aiwai wei kauai ina tupua? Ma aiwai ina vimataira da wei kauai anatapui ina tupua?”

5 Iesu, taui i riwei, “Ona inana kaua da eḡa aiai ina terevaideḡaimi! 6 Rava maḡamaḡaui, wavauei ina nei ma ina riwa, ‘Tau Keriso tauvilawana!’ Ma rava maḡamaḡaui ina terevaideḡai. 7 Ma maranai viḡavia ona nonori ma viḡavia aueia riwana ona nonori; eḡa ona rovo! Wei kauai anina da ina tupua, wate wei eḡa damona. 8 Dam, damai ina viḡavia vivira ma dobu, dobuai ina viḡavia vivira. Ma lolo ma gomara dobu au anatapuna. Wei kauai, lamna me wavine ana iniviara e vivikarei maranai e vivinatuna.

9 —Ona inana kaua! Taumi ina panimi ma ina etaremi ma pari numana au orana ina kwapuimi. Ma gavena ma gugulau au naoi ona mairi, aubaina taumi o votaḡotaḡoiu. Ma taui awarii, Riwa Aiaina ona raugugulei. 10 Riwana Aiaina ona raugugulei rava anatapui awari ma muriai damona ina nei. 11 Ma maranai i panimi ma i etaremi. Eḡa ona vinuabola da aiwai ona latoni. Aiwai riwana God i veremi, lamna ona latoni. Aiwai o latoni lamna eḡa taumi ota babani, wate Arua Vivivireina. 12 Rava, vareina ina verenei da ina viraḡeni. Ma ama, natunatuna ina verenei da ina viraḡeni. Ma roaroa, amamai ma aloloi ina viḡaviei da ina iraḡe. 13 Rava anatapui ina geduaiemi tau aubaiu. Wate aiai da e maimairi-jijina da au damona, tauna ina lawana.”

14 “Maranai ‘Kaua apoapoe kaukauana’*Eng. Abomination of Desolation Dan 9:27 11:31 & 12:11 e maimairi mepa avena ita mairi. (Buka tauiavana wei ina aramanei anona aiwai). Taui aiavoi au Judea ina ruba laḡilaḡina au ola. 15 Aiai numa au tepana eḡa ina ḡaira bo ina rui au numa da aiwai ina vaia. 16 Aiai au wapu eḡa ina naeme au numa da ana gara ina vaia. 17 Ma iniviara ḡaeḡaena, waivine duaduamai ma taui da e viviḡuḡu awari nai au marana! 18 God awarina ona raupari da wei kauai eḡa au bodu ina tupua. 19 ✡Da 12:1Ma nai au marana amapo iniviara ḡaeḡaena. Ma maranai God dobu i kauei, iniviara ḡaeḡaena eḡa nanare ita tupua ma amapo eḡa nanare ina tupua me. 20 Wate Bada nai marana ina vitupoi. Mepa da eḡa ina vitupoi, rava anatapui ina iraḡe. Wate rava, tauna ana vinevine ina vilawani lamna aubaina mara ina vitupoi.

21-22 —Muriai keriso tauvilawana morumorui ma peroveta morumorui ina nei ma mataira ma kaua babai ina kauei ma ina kauana dadanei da God ana vinevine maiteni ita terevaideḡai. Lamna aubaina mepa da aiai ina riwemi, ‘Ma inanai, Tauvilawana noi!’ bo ‘Tauna noi!’ Nai babanina eḡa ona vitumaḡanei! 23 Ona inana kaua; anatapuna a riwana-nonoemi!”

24 Iesu wenanare i riwa, “Ma iniviara ḡaeḡaena au murina.

26 ✡Da 7:13—Nai maranaina, Rava Natuna ana rewapanana ma ana borumana apauei ina nei. 27 Ma Tauna, ana anela ina paritawanei dobu au anatapuna da rava tauna ana vinevine ina tuarui dobu au damona da dobu ḡela au damona.”

28 “Damala aina ana awanaina ona aramanei. Maranai ai e numonumoi, lamna ona aramanei da maura e tuturiai. 29 Ma nanare, maranai wei kauai anatapui ina tuputupua, ona aramanei da Rava Natuna i turiai; au metaeta i ḡetai. 30 Anina a ririwemi da wei kauai au naona ina tupua ma muriai da rava marina lawalawaii ina iraḡe. 31 Mara ma dobu ina amoa. Wate riwau eḡa ina amoa.”

32 “Ma eḡa aiai ita aramanei nai marana bo madeḡa aiwai ina nei. Anela au mara eḡa ita aramanei ma Natuna eḡa ita aramanei. Amana, tauna ava i aramanei. 33 Ona vineneḡana ma matami ina kala!†Wedau Evanelia i girumi, ma i raupari, wate buka wadubo nonoana wei eḡa ita mamae, Luk 21:16 kampa ona inanai da e mamae. Eḡa ota aramanei mara aiwai, wei kauai ina tupua. 34 Wei me rava ana numa i netawanei ma i vaḡai. Ma ana taunola nununai i terei da ita vipaipai ma tagotagogi ava ai nola i verei da ita kauei. Ma tauvineneḡana i riwei da ita vineneḡana. 35 Ona vineneḡana! Eḡa ota aramanei mara aiwai, numa taniwagana e nenei; mepa da au bigai bo au nubautuva bo maratomtomai bo ubaubanai. 36 Ma eḡa matamatavemi ina nelaḡaimi. 37 Aiwai riwana a ririwemi, riwana tagogina rava anatapui a riwei, ona vineneḡana!”