27
Voepaepa parina
David ana wela
1 Bada au lalalaina ma au tauvilawana,
aiwai ana rovoei!
Bada au taugagagalo
aiwai ana rovoei!
2 Maranai ḡoʼapoapoei ravaii i ḡetai
da ita vunuiu,
au ḡavia
aei ina pakana-melei da ina peu.
3 Avena da sorodia borui ina mae-gariḡuruviu,
tau eḡa ana rovo dadana.
Maranai au ḡavia i vomairi,
tau anina da God ana vivitumaḡanei.
4 Kaua tagogi ava aubaina a vivibaḡa.
Au ḡoana ḡaeḡaena da,
Bada ana au numa, boruborumana ana mae,
ma ana voepaepai. Au lawana au anatapuna.
5 Nuabola au marana
ina tereḡaḡariu.
Ana gabu au vivivireina, ina teregovaḡiu.
Ma ola au tepana ina tereu
da ḡavia eḡa ina vodadaniu.
6 Ma au ḡavia i garigari kwaipipiniu, ana tuvaidoedoei.
Da au tempol ana morelanau pulo ana apui Bada awarina.
Ana vinuaiai ma welei ma arei ma ana voepaepai.
7 Bada ma rautaniḡaneu maranai awarim a kwatukwatu,
ma raunuʼapoapoleu ma ma paribeleu.
8 Au orau u riwa, u pa, “Ma nei da ma rauduneleu.”
Tau a paribelem a pa, “Bada a nenei.”
9 Eḡa ma raugovaḡeu,
eḡa awariu ma ḡaiawa.
Am taunola eḡa ma inana geduaiei,
au anatapuna tam, au tauagu.
Eḡa ma netawaneu,
au God, tam au tauvilawana.
10 Avena da amau ma alou ita teretawaneu,
wate Bada ina paina-kaueu.
11 Bada, ma viararamaniu da am ḡoana ana kauei.
Ma etanai au ḡadaḡadarana ma taravainiu aubaina au ḡavia i maḡa
12 Taui moruei ma parivairovorovoei e vunuvunuiu.
Lamna aubaina, eḡa ma teretawaneu awarii
13 A ʼramanei da Bada ana viaiaina ana inanai,
weka lawalawai ai au dobu.
14 Bada ma vitumaḡanei,
da ma virewapana ma tepam ina tora.
Anina Bada ma vitumaḡanei!