139
Bada anatapuna i aramanei.
David ana wela
1 Bada orau u inanai ma au kaua anatapui u aramanei.
2 U aramanei mara aiwai a kiala ma a vomairi.
Avena au uama wate au nota e araramanei.
3 E inainanaiu maranai a babara bo au numa a vivilauvitau.
Anatapuna a kaukauei e araramanei.
4 Muriai da ata babani tam e araramanei aiwai ana latoni.
5 Tam e garigari-kwaipipiniu,
ma uram virewapananei e paipainiu.
6 Lamna riwa kauana, awariu i aii kaua
ma i ḡe-dewadewa da kolau i kwauna-kauei.
7 Mepa ana nae da Aruam ana raugovaḡei?
Mepa ana ruba da ana raugovaḡem?
8 Ata ḡae au mara da tam kampa;
mepa da i ʼrairaḡei ai au dobu ata rauviraiu, tam kampa.
9 Mepa da ana lave nae au maramatanei,
bo mepa madeḡa e neneulai,
10 avena kampa ma uram ina raveniu,
ma am rewapana ina painiu.
11 Mepa da ana riwa, “Gimtona ina tereḡovaḡiu
ma lalalaina ina gimtona.”
12 Wate avena da gimtonana amapo eḡa ana raugovaḡem.
Tam awarim gimtona ina rarana me marai, aubaina tam awarim gimtona ma lalalaina lamna tagogina.
13 Tam tupuau anatapuna u voai da alou au manawana u teretagogieu.
14 A viviegualauem aubaina tam am nuavainei ma am borumei u voa-kaueu! Am rauḡaroḡaro i aii,
A voepaepaim aubaina a aramana-kauei.
15 Tam u vivineneḡaneu maranai a tuputupua au govagovaḡana, alou au manawana,
tam ainelam anatapuna u aramanei.
16 Tam u inanaiu muriai da a tupua.
Aupom biaḡa u vereu da ana mae
lamna au buka u girumi,
muriai da aupom naona i ḡotai.
17 God! I piripiri guratana da am nota ana aramanei.
Am nota kolau i kwauni, eḡa aiwai ḡelaunei am kaua ana aramanei.
18 I maḡa guratana eḡa me bubu, iavana ana kauana-avei,
avena da ata iava-pai, tau amapo da tam ana vivinuanainem.
19 Oo God! A ḡoei da ḡoʼapoapoei ravai uta viraḡeni.
Tauviraḡena uta viaḡaḡei da eḡa ina nei awariu.
20 Aubaina e vivijiboḡim,
ma wavam eḡa ita vivivirei.
21 Bada, rava e gedugeduaiem, tau ravai a gedugeduaiei.
Taui eḡa ita voteletelem lamna aubaina taui au ḡavia.
22 Taui a geduaiana-kauei,
anina taui au ḡavia.
23 Ma tuvirevireu, ma orau ma inana-pai.
Ma raudadaniu da nuanuau ma aramanei.
24 Mepa da ḡoa apoapoe au orau, ma viatataieu,
ma ma raveniu etanai e nenae au lawana maemae-nonoana awarina.