1 Siwan nata mia waaknga kawawa angela kekeknga tapatuta enandangga epan kakum. Sike ita minga dakatu taukge tasiwan zawiakwanu takngatuta itane gwapakngane yuwan kakum. Sike nata itane nomna kawa gunzit binga maaknga siknga sikut. Siwan nata kepi kutapaat kawawa katap mumuyangga binga isiking. 2 Sike ita pepa tupa koomukuu gomdusim tapan waiwan katakngita tapan kakum. Sike ita kepina siyaapa yanggabam gwenu engatangan yaike kepina kwanaapa kepdakane yaikut. 3 Unzing yaike ita apaa siknga ainggamatawan natapa kaapzongu laion gwegwenda ainggamatakaing binga sikut. Siwan ita ainggamatawana gakngatda katau kuut musa kautdu dakaaya ngang yawan natapbum. 4 Natake nata wamu wa yaking kaknga apmatanangge tasiwa ngana wamu takngatu enandangga epan nataawa wamu wa gakngatda wamu katau kuut musa kautdu dakaaya yanggau wa, “Gata ma matawim. Aho. Gata wamu wa gikae natdetdetdanekan natake teyo,” ngang yawan natapbum.

5 Sike angela tupa nata kawawa yanggabam gwene gatu kepdakane ngang yaike yukut tapata katakngi siyaapa tangenawan kakum. 6 Katakngi tangenake ita wamu kekeknga takngatu Anututane umanae yawan kekekakut. Ngan. Anutu tupa sanga kuupbamu ena kakaa kom gatu kep gatu yanggabam gatu sanga enane ba kepdakane ba yanggabam gwene yuaingu kuupbam tasike tekut tapata kayuk asinggan asinggan yuak. Anutu waapatane umanae yake angela waapata anzing yakut, “Wamu Anututa tupa yawan yukutdane buya aatnangge dapaknga gwa singgak. 7 Ngan. Masande angela katau kuut musa kautdu tapaaya ngangu pum pakingkut nana masan siknga tapata pumna puyapik. Sike tapduu waomzimunekan wamu tupa Anututa ina natake aminu itane wam yanikapsa aminde yanikapbut takngata buya asaawik,” ngang yawan natapbum.

8 Sike nata nataawa wamu tupa enandangga na nanikuu waakngata gatuna anzing nanikut, “Gata kuku pepa wagomu angela yanggabam gwene gatu kepdakane ngang yaike yuak kapata tapan waiwan katakngine tanggak gomu tapso,” ngang nanikut. 9 Naniwan natake nata angela waapae kuke anzing inikum, “Gata pepa mateknga wagomzimu nae namuyo,” ngang iniwa ita nae namuke anzing nanikut, “Gata anggomu takenga gata napso. Napi kaaya siknga wait binga siwik. Ngana guyanguwi musipbaatang pukuke amak tasiwan musipbaatang toknga gasiwik,” ngang nanikut. 10 Nanike ita pepa wagomzimu nae naman take nata atnakum. Napa kaaya siknga wait binga siwan ngana nata guyanguwa musipmaatang pukuke amak tasiwan musipmaatang toknga nasikut. 11 Sike nata nataawa wamu takngatu anzing nanikut, “Gata Anutue wam natake gatuka yanikapso. Ngan. Sangabamu aminu dongu takngatu takngatu kepna kepna nana wamna inata inata yakaing amin gatu wa amindane take aminu kwaapzang ngangge apik kakngae natake yakapso,” ngang naniwan natapbum.