20
Mundil Yesusm Osihminina, An Yemba Pusvundthoana, Memba Yimba Mendekliandra Velohvpa?
Matiu 21:23-27, Mak 11:27-33
1-2 Elsus Yesusva vesiha velohvna tempel pethallava, indhanam ishomana veluhunvna Sesoana nemelmom. Doa mundilva ambvnamba, noi sembayang andranindna kuwul mendekli, katekis eva mundil. Doa hev umnina, kam ishunu, an yemba pusvundthoana, memba yimba andra vevpa?
3-4 Yesus unna, dawonam ambo, ata yemba kava boasna osihinvav, kam ishumnu, Yon Baptaisva nemetva indhanamba pona poswol vevnamba, es hevpa himba Sesoana andra vevnama, a ambo indhananami?
5-6 Doa mundilva no moamba hillinamba, hevm eishovna, pivva osva umnitava, Yon Sesoana andranindrininonoa, wo Yesusva ata pimba ishunvav os, yimba indkokla vina, manara, yimba Yonna moamba hillivnamoa. Wo pivva ata osva umnitava Yesusmba, Yonmba ambo indhanana nengavnangra andra vinvna, wo indkumbiva ata pimba wusapramana vinvav, honna weilhivav. Manara, himba keknam os ningv, Yonmba Sesoana moashulnindrini lohvna.
7-8 Doa hev umnina Yesusm, kava tit viv, an Yonmba pusvundthoana. Yesus unna, kava ata yemba ishunvavmoa osva, an kamba pusvundthoana hona andramba.
Yesusva Unna, Himba Nomba Kamba Meis Haravhoamnatava, Sesoa Si Hemba Nomba Sewonam Esesm Vinvav.
Matiu 21:33-46, Mak 12:1-12
Yesus unna indhanam olhmona. Indhanariniva denwit grep wolavna, doa hev unvna andranindm, yeoa lengwol vewuvu denwitoa kavnasiraoa. Nonamba nihilva endandpravrava, veo monglaoa kavm, eva ye hlavm. Doa os hev mongona kembellam oklam gana, weisva mindnam khuawol vena diva.
10 Doa no denwitna movol dendpravna, aralva denwitnamba mongom andranindrinim wolaihaprana. Himba unna no andranindm, kamba aralva os omni, yem dembrehura grepmov. Heva os owai, himba hilvinamba, himba posal gana.
11 Doa henga denwitna aral mongom wolaihapra, kam dembrehura kana grepmov. Heva os owai, eva hemba hilvina, posal wuleihingina loumonahonam. 12 Doa henga denwitna aral mongom wolaihapra, kam dembrehura kana grepmov. Heva os owai, ovlana hilvina, lukuh shueina. 13 Doa no denwitna aral ona, ata kava es vevav? Kava ata kavna ombolm wolaihangavav, mongawindhana himba av, wo hemba kava mindnam und vev. Wo os kava nengv, andranindva hena moamba hillivav.
14-15 Heva os owai, no andranindva hena ombolm nunglinamba, doa hevm ishuwul vevna, aralmba si daharava, he si denwitva poauothovav. Pioa hemoa helvakomandhalvohra, denwitva si pina pivm luhunvav. Doa hev lukuh vrulangana denwitmusriniva amballam, os helvakomandhina.
Doa Yesus unna, es yimba ningv, es si vinvav denwitna aralva hona andranindmba? 16 Himba si provav, helvakomo vevav no andranindm, wo henga nemel andranindm pusvund vevav, hena denwitm kalvhoa aevulm. No mundilva hillina Yesusna olhmom, wo hev ningna, kam onnginv, wo noinda osva himba uvna, owai, Sesoava pimba osva vinvavmoa.
17 Yesus mendah ishunvna, novlomosm nongalungu vinvna, maim yimba os ningvm, kava si ehalmonam kohosaivvav Sesoana lesvhoawolnapenamba, owai, doaraminimomba novol velohv os,
Manda bolvol dihelvna, andranindva naengho vreivnamba, himba indvivnamoa, andra velmba nonamba. Heva os no mandamba sismba hovmundililm lotholohna. Buk Song 118:22
18 No manda bolvolsra indhanamba engkivrava, vetakolavra, kel tetepemna. Wo eva no mandamba indhanamba plotheinvrava, indhanariniva somovtovolm nilhavav.
19 No kuwulva hillinamba Yesusna moamba, doa henamba und phunna, Yesusm kevralm. Una, honamba moamba Yesusva ishovpa, pim onnginv. Heva os himba pem vivna ombandhanindnapenam, ata pimba homeis helvowol vivm.
Indhanamba Yesusm Sehmoa Ovrivna Dasalm Ambo.
Matiu 22:15-22, Mak 12:13-17
20 Mundilva hevm ishuvna, Yesusm kevralm. Doa hev pusvund vina indhanam, unna, yeoa ango, sehmoa ovrivm Yesusm dasalm, osm ovra kava hena moam hellelm wohviv. Osm ora he snamoa ishov, wo yeoa henga kam ishuhilvinu, wo kava os wetat uvav hemba duanginda.
21-22 No indhanamba Yesusmba dasalmba ishumnivna, guru, yemba kava wiyemniv, yimba indhanamba ishunv beswonam, osm himba beswonam monam engivra. Yimba mongawamoa ishunv indkumbimba, yimba moakus ov Sesoana tanamolmom. Doa kam ishunu, pina taeks dina wevsam, men pi dembroh velvohmanavm Sisa duangm, es hevpa lehrami, owaimi Sesoana novrava?
23-25 Wo Yesusva nengna, kamba dasalm umniv, doa hev unna, kam sen vilinithimnituk, anna novlomosva nihilva kovopathalohv? Doa hev umnina, yimba pev nonora lohv, Sisa duangna. Hev unna, honamba senmba yimba Sisa duangm dembroh velmba vinivrava, manapenam. Wo eva Sesoava osva orava, kam mana vema vinu, eva vinuta hemoa.
26 No indhanamba himba Yesusm deswuhilm vivna, ora snamoa ishov indhanana novra, heva os owai. Wo noinda himba mindnam nengavnang vivna, es eva ata Yesusmba opla vrimnivta?
Yesusva Unna, Tanam Pokamanind Si Pulvovav Beswonam Henga Hevna Nihna.
Matiu 22:23-33, Mak 12:18-27
27-28 Mongla Satusinind ambna Yesusindam, nomba temba und ilvahvnam os, pokamariniva si pulvovavmoa beswonamba hengava. Himba Yesusm lihminivna, osm ora moakokla ishovra, noinda hev umnina, guru, yimba nonora lohv, Moses doara novol vena os, etelmba dahavrava otolhui, hevna boasalal moamulmba pethavav. Doa nomba ungevliriniva otolva lengvrava, eisilnavhoram lohvav.
29-32 Doa 7pelara aratindi lovahvna. Yiveltowondva ongangona lohvna, hemba otolhui dahana. Boasalal mongo moamulm pethanamba, wo eva hemba dahanata otolhui. Boasalal mongo moamulm pethanamba, wo eva hemba dahanata otolhui. Venamba, no aratindimba wohvitivhoana otolhui, tetwond venamoa. Eva sism hemba ungevlirinimba dahana. 33 Sewonamba si tanamba pokamariniva pulvovrava, no aratindiva an nomba ungevlirinimba si vravav, osm hevna ongalalmba?, 7pelara no aratindi doara vruwulvahvnam.
34-35 Yesusva unna, owai, yimba gekala uv, hona pethanindva himba ongases velvohv. Doa heva os no indhanamba, Sesoava si hemba os unvav, pulvo, himba si ongasesva vewuvavmoa hengava. 36 Wo hemba hengava si dalvavmoa, himba si os aevulvav, maim ora, Sesoana ovsongolnind. Hev Sesoatindilm wohavav yunalm, Sesoava doa hemba wolapho vena pokamariniva.
37 Hona moamba mani nemelma, owai. Moses novol vena doara, himba nengam ishovna, suwemda tavna tivtandara, heva os timba nomba tavnamoa, owai. Mosesva nonglanamba, os novol vewol vena, mendekli himba Sesoa luhunv Aprahamna eva Isakna eva Yakopna, nomba pina simbelva, doara hemba humein mueisowa vilona, heva os si henga beswonam pulvovav pokamariniva. 38 Indhanamba nomba temba doarava dalnamba, Sesoava henomba si wolapho vevav. Manara, indhanamba nomba temba osva uvpa, mendekli kana Sesoa luhunv, no indhanamba himba indkumbi beswonam aevulv Sesoana novra, vei doara ten sihanam, eva pehnana avm.
39-40 Monglava katekisva hillinamba, hev umnina Yesusm, yena moamba besal. Doa heva os himba pem vinivna, henga Yesusmba sah ovralmba.
Yesusva Unna Katekism, Yeoa Kamoa Ishumnivm Kristusmom.
Matiu 22:41-46, Mak 12:35-37
41 Doa Yesusva unna, indhanamba undva ilvahv os, Kristusva si phovav Devit kuwultindirini. Es hevpa tanamma? 42-43 Yimba nonora av, Devitna moamba doara novol velohv, sangalmomba sembayangdini, os novol velohv,
Sesoa omnana Kristusm kana mendeklim, yeoa kana nihanasis avhoao, verava, ungundmba kava si yena vuehisingi sandhavav. Buk Song 110:1
44 No moara Devitva osva ona, Kristus kana mendekli lohv. Wo noinda indhanamba osva uvna, Kristusva yunam Devittindirini lohv, es hevpa?
Yesusva Hevtindim Unna, Manam Yimba Katekisna Wevsamba Enginvav.
Matiu 23:1-36, Mak 12:38-40, Luk 11:37-54
45 Yesusva os ishunvna, eva no indkumbiva mendah aevulvna, doa hev hevtindim unna, 46 manam yimba katekisna wevsamba enginvav, owai, novkaka aevulvm. Himba hevm huhmoh vewol vivpa beswonam, indhanahovram os lovahmana vev maketrava. Osm hevmba innetnasna vewol viv, kamba unvra, mendekli. Os vivna mendekli inneram, sembayangdam, himba hevmba mimangas vreipra vewol vivna, aevulthalmba. 47 Himba daswotalvohvna pelimba, osm wohva ambo nis dumbvna wohna dinamba. Hev ambo dasalm sembayang vivna tokwonam, osm kam unvra, lehra. Si sewonam Sesoava hemba naengho vrowol vevav, kin mendekli huhlinvav.