15
Yesus Unna Katekism, Yena Doaramini Lohohmoa Eva Kana Nemelmoa Mongawulmba Elohvavmoa.
Mak 7:1-13
1 Mongla katekis eva Varisinind, himba nomba keknam engivna doaraminimomba, himba Yerusalem kotarini ambvna, Yesusm nonglalm. Hev umnina Yesusm, 2 yetindiva himba kana simbehumunna lohohmomba enginvmoa. Himba hevna englava beswonamba poswol velvohvmoa, innemba hlalmba vevpa, osva memba pina lohohmomba luhunvpa simbehumunnamba. Elsus himba hona lohohmomba pilpikovolvohv, memba osva sahoklal.
3-4 Yesus unna hemba, yimba pev indkokla viv Sesoana novrava, katindiva owai. Yimba kek vithiv pevna doaraminimomangasm, Sesoana moamba aongpa viv. Nemetva Sesoava os ona, yeoa pevna ararapevmoa hilwilvm, eva kolvrowol vivm hemoa. Sesoava osta ona, himba nomba araravalva moakoklanamba koasromb vivrava, mongla indhana henomoa snamoa wohhelvakomo vivra.
5-7 Sesoava os unvna indhanamba, heva os yimba indhanamba ishunvna, mongova indhanariniva osva hevna araravalmba osva untava, kava Sesoam diandra venav, yemba kolvralmba owai, temba no indhanariniva lehra vev, eva himba owai vevta, hevna araravalmba kolvrowolalmba.
Yena moamba mindnam phunv vavawonam, pilpiapahalm Sesoana doaraminimom, manara, yimba owai, tanamba lovahthamnavmoa Sesoamba pevna undnahonamba, ambo dasalm ambara tovolla. Yimba tanam wohengiv doaraminimomba, Aisaia moashulnindrinina moamba, men os novol velohv,
8-9 Sesoava os ona, hona indhanamba kamba wiviv hevna mobesalna, heva os ambo dasalm tovolla moanamba eishov. Hevna undnahonamba, owai, himba kamba lovahthamnavmoa, wo hena sembayangmba ambo sena seposam dasalm vivna. Himba indhanamba owalmba hevna nengavnangna numhowol vivna. Honamba Sesoava os ona, himba osva memba dasalm viv. Aisaia 29:13
Yesus Unna, Indhanariniva Tanam Nihvuhinhui Lohv Sesoana Novrava, Nonamba Hevnamba Undva Besalangas Lehra Lohv.
Mak 7:14-23
10-11 Yesusva ishupieinnamba Varisinindmba, wo henga hev unna indkumbim indhanam, yeoa hom ambvm murapetam, wo kana olhmom hillivm, wo eva beswonam keknam ningvm. Mana vemava indhanariniva nevrava, manapenam, manara osm Sesoava hemba sahonamba nongalvavmoa no indhanamba. Wo heva os moakoklava indhanariniva ishotava hevna mindenamba, noindangas Sesoava si osva ovav, yenamba indkoklava luhunv. Manara noinda mindemba kolmal dombv undrini.
12-13 Henga Yesustindi ambanamba, umnina Yesusm, no Varisinindva himba mindnam ahalakowolvna hona yena moarava. Yesusva olhmona unvna hevna aonghal mahalnindm, kana arana osorava innemba besal lohv, si yunalm wohlohvav, manara hev wolana. Ilkoklava nomba phovrava, hev si velaihanga vevra plalnahonam. 14 Manam yimba duus vinvav no hena daosmomba, himba snal vilov, oi novtitmungil. Wo mongova novtitmungilva untava owalmba novtitmungilmba, kava beswonam yemba deis vungavra, wo hesamblava si noinda eplapewolvav potandarava.
15 Pita omnana Yesusm, kam ishunu no olhmona plalm, nom mengmerinim. 16 Yesus omnana Pitam, eva yimba snama mongla indhana, ten he titnam avm? 17 Mani inne hlav indhanamba, emera pilivhoa, wo henga eva ekokolm aiahav, undrava sihavmoa. 18 Wo heva os no moamba indhanariniva mengnamba ishovpa, nomba undmeriniangas phov. Henamba undva nihvuhinnamba lohtava, wo eva no indhanariniva nihvuhinnata Sesoana novrava.
19-20 Mindnam phunv indkoklava indhanana undmeriniva, men os himba viv, nengavnangkoklana viv, indhanam helvakomo viv, ongariskui vulangav, tlatrinim ungevlim pelvrombol vulangav, yukov viv, dasalm ishumniv duangm, eva moalusna ishunv owalm. Memba honamba sahoklal Sesoana novrava. Wo heva os himba nomba innemba nisva nevrava, temba himba nomba owai, sahonamba vevmoa Sesoana novrava.
Yesusva Kolvrana Mongnind Ongorinim, Himba Yesusmba Mindnam Hevna Undnahonam Amnavna.
Mak 7:24-30
21-22 Yesusva nominiva venamba, os gana Yutanindna meisnindna petharam, dom ten Tair kota eva Saiton kota elohvnam. Yesusva himba hevho wongavna hevna aonghal mahalnindmangas, numhowolalm. Doa mongo ungevlirini no kembellini pro Yesusindam, no ungevliriniva Kenan tindiriniongo. No ungevliriniva pronamba, dandwonam Yesusm omnana, mendekli, yimba Devit kuwultindirini lohv, kam wavra vovhoamno, wo kana mom sishona vro. Nemet doara heva tihsongo nonglanamba, wo noinda himba uvavulmungil dihelv.
23-24 Yesusva hemba opla vramnanamoa, wo hevna aonghal mahalnind umnina, wolaihango no ungevlirinimoa, pimba mendah wohengalomana ovov, wunuhona. Yesus omnana no ungevlirinim, Sesoa kamba wolaihaprana hona petharamba Israelnindmangas, himba snal aevulv, maim oi, sipsip aralhui, ten doa hoai vilonam.
25-27 Wo heva os no ungevliriniva wohgavnamoa, hev pronamba, Yesusna monglara mulumbdandna lohvhoamna, mendekli, kam kolvro. Doa Yesusva hemba olhmona omnavna, memba osva sahoklal, kava innemba dembhanga vetava otolnaminiva, wo windem daswolvra. Wo ungevlirini henga olhmona omnavna, lehra, yimba tanam ishov, heva os innesleholva dalv, nomba araravalva hlavpa, windemba nongas sleholangas hlav.
28 Yesusva indk vethavna, wo omnana hemba, lehra, daipotava kava yemba lihav, yimba kamba keknam wohamnav pevna undnahonam. Kava ata vevav, memba yimba kamba osahmanavpa, wo doa os hena molva wohlesvhoana.
Yesusva Indkumbim Uvavulmungilnindm Sishona Vewol Vena, wo Henga Innepeta Dahwol Vena No Indhanamba.
Mak 8:1-10
29-30 Yesusva nominiva venamba, wo Galiliplomb pethalmonam gavna, wo himba oloram vongana, ambo di avna. Indkumbi indhanamba provna Yesusindamba domba, wo nomba indhanamba himba mindnam nihkoklana wulprovna. Monglava snal, es eva ata sikih vivta, owai, monglava snal, es eva ata lovahmana vevta, monglava novtitmungil, monglava moahui, moamba ishuvnamoa, wo monglava indkumbiva wavranind. Indhanamba mendah wulprovna no nihkoklanamba, wo Yesusinda di velahakavna murapeta, os Yesusva nongalvra hemba. Wo Yesusva os sishona vewol vevna, wo os hemba henga wohkanandhawol vevna.
31 Indhanamba nomba nunglivnamba, uvna, pai pai pai no indhanamba nemetva himba moamba ishuvnamoa, wo heva os himba henga men daipota beswonam ishuv moamba. No indhanamba temba seilva sikih vemba owai vivnamba, himba henga beswonam lovahmana vev. No indhanamba nemetva temba lovahmanamba owai vevnamba, daipotava doa henga himba beswonam lovahmana vev. No indhanamba temba seilmba novtit vivnamba, daipotava doa henga beswonam novviv. Pioa Sesoam okolalohra, pioa Israelnindoa sembayang velvohmanara Sesoam, himba keknamangas wohav.
32 Yesusva hevtindim unna, hom ambo, kam hillu, kamba wavra venav hona indhanamba, samblamongonin himba doa huiva pimongova vina, wo hena innemba doa huti vina, ata mani himba hlavav? Kava hemba posalva pondava wolanga vetava, ata homeis mongom vetakolavm monara ponnahonam.
33 Hevna aonghal mahalnind umnina, hi ata pimba innemba dumbvav, hemba dahwol velmba, osva verava, pilivhoawol vera? Huiva deuvpa mongova murava lohvmoa.
34-36 Yesus unna hevna aonghal mahalnindm, es yimba rotiva iambei? Hev umnina, 7pelara rotiva, eva tambkokongla mongla eusil ambo. Wo doa Yesus unna no indhanam, avhoapro pethasra beswonam. Doa hev no 7pelara roti eva tambkokongla hevtindimini dumbunnamba, doa Sesoam nehvongo ovomnana, Sesoa yimba lehra. Hev popowol venamba eskand eskand, daswolvna hevna aonghal mahalnindm, unna, moang viwul vinu hona indhanam, hlalm.
37 Hevna aonghal mahalnindva os wohvina, wo doa hev hlanamba, pilivhoawol vuku ve, wo innemba eunumbulva ambo wohlohna, sumbva 7pelara hengava os sungowol vina.
38 No indhanamba himba os hlana, 4000pelara tendomba, ungevlitundisva owai, seivilvmoa. 39 Wo doa Yesus unna no indhanam, hona innekra angawul veo pevindamoa. Yesusva hevna aonghal mahalnindm botra wonsihanamba, plombmonam os wongana Makatan petharam.